COVID-19 တားဆီးရေး ဆောင်ရွက်မှု အလုပ်ဖြစ်သည်ဟု မလေးရှားပြော

ဧပြီ ၁၊ ၂၀၂၀
M-Media

-COVID-19 တိုက်ဖျက်ရေး အစိုးရရဲ့ ဆောင်ရွက်ချက်တွေဟာ ထိရောက်မှုရှိတယ်ဆိုတဲ့ လက္ခဏာတွေ စတင်မြင်လာရပြီလို့ မလေးရှား ကျန်းမာရေးဝန်ကြီးဌာန ညွှန်ကြားရေးမှူးချုပ် နူရ် ဟီရှမ် အဘ်ဒူလာက ဒီကနေ့မှာ ပြောကြားလိုက်ပါတယ်။

မလေးရှားမှာ ဒီကနေ့ ကူးစက်သူအရေအတွက်ဟာ ၁၄၂ ဦး ရှိခဲ့ပြီး စုစုပေါင်း ၂၉၀၈ ဦး ဖြစ်လာတာပါ။ သေဆုံးသူကတော့ စုစုပေါင်း ၄၅ ယောက်ရှိပါတယ်။

အစိုးရဟာ နိုင်ငံကို မတ်လအလယ်လောက်ကတည်းက တံခါးပိတ်ကာ လှုပ်ရှားသွားလာမှုကန့်သတ်မိန့် ထုတ်ပြန်ထားပါတယ်။

မလေးရှား စီးပွားရေးသုတေသန အင်စတီကျုက ထုတ်ပြန်ထားတဲ့ ဗိုင်းရပ်ကူးစက်မှု ဇယားအရ အစိုးရရဲ့ ဆောင်ရွက်ချက်တွေ ထိရောက်မှုရှိတယ်ဆိုတာကို တွေ့ရတယ်လို့ နူရ်ဟီရှမ်က ပြောကြားခဲ့ပါတယ်။

“ဇယားကိုကြည့်ရင် ကြိုတင်တွက်ချက်ထားမှုနဲ့ အမှန်တကယ်ကူးစက်မှု ပမာဏကို တွေ့ရမယ်။ ဇယားမှာ အမှန်တကယ်ကူးစက်မှုမြားက တစ်ဖြည်းဖြည်းနဲ့ ထိုးဆင်းလာတယ်ဆိုတာ တွေ့ရမှာပါ။ ကျွန်တော်တို့ ဝန်ကြီးဌာနနဲ့ အစိုးရအေဂျင်စီတွေအားလုံးရဲ့ ဆောင်ရွက်မှုတွေ အလုပ်ဖြစ်တာကို ပြနေတာပါ။ ဘာပဲဖြစ်ဖြစ် နောက်ထပ် ၂ ပတ်ဟာ အခြေအနေ တိုးတက်မှုရှိလားဆိုတာကို ဆုံးဖြတ်ဖို့ အရေးပါတဲ့ကာလ ဖြစ်ပါလိမ့်မယ်”

ဧပြီလ ၁၄ ရက်နေ့အထိ သက်တမ်းတိုးထားတဲ့ လှုပ်ရှားသွားလာမှု ကန့်သတ်မိန့်ကို လိုက်နာကြဖို့လည်း နူရ်ဟီရှမ်က ပြည်သူတွေကို တိုက်တွန်းခဲ့ပါတယ်။

မလေးရှာမှာ COVID-19 ကူးစက်ရာကနေ ပြန်လည်ကောင်းမွန်လာသူအရေအတွက်ဟာ ၆၄၅ ဦးရှိပြီး ဒါဟာ စုစုပေါင်းကူးစက်မှုရဲ့ ၂၂ ရာခိုင်နှုန်း ဖြစ်ပါတယ်။

Ref: CNA