COVID-19 ကူးစက်မှုကို တားဆီးရန် မက္ကာနှင့် မဒီနာတွင် ၂၄ နာရီ ကာဖျူးထုတ်

ဧပြီ ၃၊ ၂၀၂၀
M-Media

-အစ္စလာမ်သာသနာရဲ့ မြင့်မြတ်ရာနေရာတွေရှိရာ မက္ကာနဲ့ မဒီနာ မြို့နှစ်မြို့ကို ဆော်ဒီက မနေ့မှာ တစ်ရက်တာ ညမထွက်ရအမိန့် (ကာဖျူး) ထုတ်ပြန်ခဲ့ပါတယ်။

ပြည်ထဲရေးဝန်ကြီးဌာန ပြောရေးဆိုခွင့်ရှိသူ ဗိုလ်မှူးကြီး တာလာလ် အလ်-ရှာဟုဘ်က ဒီလိုထုတ်ပြန်မှုဟာ ဒီမြို့နှစ်မြို့မှာရှိတဲ့ ပြည်သူတွေကို COVID-19 ဘေးအန္တရာယ်ကနေ ကာကွယ်ဖို့ဖြစ်တယ်လို့ ပြောကြားခဲ့ပါတယ်။

ညမထွက်ရအမိန့်အရ အရွယ်ရောက်ပြီးသားသူတွေဟာ ကျန်းမာရေးနဲ့ အစားအသောက်ကိစ္စလို အရေးပေါ် အခြေအနေတွေအတွက် မနက် ၆ နာရီကနေ ညနေ ၃ နာရီအတွင်းသာ အပြင်ထွက်ခွင့်ရမှာပါ။ ကားနဲ့သွားမယ်ဆိုရင်လည်း ယာဉ်မောင်းနဲ့ အခြားတစ်ဦးသာ စီးနင်းခွင့်ရမှာ ဖြစ်ပါတယ်။

မရှိမဖြစ် လုပ်ငန်းတွေမှာ လုပ်ကိုင်နေတဲ့ အစိုးရဝန်ထမ်းတွေ၊ ပုဂ္ဂလိကဝန်ထမ်းတွေအပေါ်မှာတော့ ဒီအမိန့်က သက်ရောက်မှာ မဟုတ်ပါဘူး။ ဆေးဆိုင်တွေ၊ စူပါမားကတ်တွေ၊ ဓာတ်ဆီဆိုင်နဲ့ ဘဏ်လုပ်ငန်းတွေကလွဲလို့ မြို့နှစ်မြို့မှာရှိတဲ့ စီးပွားရေးလုပ်ငန်းအားလုံးကိုလည်း အာဏာပိုင်တွေက ရပ်ဆိုင်းထားပါတယ်။

အလ်-ရှာဟုဘ်က အစားအသောက်နဲ့ အိမ်သုံးပစ္စည်းတွေအတွက် ဖုန်းအက်ပလီကေးရှင်းအသုံးပြုကာ ဝယ်ယူကြဖို့ ပြည်သူတွေကို တိုက်တွန်းခဲ့ပါတယ်။

ဆော်ဒီမှာ COVID-19 ကူးစက်သူ စုစုပေါင်း ၁၈၈၅ ဦးရှိပြီး သေဆုံးသူက ၂၁ ဦး ရှိပါတယ်။ ပျောက်ကင်း သက်သာသွားသူအရေအတွက်က ၃၂၈ ဦးရှိပါတယ်။ ကူးစက်မှုဟာ မက္ကာမှာ ၄၈ ခု၊ မဒီနာမှာ ၄၆ ခု အသီးသီးရှိနေတာပါ။

Ref: Arab News