COVID-19 ဗိုင်းရပ်စ်က ကမ္ဘာ့ကပ်ရောဂါ ဖြစ်တော့မည်ဟု ဩဇီဝန်ကြီးချုပ် သတိပေး (နောက်ဆုံးရသတင်းများ)

ဖေဖော်ဝါရီ ၂၇၊ ၂၀၂၀ (ညနေ ၄ နာရီ)
M-Media

• တရုတ်နိုင်ငံတောင်ပိုင်း ဂွမ်ဒုန်ပြည်နယ်မှာ COVID-19 ပျောင်းကင်းပြီဆိုကာ ဆေးရုံးကဆင်းခွင့်ပေးခဲ့သူတွေရဲ့ ၁၄ ရာခိုင်နှုန်းလောက်မှာ ဗိုင်းရပ်စ်ရှိကြောင်း ပြန်တွေ့ရတယ်လို့ တရုတ်အာဏာပိုင်တွေက ပြောကြားလိုက်ပါတယ်။ ဘာ့ကြောင့် ဒီလိုဖြစ်လဲဆိုတာ ရှင်းရှင်းလင်းလင်း မသိသေးပါဘူး။ လည်ချောင်းနဲ့ နှာခေါင်းတို့ဖတ်နမူနာ ၂ ကြိမ်ဆက် စမ်းသပ်မှုအတွင်း ဗိုင်းရပ်စ်ရှိကြောင်း မတွေ့ရင်၊ CT စကန်ဖတ်မှုအရ အဆုတ်မှာ ဒဏ်ရာမတွေ့ရင်၊ အဖျားတက်တာလို ရောဂါက္ခဏာမျိုး မရှိတော့ရင် ဗိုင်းရပ်စ်မရှိဘူးလို့ ယူဆတာဖြစ်ပါတယ်။ ဒါပေမယ့် ဒီလူနာတွေဟာ နောက်ဆက်တွဲ ကျန်းမာရေးစစ်ဆေးမှုတွေကို ခံယူရပါတယ်။
• ဥရောပနိုင်ငံတွေဖြစ်တဲ့ ရိုမေးနီးယား၊ အက်စ်တိုးနီးယားနဲ့ ဒိန်းမတ်နိုင်ငံတွေမှာ ဗိုင်းရပ်စ်ပိုး ကူးစက်နေသူတွေကို မနေ့က ပထမဆုံးအကြိမ် တွေ့ခဲ့ရပါတယ်။ အီတလီမှာတော့ မနေ့က ကူးစက်သူအရေအတွက်ဟာ ၂၅ ရာခိုင်နှုန်းအထိ မြင့်တက်ကာ စုစုပေါင်း ၄၀၀ အထိ ရောက်လာပါတယ်။ သေဆုံးသူကတော့ ၁၂ ဦးအထိ ရှိနေပါတယ်။
• အီရန်နိုင်ငံမှာ ကူးစက်မှုဟာ စုစုပေါင်း ၁၄၁ ဦးအထိ ရှိလာပြီး သေဆုံးသူကတော့ ၂၂ ဦး ရှိလာပြီဖြစ်ပါတယ်။ အီရန်နဲ့ကပ်နေတဲ့ အီရတ်နိုင်ငံမှာလည်း ဗိုင်းရပ်စ် ကူးစက်နေသူအရေအတွက်ဟာ ၆ ဦးအထိ ရှိလာပါပြီ။ အရှေ့အလယ်ပိုင်းက လက်ဘနွန်၊ ဘာရိတ်း၊ ကူဝိတ်တို့မှာလည်း ဗိုင်းရပ်စ်ကူးစက်မှုတွေ ရှိနေပါတယ်။
• တောင်ကိုရီးယားနိုင်ငံမှာ မနေ့က ဗိုင်းရပ်စ်ကူးစက်နေသူ ရာနဲ့ချီ ထပ်တွေ့ခဲ့ရပြီး စုစုပေါင်း ကူးစက်သူ ၁၇၆၆ ဦး ရှိလာပြီဖြစ်ပါတယ်။ သေဆုံးသူကတော့ စုစုပေါင်း ၁၃ ဦးအထိ ရှိလာပါတယ်။ ဗိုင်းရပ်စ်ပြန့်နှံ့နေမှုကြောင့် မူလက စီစဉ်ထားတဲ့ ကန်-တောင်ကိုရီးယား စစ်ရေးလေ့ကျင့်မှုကိုလည်း ရပ်ဆိုင်းလိုက်ပါတယ်။
• တရုတ်နိုင်ငံမှာ ဗုဒ္ဓဟူးနေ့က လူ ၄၃၃ ဦး ထပ်မံ ကူးစက်ခဲ့ပြီး သေဆုံးသူ ၂၉ ဦး ရှိခဲ့ပါတယ်။ တစ်ရက်အတွင်း သေဆုံးမှုဟာ ဇန်နဝါရီ ၂၈ ရက်နောက်ပိုင်း အနည်းဆုံးဖြစ်လာတာပါ။ တရုတ်မှာ စုစုပေါင်း ကူးစက်မှုဟာ ၇၈၄၉၇ ဦး ရှိကာ သေဆုံးသူက ၂၇၄၄ ဦး ရှိလာပြီ ဖြစ်ပါတယ်။ ရောဂါအကြီးအကျယ်ပြန့်နှံ့နေတဲ့ ဟူဘေးပြည်နယ်က ကျင်ကျန်းမြို့မှာ ရောဂါလက္ခဏာဖြစ်နေကြောင်း အာဏာပိုင်တွေကို လာရောက်အကြောင်းကြားတဲ့သူတွေကို ရောဂါရှိကြောင်းတွေ့ရရင် ယွမ်တစ်သောင်း (ဒေါ်လာ ၁၄၀၀) ဆုချမယ်လို့ ထုတ်ပြန်ထားပါတယ်။
• သမ္မတဒေါ်နယ်ထရမ့်က အမေရိကန်ဟာ COVID-19 ဗိုင်းရပ်စ်ကို တုန့်ပြန်နိုင်ရေး အဆင့်သင်အနေအထားမှာ ရှိနေတယ်လို့ မနေ့မှာ ပြောကြားခဲ့ပါတယ်။ ဒီကိစ္စကို ကိုင်တွယ်ဖြေရှင်းဖို့ ဒုတိယသမ္မတ မိုက်ပန့်စ်ကို တာဝန်ပေးထားပြီး နိုင်ငံအတွင်း အကြီးအကျယ် ပြန့်နှံ့တာမျိုး မဖြစ်နိုင်ဘူးလို့လည်း ထရမ့်က ဆိုပါတယ်။ ကယ်လီဖိုးနီးယာမှာ ထပ်တွေ့ရတဲ့ ရောဂါကူးစက်မှုတစ်ခုဟာ နိုင်ငံရပ်ခြားကို ခရီးသွားတာမျိုးကနေတစ်ဆင့် ကူးတာမျိုးမဟုတ်ဘဲ နိုင်ငံအတွင်းမှာတင် ပထမဆုံး ကူးစက်တာ ဖြစ်နိုင်တယ်လို့ ကျန်းမာရေး အာဏာပိုင်တွေက ထုတ်ပြန်ခဲ့ပါတယ်။
• ကမ္ဘာကြီးဟာ COVID-19 ဗိုင်းရပ်စ် ကပ်ဘေးဆိုက်မယ့်အနေအထားကို ရောက်ရှိနေပြီလို့ ဩစတေးလျဝန်ကြီးချုပ် မောရစ်ဆန်က သတိပေးလိုက်ပါတယ်။ ဒီရောဂါဟာ တရုတ်နိုင်ငံအပြင် တောင်ကိုရီးယား၊ အီတလီနဲ့ အီရန်တို့မှာ သိသိသာသာ ပြန့်နှံ့လာပြီး အခြား ဥရောပနဲ့ အရှေ့အလယ်ပိုင်း နိုင်ငံတွေကိုလည်း ပြန့်နှံ့ ရောက်ရှိနေပြီ ဖြစ်ပါတယ်။ နိုင်ငံအတွင်း အရေးပေါ်စီမံကိန်းကို စတင်ထားပြီး ဗိုင်းရပ်စ်ကာကွယ်ရေးနဲ့ ကုသရေးကိစ္စတွေကို အာရုံစိုက်လုပ်ဆောင်သွားမယ်လို့လည်း မော်ရစ်ဆန်က ပြောပါတယ်။

Ref: Strait Times, Aljazeera, BBC

(ပုံ-တောင်ကိုရီးယားနိုင်ငံ ဆိုလ်းမြို့ မြင်ကွင်း)