အာကာသ စူးစမ်းရှာဖွေမှု စီမံကိန်းတွင် အီရန်က စာမျက်နှာသစ်တစ်ခု ဖွင့်လှစ်

ဧပြီ ၂၅၊ ၂၀၂၀
M-Media

-အီရန်နိုင်ငံဟာ စစ်ဖက်သုံး ပထမဆုံး ဂြိုဟ်တုတစ်ခုကို ဗုဒ္ဓဟူးနေ့က ကမ္ဘာပတ်လမ်းကြောင်းထဲ အောင်မြင်စွာ လွှတ်တင်နိုင်ခဲ့ပြီး နိုင်ငံရဲ့ အာကာသ စူစမ်းရှာဖွေရေးနယ်ပယ်မှာ စာမျက်နှာသစ်တစ်ခု ဖွင့်လှစ်နိုင်ခဲ့တာ ဖြစ်ပါတယ်။

Noor-1 လို့ အမည်ပေးထားတဲ့ အဲဒီဂြိုဟ်တုကို နိုင်ငံအလယ်ပိုင်း Dasht-e Kavir အာကာသစခန်းကနေ လွှတ်တင္ခဲ့တာဖြစ်ပါတယ်။ Noor-1 ဟာ အီရန်နိုင်ငံမှာ ထုတ်လုပ်တဲ့ ၅ ခုမြောက် ဂြိုဟ်တုဖြစ်ပြီး၊ လွှတ်တင်ရာမှာ အသုံးပြုခဲ့တဲ့ ဒုံးပျံကလည်း ပြည်တွင်းမှာ ပထမဆုံး ထုတ်လုပ်နိုင်တဲ့ ၃ ဆင့်ပေါက်ကွဲအား ဒုံးပျံပါ။

အခုဂြိုဟ်တုကို အီရန်စစ်ဖက်ရဲ့ ထောက်လှမ်းရေးနဲ့ စောင့်ကြည့်ရေးအတွက် အသုံးပြုသွားမှာဖြစ်ပါတယ်။ ဂြိုဟ်တုဟာ ဘက်စုံသုံးဂြိုဟ်တုဖြစ်တယ်လို့သာ ဖော်ပြပြီး လုပ်ဆောင်နိုင်စွမ်း အသေးစိတ်ကို အီရန်က ထုတ်ပြန်ခဲ့ခြင်း မရှိပါဘူး။

အီရန် တော်လှန်ရေးအစောင့်တပ်ဖွဲ့ အကြီးအကဲ ဗိုလ်ချုပ် ဟိုစိန် ဆာလာမီက အခုအချိန်ကစလို႔ အီရန်ဟာ ကမ္ဘာကြီးကို ကောင်းကင်ကနေ စောင့်ကြည့်နိုင်တော့မှာဖြစ်ပြီး ကမ္ဘာ့အင်အားကြီးနိုင်ငံအဖြစ် တည်ဆောက်နေတယ်ဆိုတဲ့ သက်သေတစ်ခု ဖြစ်တယ်လို့ ပြောကြားခဲ့ပါတယ်။

အခုဂြိုဟ်တုလွှတ်တင်မှုဟာ အီရန်ရဲ့ အာကာသ စူးစမ်းရှာဖွေမှု လုပ်ငန်းမှာ စာမျက်နှာသစ်တစ်ခု ဖွင့်လှစ်နိုင်ခဲ့တာလည်း ဖြစ်ပါတယ်။ အီရန်ဟာ ကမ္ဘာပတ်လမ်းကြောင်း အမြင့်ပိုင်းကို ဂြိုဟ်တုတွေ ရောက်ရှိနိုင်ရေးအတွက် အရင်က နည်းပညာဆိုင်ရာ အခက်အခဲ ရှိခဲ့ပြီး အခု ဂြိုဟ်တုလွှတ်တင်တဲ့ Qased ဒုံးပျံဟာ ဒီအခက်အခဲကို ဖြေရှင်းပေးလိုက်နိုင်တာပါ။

Ref: Press TV