အိန္ဒိယတွင် ဆစ်ခ်ဘုန်းကြီးတစ်ပါး ကိုရိုနာဗိုင်းရပ်စ်ဖြင့်သေဆုံး

မတ် ၂၈၊ ၂၀၂၀
M-Media

-ကိုရိုနာဗိုင်းရပ်စ်ကြောင့် ဆစ်ခ်ဘုန်းကြီးတစ်ပါး ကွယ်လွန်ပြီးတဲ့နောက် အနည်းဆုံး လူတစ်သောင်းခွဲလောက်ကို အိန္ဒိယက ရောဂါ​ခြေချုပ်ချကာ သီးခြားခွဲထား စောင့်ကြည့်နေပါတယ်။

အသက် ၇၀ အရွယ် ဆစ်ခ်ဘုန်းကြီး ဘာလ်ဒက်ဗ်ဆင်းဟာ ဗိုင်းရပ်စ်ပြန့်နှံ့ရာ အီတလီနဲ့ ဂျာမနီနိုင်ငံတို့ကနေ ​မကြာသေးမီက ပြန်လာခဲ့သူပါ။ အစိုးရက ​သီးခြားနေထိုင်ဖို့ ညွှန်ကြားမှုကို ဆင်းနဲ့ အနီးကပ်လူယုံ ၂ ဦးတို့က နားမထောင်ဘဲ ပန်ဂျပ်ပြည်နယ်က ရွာတွေကို လှည့်လည်ပြီး တရားဟောခဲ့ပါတယ်။

အဲဒီခရီးစဉ်အတွင်းမှာပဲ ဆင်းဟာ နေထိုင်မကောင်းဖြစ်ကာ ကွယ်လွန်ခဲ့တာပါ။ ဆင်းနဲ့ ဆက်နွယ်ပတ်သက်ခဲ့သူ ၁၉ ဦးမှာလည်း ဗိုင်းရပ်စ်ရှိနေကြောင်း တွေ့ခဲ့ရပြီး နောက်ထပ် ၂၀၀ ကျော်ကိုလည်း စစ်ဆေးထားပါတယ်။ ​ဆင်းသွားခဲ့တဲ့ ရွာ ၁၅ ရွာကို အာဏာပိုင်တွေက လက်ရှိမှာ ပိတ်ထားပြီး လူပေါင်း ၁၅၀၀၀ ကနေ ၂၀၀၀၀ ကြားလောက်ကို စောင့်ကြည့်နေပါတယ်။

အိန္ဒိယဟာ ပြီးခဲ့တဲ့ ကြာသာပတေးနေ့ကစလို့ နိုင်ငံကို ၃ ပတ်ကြာ တံခါးပိတ်ခဲ့ပြီး၊ ပြည်သူတွေ လှုပ်ရှားသွားလာမှုကိုလည်း ကန့်သတ်ထားပါတယ်။ နိုင်ငံအတွင်း ကူးစက်သူအရေအတွက်ဟာ ၉၁၈ ဦးရှိပြီး သေဆုံးသူက ၂၀ ရှိနေပါတယ်။

Ref: Aljazeera