အာရပ်စော်ဘွားများပြည်ထောင်စုတွင် ဟိန္ဒူဘုရားကျောင်းသစ်တစ်ခု ထပ်ဆောက်မည်

ဖေဖော်ဝါရီ ၁၉၊ ၂၀၂၀
M-Media

-အာရပ်စော်ဘွားများပြည်ထောင်စု (ယူအေအီး) နိုင်ငံ ဒူဘိုင်းမြို့မှာ ဟိန္ဒူဘုရားကျောင်းသစ်တစ်ခု ဆောက်လုပ်သွားမယ်လို့ အိန္ဒိယစီးပွားရေးလုပ်ငန်းရှင် ရာဂျူးရှရော့ဖ်က ကြေငြာလိုက်ပါတယ်။

ဒူဘိုင်းမြို့တောင်ဘက်က စီးပွားရေးအချက်အခြာနေရာဖြစ်တဲ့ ဂျီဘီလ် အလီဒေသက ဆစ်ခ်ဘုရားကျောင်း Guru Nanak Darbar ဘေးမှာ ဆောက်လုပ်မှာဖြစ်ပြီး စကွဲယားပေ ၂၅၀၀၀ ကျယ်ဝန်းမှာ ဖြစ်ပါတယ်။ ဘုရားကျောင်းသစ်ဟာ ဒူဘိုင်းက သမိုင်းဝင်ရပ်ကွက် ဘာရ်ဒူဘိုင်းမှာရှိပြီး နှစ် ၁၀၀ နီးပါးသက်တမ်းရှိ Sindhi Guru Darbar ဘုရားကျောင်းရဲ့ အခွဲတစ်ခုလည်း ဖြစ်ပါတယ်။

ရာဂျူးရှရော့ဖ်က ဘုရားကျောင်းသစ်ဟာ ဂျီဘီလ်အလီဒေသကို ဘာသာတရားပေါင်းစုံ ပေါင်းစုရာနေရာတစ်ခု ဖြစ်စေလိမ့်မယ်လို့ပြောကြားခဲ့ပါတယ်။

“ဒီဘုရားကျောင်း ပြီးစီးသွားတဲ့အခါကျရင် အဲဒီနေရာဟာ ခရစ်ယာန်ဘုရားကျောင်းတွေ၊ ဆစ်ခ်ဘုရားကျောင်းနဲ့ ဟိန္ဒူဘုရားကျောင်း တစ်စုတစ်စည်းတည်း တည်ရှိရာနေရာ ဖြစ်လာပါလိမ့်မယ်”

ဘုရားကျောင်းသစ် အုတ်မြစ်ချပွဲအခမ်းအနားကို ပြီးခဲ့တဲ့တစ်ပတ်မှာ ကျင်းပပြုလုပ်ခဲ့ပါတယ်။ ဘုရားကျောင်းဟာ ဒူဘိုင်းဒီရ်ဟမ် ၇၅ သန်းကုန်ကျမှာဖြစ်ပြီး ၂၀၂၂ ခုနှစ်မှာ ပြီးစီးမယ်လို့ ခန့်မှန်းထားပါတယ်။ ဒူဘိုင်း လူ့အဖွဲ့အစည်း ဖွံ့ဖြိုးတိုးတက်ရေး အာဏာပိုင်အဖွဲ့ကလည်း ဘုရားကျောင်းဆောက်လုပ်ဖို့အတွက် ခွင့်ပြုချက် ချပေးထားပြီး ဖြစ်ပါတယ်။

ဒီဇိုင်းကို Temple Architects လို့ခေါ်တဲ့ အိန္ဒိယ ဗိသုကာကုမ္ပဏီက ဆွဲပေးထားတာပါ။ ဒီကုမ္ပဏီဟာ ကမ္ဘာတစ်ဝှမ်းက ဟိန္ဒူဘုရားကျောင်းပေါင်း ၂၀၀ လောက်အတွက် ဒီဇိုင်းဆွဲပေးထားတဲ့ နာမည်ကျော် ကုမ္ပဏီလည်း ဖြစ်ပါတယ်။

Sindhi Guru Darbar ဘုရားကျောင်းအတွက် မြေနေရာကို ဒူဘိုင်းအစိုးရက ၂၀၁၈ ခုနှစ်မှာ ချပေးခဲ့တာပါ။ ဘုရားကျောင်းမှာ ဘုရားရှိခိုးခန်းတွေ၊ လူအများအပြားကို ဧည့်ခံကျွေးမွေးနိုင်မယ့် ဟောခန်းတစ်ခုနဲ့ မီးဖိုဆောင်တစ်ခု၊ လူမှုရေးအခမ်းအနားတွေ ကျင်းပနိုင်မယ့်နေရာတွေ၊ ကားပါကင်တွေ ပါဝင်မယ်လို့ ရှရော့ဖ်က ပြောကြားခဲ့ပါတယ်။

ယူအေအီးနိုင်ငံ အဘူဒါဘီမြို့မှာလည်း ဟိန္ဒူဘုရားကျောင်းတစ်ခု တည်ဆောက်နေပြီး ၂၀၂၂ ခုနှစ်မှာ ပြီးစီးဖို့ ရည်မှန်းထားပါတယ်။

Ref: Khaleej Times