ကိုရိုနာဗိုင်းရပ်စ်နှင့်အတူ အတင့်ရဲလာသည့် အိန္ဒိယမှ ဘာသာရေးအစွန်းရောက်များ

ဧပြီ ၃၀၊ ၂၀၂၀
M-Media

-အိန္ဒိယမှာ Covid-19 ပြန့်နှံ့မှုကြောင့် နိုင်ငံကို တံခါးပိတ်ကာ ရွေ့လျားသွားလာမှု ကန့်သတ်ထားတဲ့အချိန်မှာ နိုင်ငံအတွင်းက အစ္စလာမ်ဘာသာဝင်တွေအပေါ် အမုန်းဝါဒဖြန့်တာ၊ တိုက်ခိုက်​နှောက်ယှက်တာ၊ သပိတ်မှောက်ဖို့ တိုက်တွန်း ဆော်ဩတာတွေ မြင့်တက်လာလာပါတယ်။

ဒီလိုလုပ်ဆောင်မှုတွေထဲမှာ ဟိန္ဒူ ဘာသာရေးအစွန်ရောက်တွေအပြင် အာဏာရ ဟိန္ဒူအမျိုးသားရေးပါတီ BJP က ခေါင်းဆောင်တွေလည်း ပါဝင်လာပါတယ်။

နိုင်ငံမြောက်ပိုင်း အူတာပရာဒက်ရှ်ပြည်နယ် ဒီအိုရီယာမြို့က BJP ပါတီ ထိပ်တန်းခေါင်းဆောင်တစ်ဦးဖြစ်ပြီး လွှတ်တော်အမတ်လည်းဖြစ်တဲ့ ဆူရက်ရှ် တီဝါရီဟာ မွတ်စလင်တွေရောင်းတဲ့ ဟင်းသီးဟင်းရွက်ဆိုင်တွေမှာ မဝယ်ဖို့ တိုက်တွန်းတဲ့ ဗီဒီယိုတစ်ခု ပြီးခဲ့တဲ့အင်္ဂါနေ့က ဆိုရှယ်မီဒီယာမှာ ပြန့်နှံ့ခဲ့ပါတယ်။

“စိတ်ထဲမှာ မှတ်ထားပါ။ ငါ လူတိုင်းကို ပွင့်ပွင့်လင်းလင်းပြောချင်တယ်။ မွတ်စလင်တွေရောင်းတဲ့ ဟင်းသီးဟင်းရွက်ဆိုင်တွေမှာ ဝယ်စရာ မလိုဘူး”

ဒီဗီဒီယိုကြောင့် ဝေဖန်မှုတွေမြင့်တက်လာခဲ့ပြီးတဲ့နောက် BJP ပါတီဟာ တီဝါရီကို သတိပေးခဲ့ပါတယ်။

တီဝါရီက ဧပြီလ ၁၈ ရက်နေ့ ဒီအိုရီယာမြို့မှာ နှာခေါင်းစည်းတွေ ဝေတဲ့အချိန် ဒေသခံတွေက မွတ်စလင်တွေဟာ သူတို့တံတွေးတွေကို သစ်သီး၀လံတွေမှာ သုတ်လိမ်းကာ ကိုရိုနာဗိုင်းရပ်စ် ဖြန့်နေကြတယ်လို့ ပြောကြားခဲ့တဲ့အတွက် လူတွေ ဗိုင်းရပ်စ်မကူးအောင် ပြောကြားရခြင်းဖြစ်တယ်လို့ ပြန်လည် ဖြေရှင်းခဲ့ပါတယ်။

လူနေထူထပ်တဲ့ အူတာပရာဒက်ရှ်ပြည်နယ်မှာ မွတ်စလင်သစ်သီးဆိုင်တွေကို သပိတ်မှောက်ဖို့ ပြောဆိုတိုက်တွန်းမှုဟာ တီဝါရီက ပထမဆုံး မဟုတ်ပါဘူး။

ဟိန္ဒူအစွန်းရောက်အုပ်စုတွေဟာ ဟိန္ဒူတွေရောင်းတဲ့ သစ်သီးဆိုင်တွေထံ သွားရောက်ကာသင်္ကန်းရောင် ဟိန္ဒူအလံကို အဓမ္မလွှင့်ထူခိုင်းပြီး မွတ်စလင်ဆိုင်တွေမှာ မဝယ်အောင် ကြိုးပမ်းမှုတွေလည်း ပြီးခဲ့တဲ့ သီတင်းပတ်တွေအတွင်း ဖြစ်ပေါ်ခဲ့ပါတယ်။

မြို့တော် နယူးဒေလီ၊ ကာရ်နာတာကာ၊ တီလန်ဂါနာနဲ့ မဒ်ယာ ပရာဒက်ရှ်တို့အပါအဝင် တစ်ချို့ပြည်နယ်တွေမှာ မွတ်စလင်မဝင်ရ ဆိုင်းဘုတ်တွေ တပ်ဆင်မှုတွေလည်း ရှိနေပါတယ်။

မွတ်စလင်တွေက Covid-19 ဖြန့်နေတယ်

ကမ္ဘာတစ်ဝှမ်း ကိုဗစ်ရောဂါ ပြန့်နှံ့ပြီးတဲ့နောက် အိန္ဒိယနိုင်ငံမှာ မွတ်စလင်တွေဟာ ဒီရောဂါကို ဖြန့်နေတယ်ဆိုတဲ့ ဝါဒဖြန့်မှုမျိုးတွေ ပေါ်ပေါက်လာပါတယ်။

အစ္စလာမ် နယ်လှည့် သာသနာပြုအဖွဲ့ တဘ်လီဂ်ဂျမာအသ်က မတ်လအတွင်း ဒေလီမြို့ ဆင်ခြေဖုံးမှာ ပြုလုပ်ခဲ့တဲ့ အခမ်းအနားတစ်ခုကို တက်ရောက်သူ တော်တော်များများမှာ ကိုဗစ်ကူးစက်မှု တွေ့ခဲ့ရပြီးတဲ့နောက် ဒီလို ဝါဒဖြန့်မှုတွေ ဖြစ်လာတာပါ။

မွတ်စလင်တွေဟာ ‘ကိုရိုနာ အကြမ်းဖက်မှု’ လုပ်ဆောင်နေတယ်လို့လည်း အိန္ဒိယနိုင်ငံရေးသမားအချို့နဲ့ ဂျာနယ်လစ်တွေက ဝါဒဖြန့်ခဲ့ကြပါတယ်။ အိန္ဒိယက ဆေးဘက်ဆိုင်ရာ ကျွမ်းကျင်သူတွေက ဒီလိုဝါဖြန့်မှုတွေဟာ အောက်ခြေက ဆေးစစ်မှု အချက်အလက်တွေနဲ့ ကိုက်ညီမှုမရှိဘူးလို့ ပြောကြားထားပါတယ်။

မွတ်စလင်ခေါင်းဆောင်တွေကတော့ ဗိုင်းရပ်စ်စပြန့်လာတဲ့ မတ်လနဲ့ ဧပြီလအစောပိုင်းတွေမှာ နိုင်ငံရေး၊ ဘာသာရေး အသင်းအဖွဲ့တွေဟာ လူစုလူဝေး အများအပြား လုပ်ဆောင်ကြပေမယ့် မွတ်စလင်တွေသာ ပစ်မှတ်ထား တိုက်ခိုက်ခံရနေရတယ်လို့ ထောက်ပြခဲ့ကြပါတယ်။

အာဇန်နှိုးဆော်သံကို ပိတ်ပင်ရန် ကြိုးစားမှု

ဟိန္ဒူအစွန်းရောက်တွေဟာ ဗလီတွေကို တိုက်ခိုက်တာ၊ အာဇန် ဝတ်​ပြုဖို့ နှိုးဆော်သံကို ပိတ်ပင်တာတွေလည်း လုပ်ဆောင်လာကြပါတယ်။

အူတာပရာဒက်ရှ်ပြည်နယ် ဂိုရက်ခ်ပူးရ်ဒေသမှာ အင်္ဂါနေ့က ဗလီဝတ်ကျောင်းတစ်လုံး တိုက်ခိုက်ခံရပြီး၊ အဲဒီဗလီက မော်ဇင် (နိဗ္ဗာ​န်ဆော်သူ) လည်း ရိုက်နှက်ခံခဲ့ရပါတယ်။ အစွန်းရောက်တွေဟာ အာဇန်နှိုးဆော်မှု မပြုလုပ်ဖို့ ဖိအားပေးခဲ့ပြီးတဲ့နောက် ဒီလို တိုက်ခိုက်ခဲ့တာ ဖြစ်ပါတယ်။

တိုက်ခိုက်မှုကြောင့် အသေးစားဒဏ်ရာတွေ ရခဲ့တဲ့ အသက် ၃၅ နှစ်အရွယ် မော်ဇင် အဘ်ဒူလ် ရဟ်မန်က ဗလီဟာ အစိုးရက ချမှတ်ထားတဲ့ ရွေ့လျားသွားလာမှု ကန့်သတ်ချက်တွေကို အတိအကျ လိုက်နာခဲ့တယ်လို့ ပြောကြားခဲ့ပါတယ်။

Ref: Aljazeera