ထိုင်ဝမ်တွင် ကိုရိုနာဗိုင်းရပ်စ် ကူးစက်မှု မရှိတော့

ဧပြီ ၁၄၊ ၂၀၂၀
M-Media

-နိုင်ငံအတွင်းမှာ Covid-19 ကူးစက်မှု မရှိတော့ဘူးလို့ ထိုင်ဝမ်နိုင်ငံက ဒီကနေ့မှာ ကြေငြာလိုက်ပြီး ဒါဟာ တစ်လကျော်အတွင်း ပထမဆုံးအကြိမ် ကူးစက်မှု ပပျောက်သွားတာ ဖြစ်ပါတယ်။

ထိုင်ဝမ်ဟာ ၂၀၁၉ ခုနှစ် ဒီဇင်ဘာ ၃၁ ရက်နေ့ကတည်းက ကိုရိုနာဗိုင်းရပ်စ် တားဆီးကာကွယ်ရေးကို အစောဆုံး စတင်လုပ်ဆောင်ခဲ့တာဖြစ်ပြီး၊ ထိထိ​ရောက်ရောက် ဆောင်ရွက်နိုင်မှုအတွက် ကမ္ဘာ့ပညာရှင်တွေရဲ့ ချီးကျူးမှုကိုလည်း ခံထားရပါတယ်။

စုစုပေါင်း ကူးစက်သူအရေအတွက်ဟာ ၃၉၃ ဦးရှိပြီး အဲဒီအထဲက ၃၃၈ ဦးဟာ နိုင်ငံခြားကနေ ကူးစက်လာသူတွေပါ။ သေဆုံးသူက၆ ဦးသာ ရှိပါတယ်။

“ကျွန်တော်တို့ ကျော်လွှားနိုင်ခဲ့ပြီလို မျှော်လင့်ပါတယ်။ ဒါပေမယ့် တားဆီးကာကွယ်မှုတွေကိုတော့ ဆက်လက် လုပ်ဆောင်သွားရမှာပါ။ ကူးစက်မှုမရှိတော့တဲ့အတွက် ပျော်ရွှင်မိပါတယ်” လို့ ကျန်းမာရေးဝန်ကြီး Chen Shih-chung က သတင်းစာရှင်းလင်းပွဲမှာ ပြောကြားခဲ့ပါတယ်။

ဆေးရုံက ဆင်းသွားသူအရေအတွက်က ၁၂၄ ဦးအထိ ရှိနေပါတယ်။

တရုတ်နဲ့နီးကပ်ပေမယ့် ထိုင်ဝမ်ဟာ တစ်နိုင်ငံလုံးကို တံခါးပိတ်ကာ ရွေ့လျားသွားလာမှု ကန့်သတ်တာမျိုး မရှိဘဲ လူစုလူဝေးမလုပ်ဖို့ တားမြစ်တာ၊ အပြင်ထွက်ရင် နှာခေါင်စည်း မတပ်မနေရအဖြစ် သတ်မှတ်တာလောက်သာ လုပ်ဆောင်ခဲ့ပါတယ်။

Ref: CNA