မလေးရှားက ရွေ့လျားသွားလာမှု ကန့်သတ်မိန့်ကို ဧပြီလ ၂၈ ရက်နေ့အထိ သက်တမ်းတိုး

ဧပြီ ၁၀၊ ၂၀၂၀
M-Media

-တစ်နိုင်ငံလုံး ရွေ့လျားသွားလာမှု ကန့်သတ်မှုကို ဧပြီလ ၂၈ ရက်နေ့အထိ နောက်ထပ် ၂ ပတ် ထပ်မံ သက်တမ်းတိုးလိုက်တယ်လို့ မလေးရှားဝန်ကြီးချုပ် မုဟ်ယစ်ဒင် ယာစင်က ဒီကနေ့မှာ ကြေငြာလိုက်ပါတယ်။

မလေးရှားဟာ မတ်လ အလယ်ပိုင်းကတည်းက နိုင်ငံကို တံခါးပိတ်ကာ ရွေ့လျားသွားလာမှု ကန့်သတ်မိန့် ထုတ်ပြန်ထားတာဖြစ်ပြီး မတ်လ နှောင်းပိုင်းက တစ်ကြိမ်၊ အခုတစ်ကြိမ် ၂ ကြိမ်တိုင်တိုင် ၂ ပတ်စီ သက်တမ်းတိုးခဲ့တာ ဖြစ်ပါတယ်။

ဝန်ကြီးချုပ် မုဟ်ယစ်ဒင်က တစ်ချို့နိုင်ငံတွေမှာ ဒီကန့်သတ်မိန့် အဆုံးသတ်ပြီးတဲ့နောက် ရောဂါ ပြန်လည်ကူးစက်တာတွေ ရှိနေတဲ့အတွက် စောစောစီးစီး မရုပ်သိမ်းဖို့ ကမ္ဘာ့ကျန်းမာရေးအဖွဲ့ WHO ရဲ့ တိုက်တွန်းချက်အရ ဧပြီလ ၂၈ ရက်နေ့အထိ သက်တမ်းတိုးလိုက်တာ ဖြစ်တယ်လို့ ရုပ်သံမိန့်ခွန်းမှာ ပြောကြားခဲ့ပါတယ်။

“ဒီအခြေအ​နေအတွက် လအနည်းငယ်လောက် ကျွန်တော်တို့ ပြင်ဆင်ရမယ်။ ဒီကပ်ရောဂါကြီးကို ရာနှုန်းပြည့် ကျော်လွှားနိုင်ပြီဆိုတာ သေချာတဲ့အထိ ကန့်သတ်မှု ဆက်ရှိနိုင်ပါတယ်”

ရွေ့လျားသွားလာမှု ကန့်သတ်မိန့်ကြောင့် ရောဂါကူးစက်မှု ကျဆင်းတာကို တွေ့ရပြီး WHO ရဲ့ ပျမ်းမျှတွက်ချက်မှု ၁၀ ရာခိုင်နှုန်းရဲ့အောက် ၇ ရာခိုင်နှုန်းသာ ရှိတယ်လို့လည်း မုဟ်ယစ်ဒင်က ထည့်သွင်းပြောဆိုခဲ့ပါတယ်။ သေဆုံးမှုအတွက် WHO ရဲ့ ပျမ်းမျှတွက်ချက်မှုက ၅.၈ ရာခိုင်နှုန်းဖြစ်ပြီး မလေးရှားမှာ သေဆုံးမှုဦးရေက ၁.၆ ရာခိုင်နှုန်းသာ ရှိပါတယ်။

မလေးရှားမှာ ဧပြီလ ၉ ရက်နေ့အထိ ကူးစက်သူအရေအတွက် ၄၀၀၀ ကျော် သေဆုံးသူ ၆၀ ကျော် ရှိနေပါတယ်။

Ref: CNA