ဘောလီး​ဝုဒ်ရုပ်ရှင်လောကမှ နာမည်ကျော် သရုပ်ဆောင် အစ်ရ်ဖန်း ခန်း ကွယ်လွန်

ဧပြီ ၂၉၊ ၂၀၂၀
M-Media

-အိန္ဒိယ ဘောလီးဝုဒ်ရုပ်ရှင်လောကရဲ့ နာမည်ကျော် သရုပ်ဆောင် အစ်ရဖန်း ခန်းဟာ ကင်ဆာရောဂါကြောင့် ဒီကနေ့မှာ ကွယ်လွန်သွားခဲ့ပါတယ်။

Slumdog Millionaire၊ Life of Pi၊ The Amazing Spider-Man စတဲ့ ရုပ်ရှင်ကားတွေနဲ့ ကမ္ဘာ့ဇာတ်ခုံအထိ ထိုးဖောက်နိုင်ခဲ့တဲ့ ခန်းဟာ ကွယ်လွန်ချိန်မှာ အသက် ၅၃ နှစ်ပဲ ရှိပါသေးတယ်။

၂၀၁၈ ခုနှစ်မှာ သရက်ရွယ်ကင်ဆာ ခံစားနေရကြောင်းစတင် သိရှိခဲ့ပြီး အဲဒီအချိန်ကတည်းက ဆေးကုသမှု ခံယူခဲ့ရတာပါ။ ပြီးခဲ့တဲ့ရက်ပိုင်းအတွင်း အူမကြီးပိုးဝင်တဲ့ ဝေဒနာကို ခံစားရတာကြောင့် မွန်ဘိုင်းဆေးရုံ တင်ခဲ့ရပြီး ဒီကနေ့မှာ ကွယ်လွန်သွားတာ ဖြစ်ပါတယ်။

“အစ်ရဖန်းခန်းဟာ စိတ်ဓာတ်ခိုင်မာသူဖြစ်ပြီး နောက်ဆုံးအချိန်အထိ ရောဂါကို တွန်းလှန်သွားတာပါ။ အနီးပတ်ဝန်းကျင်ကလူအားလုံးရဲ့ စိတ်ဓာတ်တွေကို မြှင့်တင်ပေးနိုင်သူလည်း ဖြစ်ပါတယ်။ ချစ်ရတဲ့ မိသားစုတွေ ဝန်းရံပြီး နောက်ဆုံးအချိန်ကို ကုန်ဆုံးခဲ့တာ ဖြစ်ပါတယ်” လို့ ခန်းရဲ့ မန်နေဂျာက ထုတ်ပြန်တဲ့ ကြေငြာချက်မှာ ဖော်ပြထားပါတယ်။

အစ်ရဖန်းခန်းရဲ့ မိခင်ဖြစ်သူဟာ လွန်ခဲ့တဲ့ ၄ ရက် ဧပြီလ ၂၅ ရက်နေ့မှာ ကွယ်လွန်ခဲ့တာပါ။ ခန်းကွယ်လွန်ချိန်မှာ ဇနီးဖြစ်သူနဲ့ သားသမီးနှစ်ဦး ကျန်ရစ်ခဲ့ပါတယ်။

အစ်ရဖန်းခန်းကို ၁၉၆၇ ခုနှစ်က အိန္ဒိယနိုင်ငံမြောက်ပိုင်း ရာဂျက်စသန်ပြည်နယ်မှာ မွေးဖွားခဲ့ပြီး ငယ်ငယ်ကတည်းက အနုပညာကို ဝါသနာပါသူလည်း ဖြစ်ပါတယ်။ ခန်းရဲ့ အနုပညာသည်ဘ၀ အစပိုင်းဟာ ခက်ခဲခဲ့ပြီး မဆုတ်မနစ် ကြိုးစားအားထုတ်မှုကြောင့် အောင်မြင်ကျော်ကြားလာတာ ဖြစ်ပါတယ်။

ဘောလီးဝုဒ်ရုပ်ရှင်အသိုင်းအဝိုင်း၊ အိန္ဒိယ အနုပညာအသိုင်းအဝိုင်းနဲ့ နိုင်ငံရေးအသိုင်းအဝိုင်းကတော့ အစ်ရဖန်းခန်း ကွယ်လွန်မှုအတွက် နှမြှောတသ ဖြစ်ရတယ်လို့ ဆိုရှယ်မီဒီယာတွေမှာ ရေးသားခဲ့ကြပါတယ်။

Ref: Aljazeera