နာမည်ကျော် ဒေလီမုဒိမ်းမှုမှ ကျူးလွန်သူများကို အိန္ဒိယက ကြိုးပေးကွပ်မျက်

မတ် ၂၀၊ ၂၀၂၀
M-Media

-၂၀၁၂ ခုနှစ် ဒေလီမြို့က နာမည်ကျော် အုပ်စုဖွဲ့ အဓမ္မကျင့်သတ်ဖြတ်မှုမှာ ပါဝင်သူ ၄ ဦးကို အိန္ဒိယက ဒီကနေ့မနက်မှာ ကြိုးပေးကွပ်မျက်လိုက်ပါတယ်။

သွားနေတဲ့ ဘတ်စ်ကားပေါ်မှာ အသက် ၂၃ နှစ်အရွယ် ​ဆေးကျောင်းသူတစ်ဦး ရက်ရက်စက်စက် အုပ်စုဖွဲ့အဓမ္မကျင့်ခံရတဲ့သတင်းဟာ ကမ္ဘာကြီးကို တုန်လှုပ်သွားစေခဲ့ပြီး အိန္ဒိယနိုင်ငံရဲ့ တရားရေးစနစ်ကို ဝေဖန်မှုတွေလည်း မြင့်တက်လာခဲ့ပါတယ်။ နောက်ဆက်တွဲအဖြစ် အိန္ဒိယနိုင်ငံတစ်ဝှမ်း အစိုးရဆန့်ကျင်ရေးဆန္ဒပြမှုတွေ ဖြစ်ပေါ်ခဲ့ပြီး အဓမ္မကျင့်မှုနဲ့ဆိုင်တဲ့ ဥပဒေတွေကို အိန္ဒိယအစိုးရက ပိုမိုတင်းကျပ်ခဲ့ပါတယ်။

အဓမ္မကျင့်ခံရသူ အမျိုးသမီးဟာ ရရှိတဲ့ဒဏ်ရာတွေကြောင် သေဆုံးသွားခဲ့ပါတယ်။

ကြိုးပေးကွပ်မျက်ခံရသူတွေဟာ အက်ရှေး သာကူရ်၊ ဗီနေး ရှရ်မာ၊ ပါ၀မ် ဂွပ္ပတာနဲ့ မူကက်ရှ် ဆင်းတို့ဖြစ်ပြီး ၂၀၁၃ ခုနှစ်က သေဒဏ်ချမှတ်ခံခဲ့ရတာပါ။ သူတို့ကို ကြိုးပေးကွပ်မျက်မှုဟာ ၂၀၁၅ ခုနှစ်နောက်ပိုင်း အိန္ဒိယမှာ ပထမဆုံး ကွပ်မျက်မှုလည်း ဖြစ်ပါတယ်။

ဒီအဖြစ်အပျက်အတွင်း ကျူးလွန်သူ ၆ ဦးကို ဖမ်းဆီးခဲ့ပြီး အဲဒီထဲက ရမ်ဆင်းဆိုသူကို ၂၀၁၃ ခုနှစ်မတ်လက​ ထောင်ထဲမှ ာသေဆုံးလျက်တွေ့ခဲ့ရပါတယ်။ ရဲတပ်ဖွဲ့ကတော့ ဒါဟာ မိမကိုယ်ကို သတ်သေမှုဖြစ်တယ်လို့ ပြောကြားခဲ့ပါတယ်။ ကျူးလွန်ချိန်မှာ အသက် ၁၇ နှစ်သာရှိသေးတဲ့ အခြားတစ်ဦးက လူငယ်ပြုပြင်ရေးကျောင်းမှာ ၃ နှစ် ပြစ်ဒဏ်ခံခဲ့ရပြီး ၂၀၁၅ ခုနှစ်မှာ ပြန်လည်လွတ်မြောက်လာခဲ့ပါတယ်။

တရားမျှတမှု ရပြီ

ကျူးလွန်ခံရသူရဲ့ မိသားစုကတော့ ပြစ်ဒဏ်အတွက် ကျေနပ်တယ်လို့ ပြောကြားခဲ့ပါတယ်။

“ကျွန်မသမီးရဲ့ဓာတ်ပုံကို ကျွန်မဖက်ထားပြီး နောက်ဆုံးတော့ တရားမျှတမှု ရခဲ့ပြီသမီးရေလို့ ပြောလိုက်ပါတယ်” လို့ ကြိုးပေးကွပ်မျက်ပြီးတဲ့နောက် မိခင်က ပြောကြားခဲ့ပါတယ်။

ဖခင်ဖြစ်သူကလည်း အိန္ဒိယရဲ့ တရားရေးစနစ်အပေါ် ယုံကြည်မှု ပြန်ရရှိခဲ့ပြီလို့ ဆိုပါတယ်။

မကွပ်မျက်ခင် ဒေလီက လုံခြုံရေးမြင့် တီဟာရ်အကျဉ်းထောင်တစ်ဝိုက်မှာ လုံခြုံရေး ထူထပ်စွာချထားခဲ့ပါတယ်။ အဓမ္မကျင့်မှုကို ဆန့်ကျင်သူတွေကလည်း ထောင်အပြင်မှာ စုရုံးခဲ့ပြီး ကွပ်မျက်လိုက်ပြီလို့ သတင်းထုတ်ပြန်တဲ့အခါမှာ အောင်ပွဲခံခဲ့ကြပါတယ်။

၂၀၁၂ ခုနှစ်က ဒေလီမှာဖြစ်ပွားခဲ့တဲ့ ဒီအုပ်စုဖွဲ့ အဓမ္မကျင့်မှုကြောင့် ဥပဒေတွေ၊ ပြစ်ဒဏ်တွေကို ပိုမိုတင်းကြပ် တိုးမြှင့်ခဲ့ပေမယ့် အိန္ဒိယနိုင်ငံမှာ အမျိုးသမီးတွေအပေါ် အကြမ်းဖက်မှုဟာ လျော့မသွားဘူးလို့ အချက်အလက်တွေအရ သိရပါတယ်။ အမျိုးသားရာဇဝတ်မှုမှတ်တမ်းဗျူရိုရဲ့ မကြာသေးခင်က ထုတ်ပြန်ချက်မှာ ၂၀၁၈ ခုနှစ်အတွင်း အိန္ဒိယနိုင်ငံတစ်ဝှမ်း အဓမ္မကျင့်မှု ၃၃၉၇၇ မှုရှိခဲ့ပြီး တစ်ရက်ကို ပျမ်းမှ ၉၃ မှု ဖြစ်ပွားနေတာ ဖြစ်ပါတယ်။

Ref: BBC