COVID-19 ကူးစက်မှု လုံး၀မရှိဟု မြောက်ကိုရီးယား ကြေငြာ

ဧပြီ ၃၊ ၂၀၂၀
M-Media

-မိမိတို့နိုင်ငံမှာ COVID-19 ကူးစက်မှု လုံး၀မရှိဘူးလို့ မြောက်ကိုရီးယားက ဒီကနေ့မှာ ကြေငြာလိုက်ပါတယ်။

တရုတ်နဲ့ အနီးကပ် အဆက်အသွယ်ရှိတဲ့​ မြောက်ကိုရီးယားမှာ ကျန်းမာရေး စောင့်ရှောက်မှုစနစ် အားနည်းတာကြောင့် ကိုရိုနာဗိုင်းရပ်စ် ကူးစက်သူတွေ၊ သေဆုံးသူတွေ ရှိနိုင်တယ်လို့ နိုင်ငံတကာ ကျွမ်းကျင်သူတွေက ခန့်မှန်းထားကြပါတယ်။ တောင်ကိုရီးယားဖက်ကို ဘက်ပြောင်းလာသူတွေကလည်း မြောက်ကိုရီးယား အစိုးရဟာ ကူးစက်မှုကို ဖုံးကွယ်ထားတယ်လို့ စွပ်စွဲခဲ့ကြပါတယ်။

ပထမဆုံး ကူးစက်မှုဖြစ်ပေါ်တယ်လို့ တရုတ်က သတင်းထုတ်ပြန်ခဲ့တဲ့ ဇန်နဝါရီလ အစောပိုင်းမှာပဲ မြောက်ကိုရီးယားက နယ်စပ်တွေကို ပိတ်ပစ်လိုက်ပြီး ဗိုင်းရပ်စ်ကာကွယ်ရေးလုပ်ငန်းတွေကို တိုးမြှင့်လုပ်ဆောင်ခဲ့ပါတယ်။

မြောက်ကိုရီးယား ကပ်ရောဂါတိုက်ဖျက်ရေးဌာနက ညွှန်ကြားရေးမှူး ပက်မြွန်ဆုက သူတို့ရဲ့ဆောင်ရွက်ချက်တွေဟာ အောင်မြင်တယ်လို့ မနေ့မှာ ပြောကြားခဲ့ပါတယ်။

“အခုအချိန်အထိ တိုင်းပြည်မှာ ကိုရိုနာဗိုင်းရပ်စ်ကူးစက်သူ တစ်ဦးမှ မရှိသေးပါဘူး။ တိုင်းပြည်ကို ဝင်ရောက်လာသူမှန်သမျှကို စစ်ဆေးပြီး၊ သီးခြားခွဲထားတာ၊ ကုန်ပစ္စည်းတွေကို ပိုးသတ်တာ၊ နယ်စပ်တွေပိတ်တာ၊ လေကြောင်းနဲ့ ရေကြောင်း ဝင်ပေါက်တွေကို ပိတ်ထားတာတွေလို ကြိုတင်ကာကွယ်ရေးလုပ်ငန်းတွေကို ကျွန်တော်တို့ လုပ်ဆောင်ခဲ့ပါတယ်”

COVID-19 ဗိုင်းရပ်စ်ဟာ လက်ရှိ ကမ္ဘာ့ နိုင်ငံပေါင်း ၁၈၈ နိုင်ငံက လူပေါင်း ၁ သန်းကျော်လောက်ကို ကူးစက်နေပြီး သေဆုံးသူကလည်း ၅ သောင်းကျော်လာပြီဖြစ်ပါတယ်။ မြောက်ကိုရီးယားနဲ့ ကပ်နေတဲ့ တရုတ်၊ တောင်ကိုရီးယားနဲ့ ဂျပန်နိုင်ငံတို့ဟာ ကူးစက်မှုဒဏ်ကို ဆိုးဆိုးဝါးဝါး ခံစားနေရပါတယ်။

Ref: CNA