COVID-19 ရှိ၊ မရှိ ၄၅ မိနစ်အတွင်းသိရမည့် စမ်းသပ်ကိရိယာတစ်ခုကို မကြာခင် အသုံးပြုနိုင်တော့မည်

မတ် ၂၂၊ ၂၀၂၀
M-Media

-COVID-19 ရှိ၊ မရှိကို ၄၅ မိနစ်အတွင်း သိနိုင်မယ့် စမ်းသပ်ကိရိယာတစ်ခုကို မြေပြင်မှာ စတင်စမ်းသပ်အသုံးပြုဖို့အတွက် အမေရိကန် အစားအသောက်နှင့် ဆေးဝါးကွပ်ကဲရေးဌာန FDA က ခွင့်ပြုလိုက်ပါတယ်။

ဒီကိရိယာကို Cepheid ဆိုတဲ့ကုမ္ပဏီက ထုတ်လုပ်တာပါ။ ဆေးရုံတွေ၊ အရေးပေါ်ဌာနတွေမှာ စတင် စမ်းသပ် အသုံးပြုမှာဖြစ်ပြီး FDA ကလည်း ခွင့်ပြုချက်ပေးခဲ့ပြီလို့ ကုမ္ပဏီရဲ့ မနေ့ကထုတ်ပြန်ချက်မှာ ဖော်ပြထားပါတယ်။ ကိရိယာတွေကို ​လာမယ့်တစ်ပတ်မှာ စမ်းသပ်မယ့်နေရာတွေဆီ ပို့ဆောင်မှာဖြစ်ပါတယ်။

လက်ရှိမှာ သံသယရှိသူတွေထံကနေ နှာခေါင်းတို့ဖတ် နမူနာယူကာ ဓာတ်ခွဲခန်းကို ပို့ဆောင် စစ်ဆေးရတာကြောင့် စမ်းသပ်မှုဟာ ရက်အနည်းငယ် ကြာမြင့်တတ်ပါတယ်။ Cepheid က ထုတ်တဲ့ အခုကိရိယာက ၄၅ မိနစ်အတွင်း အဖြေထုတ်နိုင်မှာဖြစ်ပြီး ကိုင်တွယ်အသုံးပြုမယ့်သူတွေမှာ ဆေးဖက်ဆိုင်ရာ အထူးကျွမ်းကျင်မှုတွေ မလိုအပ်ပါဘူး။

ဒီကိရိယာအသုံးပြုမှုအတွက် ကုန်ကျစားရိတ် ဘယ်လောက်ရှိမလဲဆိုတာကို Cepheid ကုမ္ပဏီက ထုတ်ပြန်ခြင်း မရှိပါဘူး။

Ref: Reuters