ဂါဇာတွင် အစ္စရေးလက်ချက်ကြောင့် ပါလက်စတိုင်းတစ်ဦးသေဆုံး၊ ၂ ဦး ဒဏ်ရာရ

ဖေဖော်ဝါရီ ၂၃၊ ၂၀၂၀
M-Media

-ပါလက်စတိုင်းပိုင်နက်ဖြစ်တဲ့ ဂါဇာကမ်းမြှောင်မှာ အစ္စရေးစစ်တပ်ရဲ့ လက်ချက်ကြောင့် ပါလက်စတိုင်း လူငယ်တစ်ဦး သေဆုံးခဲ့ပြီး ၂ ဦး ဒဏ်ရာရရှိခဲ့ပါတယ်။

ဂါဇာကမ်းမြှောင်တောင်ပိုင်း ခန်ယူနစ်မြို့က နယ်စပ်ခြံစည်းရိုးအနီးမှာ မနေ့က ဖြစ်ပွားခဲ့တာပါ။ အစ္စရေးစစ်တပ်ကတော့ နယ်စပ်ခြံစည်းရိုးအနားမှာ ဗုံးထောင်တယ်လို့ သံသရှိသူ ပါလက်စတိုင်းတစ်ဦးကို ပစ်သတ်ခဲ့တယ်လို့ ထုတ်ပြန်ခဲ့ပါတယ်။ သေဆုံးသူဟာ ၂၇ နှစ်အရွယ် မိုဟာမက် အလီ အလ်-နအင်း ဆိုသူ ဖြစ်ပါတယ်။

ဆိုရှယ်မီဒီယာမှာ ပြန့်နှံ့လာတဲ့ ဗီဒီယိုမှာတော့ အစ္စရေးစစ်တပ်ဟာ ပါလက်စတိုင်းတစ်ဦးရဲ့ ရုပ်အလောင်းကို ဘူဒိုဇာနဲ့ ခြံစည်းရိုးနား ဆွဲယူနေတာကို မြင်ရသလို၊ ရုပ်အလောင်းကို ပြန်လည်ဆွဲယူတဲ့ ပါလက်စတိုင်းတွေထဲက ၂ ဦးလည်း အစ္စရေးစစ်တပ်ရဲ့ ပစ်ခတ်မှုကြောင့် ဒဏ်ရာရရှိသွားခဲ့ပါတယ်။

ပါလက်စတိုင်း တော်လှန်ရေးလက်နက်ကိုင်အဖွဲ့တစ်ခုဖြစ်တဲ့ PIJ က ဒီဗီဒီယိုဟာ အစ္စရေးရဲ့ ရက်စက်ကြမ်းကြုတ်မှုတွေကို ဖော်ပြနေတာဖြစ်တယ်လို့ ပြောကြားခဲ့ပါတယ်။

ဂါဇာကမ်းမြှောင်ကို အုပ်စိုးနေတဲ့ ဟားမက်စ်အဖွဲ့က ဒီအဖြစ်အပျက်ဟာ ပါလက်စတိုင်းပိုင်နက်တွေကို အစ္စရေးရဲ့ ကျူးကျော်သိမ်းပိုက်မှု၊ ပါလက်စတိုင်းပြည်သူတွေအပေါ် ကျူးလွန်မှုတွေကို ဖော်ပြနေပြီး ဗီဒီယိုမှတ်တမ်းတင်ထားနိုင်တဲ့အတွက် အများက သိရှိရတာဖြစ်ကြောင်း မှတ်တမ်းမတင်ထားနိုင်တဲ့ ဒီလိုအဖြစ်အပျက်တွေ ရာနဲ့ချီ ရှိနေကြောင်း ထုတ်ပြန်ပြောကြားခဲ့ပါတယ်။

Ref: Aljazeera