ဧပြီ ၁၀၊ ၂၀၂၀
M-Media

ဖိလစ်ပိုင်တွင် သေဆုံးသူ ၂၂၁ ဦး ရှိလာ

ဖိလစ်ပိုင်မှာ ဒီကနေ့ ဗိုင်းရပ်စ်ထပ်မံကူးစက်သူ ၁၁၉ ဦး သေဆုံးသူ ၁၈ ဦး ရှိခဲ့ပါတယ်။ ဒါ့ကြောင့် သေဆုံးသူ ၂၂၁ ဦး၊ ကူးစက်သူ ၄၁၉၅ ဦး ရှိလာတာပါ။ ပြန်လည်ကောင်းမွန်သူ အရေအတွက်က ၁၄၀ ရှိနေပါတယ်။ ဖိလစ်ပိုင်ဟာ လူနေထူထပ်ရာ လူဇွန်ကျွန်းမှာ လှုပ်ရှားသွားလာမှုကန့်သတ်မိန့် ထုတ်ပြန်ထားပါတယ်။

ဂျကာတာတွင် အပြင်းထန်ဆုံး ကန့်သတ်မှု ပြလုပ်

အင်ဒိုနီးရှားနိုင်ငံ မြို့တော် ဂျကာတာမှာ ဧပြီ ၁၀ ရက်နေ့ (ဒီကနေ့) ကစပြီး အတင်းကြပ်ဆုံး ရွေ့လျားသွားလာမှု ကန့်သတ်မိန့်ကို ထုတ်ပြန်လိုက်ပါတယ်။ လူ သန်း ၃၀ လောက်နေထိုင်တဲ့ ဂျကာတာဟာ ဗိုင်းရပ်စ် ကူးစက်ပြန့်နှံ့မှု အမြင့်ဆုံးနေရာဖြစ်ပါတယ်။ ပြည်သူတွေကို အိမ်တွေမှာနေထိုင်ဖို့ တိုက်တွန်းထားသလို ဗလီတွေနဲ့ ဘာသာရေးအဆောက်အဦးတွေကိုလည်း နောက်ထပ် ၂ ပတ်အထိ ပိတ်ခိုင်းထားပါတယ်။ အမိန့်ကို ချိုးဖောက်သူတွေကို ထောင်ဒဏ်တစ်နှစ် ဒါမှမဟုတ် ကြီးလေးတဲ့ဒဏ်ငွေ ချမှတ်မယ်လို့လည်း သတိပေးထားပါတယ်။ မနေ့ကအထိ ဗိုင်းရပ်ကူးစက်သူ ၃၂၃၉ ဦး၊ သေဆုံးသူ ၂၈၀ ဦး ရှိနေပါတယ်။

အရှေ့တီမောတွင် ဒုတိယမြောက်ကူးစက်သူကို တွေ့ရှိ

အရှေ့တီမောနိုင်ငံမှာ ဒုတိယမြောက် ကူးစက်နေသူ တွေ့ရတယ်လို့ အာဏာပိုင်တွေက ဒီကနေ့မှာ ကြေငြာခဲ့ပါတယ်။ ကူးစက်သူဟာ အင်ဒိုနီးရှားနိုင်ငံ အနောက်တီမောကို ခရီးသွားခဲ့သူပါ။ လူဦးရေ ၁.၃ သန်းရှိတဲ့ အရှေ့တီမောမှာ မတ်လ ၂၁ ရက်နေ့က ပထမဆုံးကူးစက်သူကို တွေ့ခဲ့ရပြီး အခုအချိန်မှာတော့ ဗိုင်းရပ်စ်ကင်းစင်သွားပြီ ဖြစ်ပါတယ်။

ထိုင်းနိုင်ငံတွင်လည်း ကူးစက်မှု မြင့်တက်နေ

ထိုင်းနိုင်ငံမှာ ဒီကနေ့ ထပ်မံကူးစက်သူ ၅၀ ဦး၊ သေဆုံးသူ ၁ ဦး ရှိခဲ့ပါတယ်။ ၂၇ ဦးဟာ အရင်ကူးစက်ထားသူတွေနဲ့ ဆက်စပ်နေပြီး ၃ ဦးက နိုင်ငံခြားကနေ ကူးစက်လာတာဖြစ်ပါတယ်။ အခြား ၈ ဦးရဲ့ ကူးစက်မှုကိုတော့ ဖော်ထုတ်နေဆဲဖြစ်ပါတယ်။ ထိုင်းနိုင်ငံမှာ စုစုပေါင်း ကူးစက်သူအရေအတွက်ဟာ ၂၄၇၃ ဦး ရှိပြီး၊ သေဆုံးသူက ၃၃ ဦး ရှိပြီ ဖြစ်ပါတယ်။ ပြန်လည်ကောင်းမွန်သူအရေအတွက်ကတော့ ၁၀၁၃ ဦးရှိပါတယ်။

စင်ကာပူရှိ နိုင်ငံခြားအလုပ်သမားတန်းလျားတွင် ဗိုင်းရပ်စ်ကူးစက်သူ ရာချီရှိနေ

စင်ကာပူမှာ မနေ့က ကူးစက်သူဦးရေဟာ ၂၈၇ ဦးရှိခဲ့ပြီး ဒါဟာ တစ်နေ့တာကူးစက်မှု အမြင့်ဆုံးပမာဏလည်း ဖြစ်ပါတယ်။ ဗုဒ္ဓဟူးနေ့ကလည်း ကူးစက်သူ ၁၂၄ ဦးရှိခဲ့ပြီး ကူးစက်သူအများစုဟာ နိုင်ငံခြားအလုပ်သမားတွေနေထိုင်ရာ တန်းလျားတွေက ဖြစ်ပါတယ်။ ဒါ့ကြောင့် စုစပေါင်း ကူးစက်မှုဟာ ၁၉၁၀ ဦး ရှိလာပြီး ၃၁၄ ဦးက ပြန်လည် သက်သာသွားပြီဖြစ်ပါတယ်။ သေဆုံးသူကတော့ ၆ ဦး ရှိပါတယ်။ ကူးစက်မှုဖြစ်နေတဲ့ အလုပ်သမားတန်းလျားအပါအဝင် စုစုပေါင်း အလုပ်သမားတန်းလျား ၅ ခုကို စင်ကာပူက လှုပ်ရှားသွားလာမှု ကန့်သတ်ခဲ့ပြီး စောင့်ကြည့်မှုတွေ ပြုလုပ်နေပါတယ်။

Ref : CNA, Aljazeera

(စင်ကာပူရှိ နိုင်ငံခြားသား အလုပ်သမားတန်းလျားတစ်ခု)