ရုရှားဒုံးခွင်းစနစ်ကို မသုံးလျှင် ပက်ထရီယော့ဒုံးခွင်းစနစ် ရောင်းပေးမည်ဟု တူရကီကို ကန် ကမ်းလှမ်း

မတ် ၁၂၊ ၂၀၂၀
M-Media

-ရုရှားရဲ့ နာမည်ကျော် S-400 ဒုံးခွင်းစနစ်ကို အသုံးမပြုဘူးလို့ ကတိပြုရင် မိမိတို့ရဲ့ ပက်ထရီယော့ ဒုံးခွင်းစနစ်ကို ရောင်းချပေးမယ်လို့ အမေရိကန်က တူရကီကို ကမ်းလှမ်းလိုက်ပါတယ်။

S-400 ဝယ်ယူမယ့်ကိစ္စနဲ့ ပတ်သက်ပြီး အမေရိကန်နဲ့ တူရကီတို့အကြား ပြီးခဲ့တဲ့လတွေမှာ တင်းမာမှုတွေ ဖြစ်ပေါ်ခဲ့တာပါ။ ဒီကိစ္စကြောင့် ပက်ထရီယော့ ဒုံးခွင်းစနစ် ရောင်းချဖို့ ဆွေးနွေးမှု၊ F35 တိုက်လေယာဉ် ရောင်းချမယ့် အစီအစဉ်ကို ကို အမေရိကန်က ပယ်ဖျက်ခဲ့ပါတယ်။ ဒါပေမယ့် အခုကမ်းလှမ်းမှုဟာ အမေရိကန်ရဲ့ သဘောထား ပြောင်းလဲသွားမှုကို ဖော်ပြနေတာပါ။

တူရကီအစိုးရ တာဝန်ရှိသူ ၂ ဦးက အမေရိကန်ရဲ့ ဒီကမ်းလှမ်းမှုကို တူရကီက စဉ်းစားသုံးသပ်နေပေမယ့် S-400 ဒုံးခွင်းစနစ်နဲ့ ပတ်သက်တဲ့ အစီအစဉ်ကို ပြောင်းလဲသွားမှာမဟုတ်ဘဲ လာမယ့်လမှာ စတင်အသုံးပြုသွားမယ်လို့ ရိုက်တာသတင်းဌာနကို ပြောကြားခဲ့ပါတယ်။

အခုနှစ်အတွင်း ဆီးရီးယားနိုင်ငံ အီဒလစ်မြို့ဒေသမှာ တိုက်ပွဲတွေ အကြီးအကျယ် ဖြစ်ပွားပြီးတဲ့နောက် တူရကီ-ဆီးရီးယားနယ်စပ်မှာ ပက်ထရီယော့ဒုံးခွင်းစနစ် ချထားဖို့ အမေရိကန်ကို တူရကီက တောင်းဆိုခဲ့ပါတယ်။ အမေရိကန်ကတော့ တူရကီဟာ S-400 နဲ့ ပက်ထရီယော့ ဒုံးခွင်းစနစ်ကို တစ်ပြိုင်တည်း အသုံးပြုလို့မရဘူးလို့ ပြောကြားခဲ့ပါတယ်။

ဘရပ်ဆဲလ်က ပြန်ရောက်ပြီးတဲ့နောက် လေဆိပ်ကသတင်းရှင်းလင်းပွဲမှာ တူရကီသမ္မတ အာဒိုဂန်က ပက်ထရီယော့ဒုံးခွင်းစနစ် ချထားဖို့ အမေရိကန်ကို မိမိတို့က တောင်းဆိုထားပြီး ဝယ်ဖို့ အဆင်သင့်ပဲလို့ ပြောကြားခဲ့ပါတယ်။

Ref: Aljazeera