ကိုဗစ်တိုက်ဖျက်ရေး ဆော်ဒီက ပါလက်စတိုင်းကို ဒေါ်လာ ၂.၆ သန်းဖို့ ကူညီမည်

မေ ၃၊ ၂၀၂၀
M-Media

-ပါလက်စတိုင်းနိုင်ငံရဲ့ ကိုရိုနာတိုက်ဖျက်ရေးမှာ အကူအညီဖြစ်စေဖို့အတွက် ကန်ဒေါ်လာ ၂.၆ သန်း တန်ဖိုးရှိတဲ့ ဆေးပစ္စည်းတွေ လှူဒါန်းကူညီသွားမယ်လို့ ဆော်ဒီအစိုးရက ထုတ်ပြန်ကြေငြာလိုက်ပါတယ်။

ပါလက်စတိုင်းမှာ ဧပြီလ ၃၀ ရက်နေ့အထိ ဗိုင်းရပ်စ်ကူးစက်မှုအရေအတွက် ၃၄၀ ရှိပြီး သေဆုံးသူက ၂ ဦးရှိပါတယ်။ ပါလက်စတိုင်းအာဏာပိုင်အဖွဲ့ဟာ နိုင်ငံအတွင်း လူစုခွင့် ပိတ်ပင်ထားသလို၊ ရွေ့လျားသွားလာမှုကို တစိတ်တစ်ပိုင်း ကန့်သတ်မှု လုပ်ထားပါတယ်။

ပါလက်စတိုင်းနယ်မြေတွေဖြစ်တဲ့ အနောက်ဖက်ကမ်းနဲ့ ဂါဇာကမ်းမြှောင်တို့က ပါလက်စတိုင်းပြည်သူတ​ွေဟာ အစ္စရေးရဲ့ နှစ်ပေါင်းများစွာ ကျူးကျော်မှု၊ ကန့်သတ်မှုတွေကြောင့် အတိဒုက္ခရောက်နေကြပြီး အခု ဗိုင်းရပ်စ်ပြန့်နှံံမှုဒဏ်ကြောင့် အခြေအနေ ပိုမိုဆိုးရွားနေတာ ဖြစ်ပါတယ်။

ပါလက်စတိုင်းပြည်သူတွေရဲ့ အခက်အခဲတွေကို ပြေလည်စေဖို့အတွက် ဆော်ဒီဟာ ကန်ဒေါ်လာ ၂.၆ သန်း တန်ဖိုးရှိတဲ့ ဆေးပစ္စည်းအကူအညီတွေ ပေးပို့သွားမှာ ဖြစ်ပါတယ်။ ဒီအကူအညီဟာ ဆော်ဒီအစိုးရရဲ့ ပရဟိတအဖွဲ့ King Salman Humanitarian Aid and Relief Center (KSRelief) ကနေ ဆောင်ရွက်တာ ဖြစ်ပါတယ်။

ဆော်ဒီဟာ Covid-19 တိုက်ဖျက်ရေးအတွက် ကမ္ဘာ့ကျန်းမာရေးအဖွဲ့ WHO ကို ပြီးခဲ့တဲ့လမှာ ကန်ဒေါ်လာ သန်း ၅၀၀ လှူဒါန်းခဲ့ပြီး၊ ဗိုင်းရပ်စ်ဒဏ် ခံစားနေရတဲ့ အခြားတိုင်းပြည်တွေကိုလည်း ကူညီထောက်ပံ့မှုတွေ လုပ်ဆောင်နေပါတယ်။

Ref: Alarabiya