COVID-19 ဗိုင်းရပ်စ်ကြောင့် အွမ္မရာဘုရားဖူးခရီးစဉ်များကို ဆော်ဒီက ယာယီရပ်ဆိုင်း

ဖေဖော်ဝါရီ ၂၇၊ ၂၀၂၀
M-Media

-ကမ္ဘာတစ်ဝှမ်းမှာ ပြန့်နှံ့နေတဲ့ ကိုရိုနာဗိုင်းရပ်စ်သစ် စိုးရိမ်ရမှုကြောင့် အစ္စလာမ်ဘာသာဝင်တွေ မက္ကာဟ်ကို အွမ္မရာ ဘုရားဖူးခရီး လာရောက်မှုနဲ့ မဒီနာက တမန်တော်မြတ် ဗလီဝတ်ကျောင်းတော် သွားရောက်လည်ပတ်မှုတွေကို ဆော်ဒီအာရေဗျက ယာယီပိတ်ပင်လိုက်ပါတယ်။

ဆော်ဒီ နိုင်ငံခြားရေးဝန်ကြီးဌာနရဲ့ ထုတ်ပြန်ချက်မှာ နိုင်ငံအတွင်း ဗိုင်းရပ်စ် ပြန့်နှံမှုမရှိအောင် ကြိုတင်ကာကွယ်ရေးတွေ အမြင့်ဆုံး လုပ်ဆောင်ထားဖို့လိုတယ်ဆိုတဲ့ ကျန်းမာရေး တာဝန်ရှိသူတွေရဲ့ အကြံပေးချက်အရ ဒီလို ပိတ်ပင်လိုက်တာလို့ ဖော်ပြထားပါတယ်။ လက်ရှိ ကိုရိုနာဗိုင်းရပ်စ်သစ် ဖြစ်ပွားနေတဲ့ နိုင်ငံက ခရီးသွားတွေ ဝင်ရောက်မှုကိုလည်း ဆော်ဒီက ပိတ်ပင်ထားပါတယ်။

ပြီးခဲ့တဲ့ ရက်ပိုင်းအတွင်း အရှေ့အလယ်ပိုင်းမှာ COVID-19 ဗိုင်းရပ်စ်ပိုး ကူးစက်ပြန့်နှံ့မှု သိသိသာသာ မြင့်တက်လာပြီး အီရန်နိုင်ငံမှာဆိုရင် အနည်းဆုံး လူ ၁၉ ဦး သေဆုံးခဲ့ပါတယ်။ ကူဝိတ်၊ ဘာရိန်း၊ အိုမန်၊ လက်ဘနွန်၊ အီရတ်နဲ့ ယူအေအီးနိုင်ငံတွေမှာလည်း ဗိုင်းရပ်စ်ပိုး ကူးစက်နေသူတွေကို တွေ့လာရပါတယ်။

ဆော်ဒီအာရေဗျမှာတော့ ဗိုင်းရပ်စ်ပိုး ကူးစက်နေသူ မရှိသေးပါဘူး။ ဆော်ဒီနိုင်ငံသားတွေနဲ့ ပင်လယ်ကွေ့နိုင်ငံတွေက နိုင်ငံသားတွေ ဆော်ဒီနိုင်ငံကို လာရောက်တာ၊ ဆော်ဒီကနေ အခြားနိုင်ငံကို သွားရောက်လည်ပတ်တာတွေကိုလည်း ဆော်ဒီက ယာယီ ပိတ်ပင်ထားပါတယ်။ ဒါပေမယ့် နိုင်ငံခြားက ဆော်ဒီနိုင်ငံသားတွေ နေရပ်ပြန်လာမှု၊ ဆော်ဒီက ပင်လယ်ကွေ့နိုင်ငံသားတွေ မိမိနေရပ် ပြန်မှုကိုတော့ ခြွင်းချက်အဖြစ် ခွင့်ပြုထားပါတယ်။

လက်ရှိ ပိတ်ပင်ထားမှုဟာ ယာယီသာဖြစ်ပြီး အာဏာပိုင်တွေက အချိန်နဲ့တစ်ပြေးညီ စောင့်ကြည့်ကာ လိုအပ်တာတွေကို ဆက်လက် ဆောင်ရွက်သွားမယ်လို့လည်း နိုင်ငံခြားရေးဝန်ကြီးဌာနရဲ့ ထုတ်ပြန်ချက်မှာ ဖော်ပြထားပါတယ်။

Ref: Alarabiya