COVID-19 ကပ်ရောဂါအတွင်း ပြည်သူများလိုအပ်ချက်အားလုံးကို ဖြည့်ဆည်းပေးမည်ဟု ဆော်ဒီဘုရင် အာမခံ

မတ် ၂၁၊ ၂၀၂၀
M-Media

-လက်ရှိရင်ဆိုင်နေရတဲ့ COVID-19 ပြဿနာကို ရင်ဆိုင်တွန်းလှန်နိုင်ရေး လိုအပ်တာတွေအားလုံးကို လုပ်ဆောင်သွားမှာဖြစ်ပြီး၊ ပြည်သူတွေအတွက် ဆေးဝါး၊ အစားအသောက်နဲ့ နေထိုင်ရေးလိုအပ်ချက်တွေကိုလည်း ဖြည့်ဆည်းပေးသွားမယ်လို့ ဆော်ဒီဘုရင် ဆလ်မန် ဘင် အဘ်ဒူလ် အဇစ်က ပြောကြားလိုက်ပါတယ်။

ဆော်ဒီမှာ လက်ရှိ ဗိုင်းရပ်စ်ကူးစက်သူအရေအတွက် ၂၇၄ ဦးအထိ ရှိလာပြီး၊ သေဆုံးမှုတော့ မရှိသေးပါဘူး။ ဗိုင်းရပ်စ်ပြန့်နှံ့မှု တားဆီးရေးလုပ်ငန်းကိုလည်း အစိုးရက တိုးမြှင့်လုပ်ဆောင်လာပြီး ပြည်တွင်း လေကြောင်းလိုင်း၊ ရထားလိုင်း၊ ကာလိုင်းနဲ့ တက္ကဆီပြေးဆွဲမှုတွေကိုလည်း ၁၄ ရက် ပိတ်ထားပါတယ်။

ကြာသာပတေးနေ့ ရုပ်သံကပြောကြားတဲ့ မိန့်ခွန်းမှာ ဘုရင်ဆလ်မန်က ဒီကပ်ရောဂါကို တွန်းလှန်နိုင်ဖို့အတွက် ကြိုတင်ကာကွယ်ရေး လုပ်ငန်းတွေအားလုံးကို ဆက်လက်လုပ်ဆောင်သွားမယ်လို့ ပြောကြားခဲ့ပါတယ်။

“ဘုရားသခင်ရဲ့ အကူအညီ၊ ဒီအခက်အခဲတွေကို မဆုတ်မနစ် ကြံ့ကြံ့ခံရင်ဆိုင်သွားမယ်ဆိုတဲ့ ပြည်သူတွေရဲ့ ခိုင်မာတဲ့ ဆုံးဖြတ်ချက်တွေ ထပ်ပိုးကာ ကျွန်တော်တို့ လုပ်နိုင်တာအားလုံး အပြည့်အ၀လုပ်ဆောင်သွားမှာ ဖြစ်ပါတယ်။ ဒီလို ခက်ခဲတဲ့ အခြေအနေကို ရင်ဆိုင်နေရစဉ်အတွင်း ပြည်သူလူထုရဲ့ အင်အား၊ ကြံ့ကြံ့ခံရင်ဆိုင်မှု၊ ခိုင်မာတဲ့ ဆုံးဖြတ်ချက်တွေ၊ သက်ဆိုင်ရာ အစိုးရအေဂျင်စီတွေနဲ့ ပူးပေါင်းဆောင်ရွက်မှုတွေဟာ အစိုးရရဲ့ ရည်မှန်းချက်တွေ၊ လုပ်ဆောင်ချက်တွေ အောင်မြင်ရေးမှာ အရေးပါတဲ့၊ အထောက်အကူဖြစ်စေတဲ့ အချက်တွေ ဖြစ်ပါတယ်။ ပြည်သူလူထု ကျန်းမာကြံ့ခိုင်ရေးကို ဦးထိပ်ပန်ဆင်ကာ အစိုးရက ဘေးအန္တရာယ်ကင်းအောင် အဓိကထား လုပ်ဆောင်ပေးနေပါတယ်”

နိုင်ငံသားတွေ၊ တိုင်းပြည်အတွင်းမှာ ရှိနေသူတွေရဲ့ ကျန်းမာရေးအပြင် အစားအသောက်၊ ဆေးဝါး၊ နေရေးထိုင်ရေး လိုအပ်ချက်တွေအားလုံးကို အစိုးရက ဖြည့်ဆည်းပေးသွားမယ်လို့လည်း ဘုရင်ဆလ်မန်က ထည့်သွင်းပြောဆိုခဲ့ပါတယ်။

COVID-19 တိုက်ဖျက်ရေးမှာ ပါဝင်ဆောင်ရွက်နေကြတဲ့ အစိုးရဝန်ထမ်းတွေ၊ အထူးသဖြင့် ကျန်းမာရေးဝန်ထမ်းတွေအားလုံးကို ဘုရင်က ကျေးဇူးတင်ခဲ့ပြီး၊ မကြာခင်ရင်ဆိုင်ရမယ့် အခြေအနေဟာ လက်ရှိအနေအထားထက် ပိုမိုခက်ခဲလိမ့်မယ်လို့လည်း သတိပေးခဲ့ပါတယ်။

အရှေ့အလယ်ပိုင်းဒေသမှာ အီရန်နိုင်ငံဟာ ဗိုင်းရပ်စ် အဆိုးဝါးဆုံး ကူးစက်ပြန့်နှံ့ရာနေရာဖြစ်နေပြီး အခြားနိုင်ငံတွေမှာလည်း ကူးစက်သ၊ သေဆုံးသူတွေ မြင့်တက်လာနေပါတယ်။

Ref: Alarabiya