ကာတာက အသက်ရှုစက်များကို ကိုယ်ပိုင်နည်းပညာဖြင့် တီထွင်ထုတ်လုပ်

ဧပြီ ၃၀၊ ၂၀၂၀
M-Media

-ကိုဗစ်တိုက်ဖျက်ရေးမှာ အသုံးပြုနိုင်မယ့် အသက်ရှုစက်တွေကို ကာတာနိုင်ငံက ကိုယ်တိုင် တီထွင်နိုင်ခဲ့ပြီး ပြည်တွင်းနဲ့ ပြည်ပမှာ ရောင်းချဖို့အတွက် အမြောက်အများ ထုတ်လုပ်တော့မယ်လို့ သိရပါတယ်။

Savr-Q လို့ အမည်ပေးထားတဲ့ အဲဒီ အသက်ရှုစက်ကို ကာတာ ကာကွယ်ရေးဝန်ကြီးဌာနဲ့ ဆက်နွယ်နေတဲ့ Barzan ကုမ္ပဏီက ဖန်တီး ထုတ်လုပ်တာပါ။ ကာတာအုပ်ချုပ်သူ ရှိခ် သာမင် ဘင် ဟာမဒ် အလ် သာနီဟာ ဗုဒ္ဓဟူးနေ့က ထုတ်လုပ်မှုအခြေအနေကို သွားရောက်ကြည့်ရှုခဲ့ပြီး ပညာရှင်တွေနဲ့လည်း တွေ့ဆုံဆွေးနွေးခဲ့ပါတယ်။

ဒီအသက်ရှုစက်ကို အမေရိကန် အစားအသောက်နှင့် ဆေးဝါးဌာန (FDA) ရဲ့ စံနှုန်းနဲ့အညီ ထုတ်လုပ်ထားတာ ဖြစ်ပါတယ်။ Barzan ဟာ အမေရိကန်ကုမ္ပဏီ Wilcox နဲ့ ပူးပေါင်းကာ တစ်ပတ်ကို အလုံးရေ နှစ်ထောင် ထုတ်လုပ်ရောင်းချဖို့ စီစဉ်နေပါတယ်။

“အသက်ရှုစက်ဟာ သေးတယ်၊ ပေါ့တယ်၊ အရက်ဖက်နဲ့ စစ်ဖက် နှစ်ခုစလုံးမှာ အသုံးပြုဖို့ ထုတ်လုပ်ထားတာပါ။ နည်းပညာနဲ့ ထုတ်လုပ်မှုတွေဟာ ကာတာပြည်တွင်းဖြစ် စစ်စစ်ပါ” လို့ စီမံကိန်းမန်နေဂျာ ဆအွဒ် အဘ်ဒူလာ အလ်-မာနေက ပြောကြားခဲ့ပါတယ်။

ကမ္ဘာတစ်ဝှမ်း ကိုရိုနာဗိုင်းရပ်ကူးစက်မှု အရေအတွက် မြင့်မားလာမှုနဲ့အတူ အသက်ရှုစက် ဝယ်လိုအားကလည်း မြင့်တက်လာပြီး ကမ္ဘာ့နိုင်ငံတွေဟာ အသက်ရှုစက်မလုံလောက်မှု ပြဿနာကို ဖြေရှင်းဖို့အတွက် နည်းလမ်းမျိုးစုံနဲ့ ကြိုးစားနေကြပါတယ်။

Ref: Aljazeera