နယူးဒေလီရှိ မွတ်စလင်များအကြမ်းဖက်ခံရမှု‌တွင် သေဆုံးသူ ၂၄ ဦးအထိရှိလာ (နောက်ဆုံးရသတင်းများ)

ဖေဖော်ဝါရီ ၂၆၊ ၂၀၂၀
M-Media

• ပါကစ္စတန်ဝန်ကြီးချုပ် အင်မရန်းခန်းက ဒေလီအကြမ်းဖက်မှုတွေကို ရှုတ်ချကြောင်းပြောကြားခဲ့ပြီး အမုန်းတရားကို အခြေခံတဲ့ လူမျိုးရေးခွဲခြားမှု အယူအဆ ကြီးစိုးသွားတာနဲ့ သွေးချောင်းစီးမှုတွေ ဖြစ်ပွားတတ်တယ်လို့ ပြောကြားခဲ့ပါတယ်။

“ပါကစ္စတန်က ပြည်သူတွေကို သတိပေးချင်တာက တိုင်းပြည်အတွင်းရှိနေတဲ့ မွတ်စလင်မဟုတ်သူ နိုင်ငံသားတွေနဲ့ သူတို့ရဲ့ ဝတ်ပြုရာနေရာနေရာတွေကို ပစ်မှတ်ထား တိုက်ခိုက်တဲ့ ဘယ်သူမဆို ပြင်းထန်တဲ့ တုန့်ပြန်မှုနဲ့ ကြုံတွေ့ရမယ် ဆိုတာပါပဲ။ တိုင်းပြည်က လူနည်းစုတွေရဲ့ နိုင်ငံသားအဆင့်အတန်းဟာ တစ်ပြားသားမှ လျော့မှာ မဟုတ်ပါဘူး”

• အိန္ဒိယနိုင်ငံမြို့တော် နယူးဒေလီမှာ ဟိန္ဒူလူအုပ်က မွတ်စလင်တွေအပေါ် ပစ်မှတ်ထားတဲ့ အကြမ်းဖက်မှုအတွင်း သေဆုံးသူအရေအတွက်ဟာ ဖေဖော်ဝါရီ ၂၆ ရက်နေ့အထိ ၂၄ ဦး ရှိလာပြီ ဖြစ်ပါတယ်။ မြို့ပေါ်က မွတ်စလင်ရပ်ကွက်တွေ အဓိက ပစ်မှတ်ထားတိုက်ခိုက်ခံရတာဖြစ်ပြီး ဒဏ်ရာရသူအရေအတွက်ကတော့ ၂၀၀ လောက် ရှိလာပါတယ်။ မကြာသေးခင်က ပြဌာန်းလိုက်တဲ့ နိုင်ငံသားဥပဒေ ပြင်ဆင်ချက်ကို ဆန့်ကျင်တဲ့ ထိုင်သပိတ်ကို ဟိန္ဒူလူအုပ်က တိုက်ခိုက်ခဲ့ပြီးတဲ့နောက်ပိုင်း မွတ်စလင်တွေအပေါ် အကြမ်းဖက်တိုက်ခိုက်မှုတွေ ဆက်တိုက်ဖြစ်လာတာ ဖြစ်ပါတယ်။
• ၀န်ကြီးချုပ် နရန်ဒရာမိုဒီက ဒေလီပြည်သူအနေနဲ့ ငြိမ်းချမ်းရေးကို ထိန်းသိမ်းဖို့ တိုက်တွန်းခဲ့ပြီး ငြိမ်းချမ်းမှု၊ သဟာဇတဖြစ်မှုတို့ဟာ မိမိတို့အသိုင်အဝိုင်းရဲ့ အဓိကကိစ္စဖြစ်တယ်လို့ ဒီကနေ့မှာ ပြောကြားလိုက်ပါတယ်။ ဒါဟာ ၃ ရက်တာ ကြာမြင့်နေပြီဖြစ်တဲ့ အကြမ်းဖက်မှုနဲ့ပတ်သက်ပြီး မိုဒီရဲ့ ပထမဆုံးအကြိမ် ပြောကြားမှုလည်း ဖြစ်ပါတယ်။
• အကြမ်းဖက်မှုတွေကြောင့် ဟိန္ဒူနဲ့မွတ်စလင် ရောနှောနေထိုင်တဲ့ ရပ်ကွက်ကလူတွေဟာ ဘေးလွတ်ရာကို ရွှေ့ပြောင်းနေထိုင်မှုတွေ ရှိလာပါတယ်။ ဒေလီအုပ်ချုပ်ရေးမှူး အာရ်ဗင် ကဂျ်ရီဝါလ်က မြို့တွင်းမှာ ညမထွက်ရအမိန့်ထုတ်ပြန်ပြီး တပ်ဖွဲ့တွေ ချထားဖို့အတွက် စစ်တပ်ကိုတောင်းဆိုခဲ့ပါတယ်။
• ဒေလီဟိုက်ကုတ်တရားရုံးက နိုင်ငံရေးခေါင်းဆောင်တွေအနေနဲ့ ပြဿနာတွေ ပြေလည်စေရေး မြေပြင်အထိ သွားရောက် ဖြေရှင်းကြဖို့ တိုက်တွန်းခဲ့ပြီး မိမိတို့ရဲ့ တာဝန်ယူမှုအောက်ဟာ ၁၉၈၄ ခုနှစ်က အဖြစ်အပျက်မျိုး နောက်ထပ် အဖြစ်မခံနိုင်ဘူးလို့ ထုတ်ပြန်ခဲ့ပါတယ်။ ၁၉၈၄ ခုနှစ်မှာ နိုင်ငံတစ်ဝှမ်း ဆစ်ခ်ဘာသာဝင်တွေကို ဟိန္ဒူလူအုပ်က အကြမ်းဖက်တိုက်ခိုက်မှုကြောင့် အနည်းဆုံး ခစ်ခ်လူမျိုး ၃ ထောင်လောက် သေဆုံးခဲ့ပါတယ်။
• အတိုက်အခံ ကွန်ဂရက်ပါတီက အကြမ်းဖက်မှုတွေကို တားဆီးဖို့ ပျက်ကွက်တဲ့ ပြည်ထဲရေးဝန်ကြီး ရာထူးကနေ နှုတ်ထွက်ဖို့ တောင်းဆိုခဲ့ပါတယ်။ ဒီကိစ္စမှာ ပြည်ရေးဝန်ကြီးအပြင် ဗဟိုအစိုးရမှာလည်း တာဝန်ရှိတယ်လို့ ထုတ်ပြန်ခဲ့ပါတယ်။
• အကြမ်းဖက်မှုဖြစ်ပွားပြီးနောက် တည်ငြိမ်သွားမှုအနည်းငယ်ရသွားတဲ့ ဒေလီက ဒေသတစ်ချို့မှာတော့ ဟိန္ဒူနဲ့ မွတ်စလင်တွေ စုပေါင်းပြီး အပျက်အဆီးရှင်းလင်းရေးလုပ်ငန်းတွေ လုပ်ဆောင်နေပါတယ်။

Ref: Aljazeera