နောက်ရွေးကောက်ပွဲမတိုင်ခင် မုဟ်ယစ်ဒင်အစိုးရကို ဖြုတ်ချနိုင်တော့မည်မဟုတ်ဟု မဟာသီယာမိုဟာမက် ဖွင့်ဟ

မတ်​ ၁၁၊ ၂၀၂၀
M-Media

-ဝန်ကြီးချုပ် မုဟ်ယစ်ဒင် ယာစင် ဦးဆောင်တဲ့ လက်ရှိအစိုးရကို လွှတ်တော်မှာ အယုံအကြည်မရှိအဆို တင်သွင်းပြီး ဖြုတ်ချဖို့ မဖြစ်နိုင်တော့ဘူးလို့ မလေးရှားဝန်ကြီးချုပ်ဟောင်း မဟာသီယာ မိုဟာမက်က ပြောကြားလိုက်ပါတယ်။

ပြီးခဲ့တဲ့လအတွင်း ဝန်ကြီးချုပ် မဟာသီဦးဆောင်တဲ့ အာဏာရညွန့်ပေါင်းအဖွဲ့ PH အတွင်း အာဏာအားပြိုင်မှုကြောင့် မဟာသီ ရာထူးက နှုတ်ထွက်ရာကနေ အစိုးရပြိုလဲခဲ့ရပါတယ်။ ဖေဖော်ဝါရီလ ၂၉ ရက်နေ့မှာ လွှတ်တော်အမတ်တွေရဲ့ ထောက်ခံမှုနဲ့ ပြည်ထဲရေးဝန်ကြီးဟောင်း မုဟ်ယစ်ဒင် ယာစင်ကို ဘုရင်က ဝန်ကြီးချုပ်သစ်အဖြစ် ခန့်အပ်ခဲ့ပါတယ်။

လွှတ်တော်အမတ်နေရာ အများစုရထားတဲ့ အတိုက်အခံ နိုင်ငံရေးညွန့်ပေါင်းအဖွဲ့ PH ဟာ လွှတ်တော်ပြန်စတဲ့အခါ ဝန်ကြီးချုပ်ကို အယုံအကြည်မရှိအဆို တင်သွင်း ဖြုတ်ချဖို့ ပြင်ဆင်နေတာပါ။ ဒါပေမယ့် မလေးသတင်းစာ Sinar Harian နဲ့ အင်တာဗျူးမှာ မဟာသီက ဒီအစီအစဉ် အောင်မြင်ဖို့ လမ်းမမြင်ဘူးလို့ ဖြေကြားခဲ့ပါတယ်။

” လွှတ်တော်နေရာအများစုဖြစ်တဲ့ ၁၁၄ နေရာ ကျွန်တော်တို့ ရထားပေမယ့် အခုဆိုရင် ဒီထက်နည်းသွားနိုင်ပါတယ်။ အယုံအကြည်မရှိအဆို အောင်မြင်မှာမဟုတ်ပါဘူး။ ဘာ့ကြောင့်လည်းဆိုတော့ သူက ကျွန်တော့်လူတွေကို သူ့ဘက်ပါအောင် ခေါ်သွားလို့ပါ”

ပုံမှန်လွှတ်တော်အစည်းအဝေးမှာ မတ်လ ၉ ရက်နေ့မှာ စတင်ဖို့ရှိပေမယ့် ဝန်ကြီးချုပ် မုဟ်ယစ်ဒင်က ၂ လနောက်ဆုတ်ခိုင်းထားပါတယ်။ မုဟ်ယစ်ဒင်ဟာ ၂၀၁၈ ခုနှစ်က အာဏာလက်လွှတ်ခဲ့ရတဲ့ UMNO ပါတီ၊ အစ္စလာမ့်မစ် PAS ပါတီတို့နဲ့ ပူးပေါင်းထားပြီး သူ့ရဲ့ အစိုးရအဖွဲ့မှာလည်း ဒီပါတီနှစ်ခုကလူတွေ အများစု ပါဝင်နေတာပါ။

မဟာသီက မုဟ်ယစ်ဒင်အစိုးရဟာ လာမယ့် အထွေထွေရွေးကောက်ပွဲအထိ သက်ဆိုးရှည်လိမ့်မယ်လို့လည်း ထည့်သွင်း ပြောဆိုခဲ့ပါတယ်။

“အခု သူက အစိုးရဖြစ်သွားပြီ။ လူတော်တော်များများကို မက်လုံးပေးခေါ်ထားလို့ရပါပြီ။ ကျွန်တော့်ကိုထောက်ခံသူတစ်ချို့ ဝန်ကြီးတွေဖြစ်လာတာကို ကျွန်တော်တွေ့တယ်။ သူတို့ ဘက်ပြောင်းသွားကြတာပါ”

နိုင်ငံ့ဘဏ္ဍာငွေ အလွဲသုံးစားလုပ်မှု၊ ခြစားမှုတွေနဲ့ တရားစွဲဆိုခြင်းခံထားရတဲ့ ဝန်ကြီးချုပ်ဟောင်း နာဂျစ်ရာဇတ်ဟာ အခုလို အစိုးရ အပြောင်းအလဲဖြစ်လာဖို့အတွက် စီစဉ်ညွှန်ကြားခဲ့တယ်လို့လည်း မဟာသီက စွပ်စွဲခဲ့ပါတယ်။

Ref: CNA