၁၀ နှစ်အတွင်း သစ်ပင်တစ်သန်းစိုက်ရန်နှင့် စိမ်းလန်းဇုန်များဖော်ဆောင်ရန် စင်ကာပူ စီမံကိန်းချ

မတ် ၆၊ ၂၀၂၀
M-Media

-နောက်ထပ် ၁၀ နှစ်အတွင်း သစ်ပင်ပေါင်း ၁ သန်းလောက် စိုက်ပျိုးပြီး၊ စိမ်းလန်းတဲ့နေရာတွေ ပိုမိုဖော်ဆောင်သွားဖို့ စီမံကိန်းချမှတ်ထားတယ်လို့ စင်ကာပူတာဝန်ရှိသူတွေက ပြောကြားလိုက်ပါတယ်။

“သစ်ပင်ပန်းမာလ်တွေ၊ တိရစ္ဆာန်လေးတွေနဲ့အတူ ယှဉ်တွဲနေထိုင်ကာ စင်ကာပူနိုင်ငံသားတွေ ပိုမိုကောင်းမွန်တဲ့ ဘ၀နေထိုင်မှု ရရှိမယ့် သဘာ၀နိုင်ငံတစ်ခုအဖြစ် စင်ကာပူကို ကျွန်တော်တို့ အသွင်ပြောင်းချင်ပါတယ်။ တကယ်တော့ ရာသီဥတုပြောင်းလဲမှု၊ ဆိုးရွားတဲ့ ရာသီဥတုအခြေအနေတွေနဲ့ မြို့ပြတိုးချဲ့နေမှုတွေကြောင့် ဒီကိစ္စမှာ ကျွန်တော်တို့ ပိုမိုဆောင်ရွက်သွားဖို့ လိုအပ်ပါတယ်” လို့ စင်ကာပူ အမျိုးသား ဖွံ့ဖြိုးတိုးတက်ရေး ဒုတိယဝန်ကြီး ဒက်စမွန်လီက ပြောကြားခဲ့ပါတယ်။

Botanic Gardens ပန်းဥယာဉ်နဲ့ စင်ကာပူမြစ်တို့ကို ဆက်သွယ်မယ့် ၆ ကီလိုမီတာအရှည်ရှိတဲ့ စမ်းလမ်းဇုန်တစ်ခု ဖော်ဆောင်သွားမယ်လို့ စင်ကာပူ အမျိုးသားပန်းခြံများ ဘုတ်အဖွဲ့ NParks က ဖေဖော်ဝါရီလမှာ ကြေငြာခဲ့ပါတယ်။ Istana Park ပန်းခြံကိုလည်း ဘေးပတ်ဝန်းကျင်က စိမ်းလမ်းဇုန်တွေ ပေါင်းထည့်ကာ တိုးချဲ့သွားဖို့ စင်ကာပူက စီစဉ်နေပါတယ်။

စင်ကာပူနိုင်ငံဟာ City in a Garden (ပန်းဥယျာဉ်ထဲကမြို့တော်) ဆိုတဲ့ စီမံကိန်းကနေ City in Nature (သဘာ၀မြို့တော်) ဆိုတဲ့ စီမံကိန်းကို ရည်မှန်းချက် ၄ ရပ်နဲ့ ပြောင်းလဲအကောင်အထည်ဖော်နေတာဖြစ်ပါတယ်။ အဲဒီ ရည်မှန်းချက် ၄ ရပ်က သဘာ၀ ပန်းခြံတွေ ပိုမိုပေါ်ပေါက်လာရေး၊ ရှိပြီးသား ပန်းခြံတွေနဲ့ ပန်းခြံအသစ်တွေမှာ သဘာ၀ဆန်တဲ့အနေအထား ပိုမိုထည့်သွင်းရေး၊ လူလုပ် ပန်းဝန်းကျင်မှာ သဘာ၀တရားကို ပေါင်းစပ်ထည့်သွင်းရေးနဲ့ စိမ်းလန်းဇုန်တွေ ပိုမိုဖော်ဆောင်ရေး ဖြစ်ပါတယ်။

၂၀၃၀ ခုနှစ်ရောက်ရင် သဘာ၀ပန်းခြံဧရိယာ ဟက်တာ ၂၀၀ အထိ ဖြစ်လာရေး ရည်မှန်းထားပါတယ်။

Ref: CNA