၁၄ နှစ်ကြာ ပြင်ဆင်ပြီးနောက် ကမ္ဘာ့ပထမဆုံး ပိရမစ်ကို အီဂျစ်က ပြန်ဖွင့်

မတ် ၆၊ ၂၀၂၀
M-Media

-ကမ္ဘာ့ပထမဆုံး တည်ဆောက်ထားတဲ့ ပိရမစ်ကို ၁၄ နှစ်ကြာ ထိန်းသိမ်းပြုပြင်ခဲ့ပြီးတဲ့နောက် မနေ့မှာ အီဂျစ်က ပြန်လည်ဖွင့်လှစ်လိုက်ပါတယ်။

Djoser Pyramid လို့ အမည်ရပြီး Step Pyramid လို့လည်း ခေါ်တဲ့ အဲဒီ ပိရမစ်ဟာ အီဂျစ်ရဲ့ တတိယမင်းဆက်က ဘုရင် ဂျိုဆာရ်လက်ထက် လွန်ခဲ့တဲ့ နှစ်ပေါင်း ၄၇၀၀ လောက်က တည်ဆောက်ခဲ့တာဖြစ်ပြီး ယူနက်စကိုရဲ့ ကမ္ဘာ့အမွေအနှစ်အဖြစ် သတ်မှတ်ခြင်းခံထားရပါတယ်။

ဆယ်စုနှစ်ချီ မထိန်းသိမ်း၊ မပြုပြင်ဘဲထားတာကြောင့် ပြိုကျမယ့်အန္တရာယ်ကို ရင်ဆိုင်ရတဲ့အတွက် အီဂျစ်အစိုးရဟာ ၂၀၀၆ ခုနှစ်မှာ ပြုပြင်ထိန်းသိမ်းရေး စီမံကိန်းကို စတင်ခဲ့ပါတယ်။ အာဏာရှင် ဟိုစနီမူဘာရက် ပြုတ်ကျသွားတဲ့ ၂၀၁၁ ခုနှစ် လူထုဆန္ဒပြမှုကြောင့် စီမံကိန်းကို ခေတ္တရပ်ဆိုင်းခဲ့ရပြီး ၂၀၁၃ ခုနှစ်မှာ ပြန်လည်စတင်ခဲ့ပါတယ်။ စီမံကိန်းအတွက် ကန်ဒေါ်လာ ၆.၆ သန်း ကုန်ကျခဲ့တာပါ။

“အီဂျစ်ရဲ့ ပထမဆုံးနဲ့ သက်တမ်းအရင့်ဆုံး ပိရမစ်ကို ကျွန်တော်တို့ ပြုပြင်ထိန်းသိမ်းပြီးပါပြီ။ ကမ္ဘာပေါ်က ပထမဆုံးဖြစ်တဲ့ ဒီအဆောက်အဦးကို ကျောက်တုံးသက်သက်နဲ့ တည်ဆောက်ခဲ့တာပါ။ ဒီလိုအဆောက်အဦးကြီးကို နှစ်ပေါင်း ၄၇၀၀ လောက် တည်မြဲအောင် ဘယ်လိုများ တည်ဆောက်ခဲ့လဲဆိုတာကိုကြည့်ပြီး ကျွန်တော်တို့ အံ့ဩမှင်သက်ရပါတယ်” လို့ အီဂျစ် ရှေးဟောင်းနှင့် ခရီးသွားလာရေးဝန်ကြီး ခါလစ် အလ်-အီနာနီက ပိရမစ် ပြန်လည်ဖွင့်ပွဲအခမ်းအနားမှာ ပြောကြားခဲ့ပါတယ်။

ဒီပိရမစ်ကို ကမ္ဘာ့ပထမဆုံး ဗိသုကာပညာရှင်လို့ မှတ်ယူခံရတဲ့ အင်မ်ဟိုတက်ပ်က တည်ဆောက်ခဲ့တာ ဖြစ်ပါတယ်။ သမိုင်းမှာ ကျောက်တုံးနဲ့ဆောက်လုပ်ထားတဲ့ အကြီးဆုံး အဆောက်အဦးဖြစ်ပြီး၊ အကြီးဆုံး ပိရမစ်သင်္ချိုင်းဂူလည်း ဖြစ်ပါတယ်။

ဖွင့်ပွဲအခမ်းအနားကို တက်ရာက်ခဲ့တဲ့ အီဂျစ်ဝန်ကြီးချုပ် မိုစတာဖာ မဒ်ဘူလီက မိမိတို့ဟာ အီဂျစ်နိုင်ငံအသစ်ကို တည်ဆောက်နေပြီး သမိုင်းအမွေအနှစ်တွေကို ထိန်းသိမ်းရေးလုပ်ငန်းက မိမိတို့အစိုးရရဲ့ ထိပ်တန်းဦးစားပေးလုပ်ငန်း ဖြစ်တယ်လို့ ပြောကြားခဲ့ပါတယ်။

Ref: Aljazeera