တောင်ကိုရီးယား၊ အီတလီနှင့် အီရန်တို့တွင် COVID-19 ကူးစက်မှု စိုးရိမ်ဖွယ်ရာ မြင့်တက် (နောက်ဆုံးရသတင်းများ)

ဖေဖော်ဝါရီ ၂၃၊ ၂၀၂၀ (ည ၈ နာရီ)
M-Media

• စနေနေ့က လူ ၃ ဦး ထပ်မံသေဆုံးကာ ၁၆၉ ဦး ကူးစက်ခဲ့ပြီးတဲ့နောက် တောင်ကိုရီးယားအစိုးရက ဗိုင်းရပ်စ်ပြန့်နှံ့မှုနဲ့ပတ်သက်ပြီး အမြင့်ဆုံးအဆင့် တပ်လှန့်လိုက်ပါတယ်။ ရောဂါကူးစက်သူအရေအတွက်ဟာ စုစုပေါင်း ၆၀၂ ဦးရှိလာပြီး တရုတ်နိုင်ငံအပြင်ဘက်မှာ အများဆုံးကူးစက်တဲ့နိုင်ငံ ဖြစ်လာပါတယ်။ သေဆုံးသူကတော့ ၅ ဦးအထိ ရှိလာပါတယ်။ ရောဂါအဓိကပြန့်နှံ့ရာ နိုင်ငံတောင်ပိုင်း ဒယ်ဂူးမြို့က ချွန်ဒိုခရိုင်ကို သောကြာနေ့မှာ အထူး စောင့်ကြည့်ဇုန်အဖြစ် သတ်မှတ်ခဲ့ပါတယ်။ သမ္မတ မွန်ဂျယ်အင်က တိုင်းပြည်ဟာ အလှည့်အပြောင်းတစ်ခုကို ရောက်ရှိနေပြီး အာဏာပိုင်တွေအနေနဲ့ လုပ်သင့်လုပ်ထိုက်တာကို မတွန့်မဆုတ် လုပ်ဆောင်ကြဖို့ တိုက်တွန်းခဲ့ပါတယ်။
• အီတလီနိုင်ငံမြောက်ပိုင်းမှာ ဗိုင်းရပ်စ်ပိုးကူးစက်မှုအရေအတွက်ဟာ သိသိသာသာ မြင့်တက်လာခဲ့ပြီး အနည်းဆုံး လူ ၂ ဦး သေဆုံးခဲံတာကြောင့် မြို့တစ်ချို့ကို ပြင်ပနဲ့ အဆက်အသွယ်ဖြတ်ကာ ပိတ်ထားလိုက်သလို၊ စီးရီးအေ ဘောလုံးပွဲ တစ်ချို့၊ စီးရီးဘီ ဘောလုံးပွဲတွေနဲ့ အ‌ခြား အားကစားပြိုင်ပွဲတွေကိုလည်း ရပ်ဆိုင်းလိုက်ပါတယ်။ အီတလီမှာ ကူးစက်မှုဟာ နိုင်ငံရပ်ခြားကို သွားရောက်ရာကနေတစ်ဆင့် ဖြစ်ပွားတာမျိုးမဟုတ်ဘဲ အာဏာပိုင်တွေကတော့ ရောဂါကူးစက်မှုအကြောင်းအရင်းကို သိရှိဖို့ ကြိုးပမ်းအားထုတ်နေပါတယ်။ ကူးစက်သူအရေအတွက်တော့ ၁၀၀ ကျော် ရှိလာပြီ ဖြစ်ပါတယ်။
• အီရန်နိုင်ငံမှာတော့ သေဆုံးသူအရေအတွက်ဟာ ၇ ဦးအထိ ရှိလာခဲ့ပြီး ကူးစက်မှုကတော့ ၅၀ နီးပါး ရှိလာပြီ ဖြစ်ပါတယ်။ ရုပ်ရှင်ရုံတွေ အနုပညာပွဲတွေအားလုံးကို အာဏာပိုင်တွေက ပိတ်ပင်လိုက်သလို၊ အီရတ်ကို ဘုရားဖူးသွားမယ့်ခရီးစဉ်တွေအားလုံးကို ရပ်ဆိုင်းကာ အီရတ်နဲ့ ထိစပ်နေတဲ့ နယ်စပ်ဝင်ပေါက် ၅ ခုကိုလည်း ပိတ်ထားလိုက်ပါတယ်။ လူ ၂ ဦးသေဆုံးခဲ့တဲ့ ကွမ်မြို့နဲ့ အနီးအနားက အာရက်မြို့တွေမှာတော့ စာသင်ကျောင်းတွေကိုပါ ပိတ်ထားပါတယ်။
• တရုတ်သမ္မတ ရှီကျင့်ဖျင်က COVID-19 ဗိုင်းရပ်စ် ပြန့်နှံ့မှုဟာ ခေတ်သစ်တရုတ်နိုင်ငံသမိုင်းမှာ အဆိုးဝါးဆုံး ကျန်းမာရေး အရေးပေါ်အခြေအနေဖြစ်တယ်လို့ ပြောကြားခဲ့ပါတယ်။ တရုတ်နိုင်ငံမှာ မနေ့က ရောဂါကူးစက်မှုဟာ ၆၄၈ ဦး ရှိခဲ့ကာ ၉၇ ဦး သေဆုံးခဲ့ပါတယ်။ သေဆုံးမှု စုစုပေါင်း ၂၃၄၅ ဦးရှိကာ ကူးစက်သူကတော့ ၇၆၂၈၈ ဦး ရှိနေပါတယ်။
• အစ္စရေးဟာ တောင်ကိုရီးယားကလာတဲ့ ခရီးသွား ၂၀၀ လောက်ကို စစ်စခန်းတစ်ခုမှာ သီးခြားခွဲထားစောင့်ကြည့်ဖို့ စီစဉ်နေပါတယ်။ တောင်ကိုရီးယားနဲ့ ဂျပန်တို့ကနေ ပြန်လာတဲ့သူတွေအားလုံးကိုလည်း ၂ ပတ်ကြာ သီးသန့်ထားစောင့်ကြည့်ဖို့ အဲဒီနိုင်ငံတွေက ခရီးသွားတွေကို နိုင်ငံအတွင်း ဝင်ရောက်ခွင့်မပေးဖို့လည်း အစ္စရေးက အမိန့်ထုတ်ပြန်ထားပါတယ်။
• ယိုကိုဟားမားမြို့နားမှာ ရပ်နားထားတဲ့ Diamond Princess ကမ္ဘာလှည့်ခရီးသွားသင်္ဘောကနေ ဆင်းခွင့်ပေးလိုက်တဲ့ အမျိုးသမီးတစ်ဦးမှာ ဗိုင်းရပ်စ်ပိုးရှိနေကြောင်း တွေ့ရတဲ့အတွက် ဂျပန်ကျန်းမာရေးဝန်ကြီးက တောင်းပန်လိုက်ပါတယ်။ အသက် ၆၀ ကျော်အရွယ် အဲဒီအမျိုးသမီးကို တိုချီဂီပြည်နယ်မှာ ထပ်မံစစ်ဆေးမှုအတွင်း ဗိုင်းရပ်စ်ပိုးရှိကြောင်း တွေ့ခဲ့ရတာပါ။ လူ ၃၇၀၀ ကျော်ပါဝင်ပြီး အနည်းဆုံး ၆၀၀ ကျော်လောက် ကူးစက်မှုရှိနေတဲ့ အဲဒီသင်္ဘောက လူရာချီကို ပြီးခဲ့တဲ့တစ်ပတ်မှာ ဆင်းခွင့်ပေးလိုက်တာနဲ့ပတ်သက်ပြီး ဂျပန်နိုင်ငံဟာ နိုင်ငံတကာအသိုင်းအ၀ိုင်းရဲ့ ဝေဖန်မှုကို အကြီးအကျယ် ခံနေရတာ ဖြစ်ပါတယ်။

Ref: Aljazeera