မက္ကာရှိ မတ်စ်ဂျစ်ဒ်ဟရမ်ဗလီတွင် ပိုးသတ်မှုလုပ်ငန်းများ လုပ်ဆောင်နေ

ဖေဖော်ဝါရီ ၂၉၊ ၂၀၂၀
M-Media

-COVID-19 ဗိုင်းရပ်စ် ပြန့်နှံ့မှာကို စိုးရိမ်တဲ့အတွက် အွမ္မရာဘုရားဖူးခရီးစဉ်တွေကို ယာယီ ပိတ်လိုက်တယ်လို့ ဗုဒ္ဓဟူးနေ့မှာ ကြေငြာပြီးတဲ့နောက် ဆော်ဒီအာရေဗျဟာ မက္ကာမြို့က မတ်စ်ဂျစ်ဒ်ဟရမ် ဗလီဝတ်ကျောင်းတော်မှာ ပိုးသတ်မှုလုပ်ငန်းကို လုပ်ဆောင်နေပါတယ်။

ဗလီအတွင်း ခင်းထားတဲ့ ကောဇောတွေကို သိမ်းဆည်းတာ၊ ဗလီပရဝုဏ်အတွင်း ပိုးသတ်ဆေးရေတွေနဲ့ သန့်ရှင်းရေး လုပ်ဆောင်နေတဲ့ ဓာတ်ပုံတွေဟာ မနေ့က ဆိုရှယ်မီဒီယာတွေမှာ ပြန့်နှံလာခဲ့ပါတယ်။

ပြီးခဲ့တဲ့နှစ်အတွင်း ဆော်ဒီအာရေဗျကို ကမ္ဘာတစ်ဝှမ်းက ဘုရားဖူးခရီးသည် ၂.၅ သန်းလောက် လာရောက်ခဲ့ကြပါတယ်။ လက်ရှိ အွမ္မရာဘုရားဖူးခရီးစဉ် ပိတ်ပင်မှုဟာ ယာယီသာဖြစ်တယ်လို့ ဆော်ဒီအာဏာပိုင်တွေက ပြောကြားခဲ့ပေမယ့် ရက်စွဲအတိအကျကို ထုတ်ပြန်တာမျိုးတော့ မရှိပါဘူး။

လာမယ့် ဧပြီလမှာ အစ္စလာမ်ဘာသာဝင်တွေရဲ့ ရမ်ဇာန်ဥပုသ်လ ကျရောက်မှာဖြစ်ပြီး အဲဒီနောက်ပိုင်းမှာ ဟဂျ်ဘုရားဖူးကာလ ဖြစ်ပါတယ်။ လက်ရှိ ဆော်ဒီအာရေဗျမှာ COVID-19 ဗိုင်းရပ်စ် ကူးစက်သူ မရှိပေမယ့် အိမ်နီးချင်းနိုင်ငံတစ်ချို့နဲ့ အရှေ့အလယ်ပိုင်းက အခြားနိုင်ငံတစ်ချို့မှာ ကူးစက်မှု သေဆုံးမှုတွေ ရှိလာပါတယ်။

Ref: Metro