မိုဒီမှာ အိန္ဒိယ၏ ခြွင်းချက်မဲ့ခေါင်းဆောင်ဟု ထရမ့်ပြော

ဖေဖော်ဝါရီ ၂၅၊ ၂၀၂၀
M-Media

-အမေရိကန်ဟာ အိန္ဒိယကို ချစ်ခင်မြတ်နိုးပြီး အိန္ဒိယပြည်သူတွေအတွက် သစ္စာရှိတဲ့ မိတ်ဆွေအဖြစ် အမြဲတမ်း ရှိနေမယ်လို့ အမေရိကန်သမ္မတ ဒေါ်နယ်ထရမ့်က ပြောကြားလိုက်ပါတယ်။

ထရမ့်ဟာ ၂ ရက်ကြာ ခရီးစဉ်အဖြစ် မနေ့က အိန္ဒိယကို ရောက်လာခဲ့တာပါ။ ဒါဟာ နှစ် ၆၀ အတွင်း အိန္ဒိယနိုင်ငံကို အမေရိကန်သမ္မတတစ်ဦး ပထမဆုံးအကြိမ် လာရောက်မှုလည်း ဖြစ်ပါတယ်။

ထရမ့်နဲ့ ဇနီးဖြစ်သူ မီလာနီယာတို့ဟာ အိန္ဒိယဝန်ကြီးချုပ် မိုဒီရဲ့ ဇာတိပြည်နယ် ဂူဂျာရသ်ကိုသွားရောက်ကာ အိန္ဒိယလွတ်လပ်ရေးခေါင်းဆောင် မဟတ္တမဂန္ဒီရဲ့ ဂူဗိမာန်ကို ဂါရ၀ပြုခဲ့ပါတယ်။ မိုဒီက ထရမ့်ကို အန္တရာယ်ကင်း မျောက် ၃ ကောင်ရုပ်ထု လက်ဆောင်ပေးခဲ့ပါတယ်။

အဲဒီနောက် ထရမ့်ဟာ အဟ်မဒ်ဒါဘတ်မြို့က ကမ္ဘာ့အကြီးဆုံး ခရစ်ကတ်အားကစားကွင်းမှာ မိန့်ခွန်းပြောခဲ့ပြီး မိုဒီဟာ ‘ခြွင်းချက်မဲ့ခေါင်းဆောင်၊ အိန္ဒိယနိုင်ငံရဲ့ ရှေ့ဆောင်ပုဂ္ဂိုလ်ကြီး’ ဖြစ်တယ်လို့ ချီးကျူးခဲ့ပါတယ်။

“အမေရိကဟာ အိန္ဒိယကို ချစ်တယ်။ အမေရိကဟာ အိန္ဒိယကို လေးစားတယ်။ ‌အမေရိကဟာ အိန္ဒိယပြည်သူတွေအတွက် အမြဲတမ်း ယုံကြည်ရတဲ့ သစ္စာရှိမိတ်ဆွေ ဖြစ်နေမှာပါ”

ထရမ့်ရဲ့ ဒီမိန့်ခွန်းပြောကြားမှုကို လူတစ်သိန်းလောက် တက်ရောက်နားထောင်ခဲ့ပါတယ်။

အိန္ဒိယဝန်ကြီးချုပ် မိုဒီက သမ္မတထရမ့်ရဲ့ လာရောက်လည်ပတ်မှုဟာ မိမိတို့နှစ်နိုင်ငံ ဆက်ဆံရေးမှာ အမေရိကန်ရော၊ အိန္ဒိယပြည်သူတွေပါ တိုးတက်တွန်းကား သာယာ၀ပြောမယ့် ကဏ္ဍသစ်တစ်ခု ဖွင့်လှစ်လိုက်တာဖြစ်တယ်လို့ ပြောကြားခဲ့ပါတယ်။

“သမ္မတထရမ့်တစ်ယောက် အမေရိကရဲ့ အိပ်မက်တွေကို ဘယ်လို ဖြည့်ဆည်းပေးခဲ့လဲဆိုတာ တစ်ကမ္ဘာလုံးက သိကြပါတယ်”

ထရမ့်ဟာ အိန္ဒိယနိုင်ငံရဲ့ စီးပွားရေးတိုးတက်မှုကို ချီးကျူးခဲ့ပြီး ‘အစွန်းရောက် အစ္စလာမ့်မစ် အကြမ်းဖက်ဝါဒ အန္တရာယ်ကနေ နိုင်ငံသားတွေကို ကာကွယ်နိုင်ရေး မိမိတို့နှစ်နိုင်ငံစလုံးက ပြတ်ပြတ်သားသားနဲ့ စည်းစည်းလုံးလုံး ဆောင်ရွက်သွားမယ်’ လို့ လည်း ထည့်သွင်းပြောဆိုခဲ့ပါတယ်။

ထရမ့်ဟာ တနင်္လာနေ့ညနေပိုင်းက နာမည်ကျော် တဂျ်မဟာလ်ဗိမာန်ကိုလည်း သွားရောက်လည်ပတ် ကြည့်ရှုခဲ့ပါတယ်။

Ref: Aljazeera