COVID-19 ကြောင့် အီတလီတွင်လူသေဆုံးမှု တရုတ်ထက် ပိုမိုများပြားလာ

မတ် ၂၀၊ ၂၀၂၀
M-Media

-COVID-19 ကြောင့် အီတလီမှာ သေဆုံးသူအရေအတွက်ဟာ မနေ့က ၃၄၀၅ ဦးအထိ ရှိလာခဲ့ပြီး ဒါဟာ ဗိုင်းရပ်စ်စတင်ပြန့်နှံ့ရာ တရုတ်နိုင်ငံက သေဆုံးမှုထက် ပိုမိုများပြားသွားတာ ဖြစ်ပါတယ်။

မနေ့ကတစ်ရက်တည်း အီတလီမှာ သေဆုံးသူ ၄၂၇ ဦး ရှိခဲ့တာပါ။ အီတလီဟာ မတ်လ ၁၂ ရက်နေ့ကစလို့ နိုင်ငံကို ၂ ပတ်ကြာ တံခါးပိတ်ခဲ့ပြီး မတ်လ ၂၅ ရက်နေ့မှာ ပြီးဆုံးမယ့် ဒီတံခါးပိတ်မှုကို သက်တမ်းတိုးခဲ့ ပေမယ့် ကူးစက်မှုနဲ့ သေဆုံးမှုအရေအတွက်ကတော့ ဆက်လက်မြင့်တက်နေပါတယ်။ မတ်လ ၁၉ ရက်နေ့အထိ အီတလီမှာ ကူးစက်သူအရေအတွက်ဟာ ၄၁၀၃၅ ဦးရှိနေပါတယ်။

တရုတ်နိုင်ငံမှာ ဗိုင်းရပ်စ်စတင်ပြန့်နှံ့တဲ့ ဒီဇင်ဘာလကစလို့ အခုအချိန်အထိ ကူးစက်သူ ၈၁၀၀၀ ကျော်ရှိပြီး သေဆုံးသူ ၃၂၄၅ ဦး ရှိခဲ့တာပါ။ ဗုဒ္ဓဟူးနေ့မှာတော့ ပထမဆုံး အကြိမ်အဖြစ် ပြည်တွင်းကူးစက်မှု လုံး၀ မရှိတော့ပါဘူး။

အီတလီက တရုတ်နိုင်ငံထက် သေဆုံးသူအရေအတွက် ပိုမိုများပြားလာသလို၊ သေဆုံးမှုနှုန်းလည်း မြင့်မားနေတာ ဖြစ်ပါတယ်။

Ref: BBC