ကိုဗစ်ကိစ္စ တရုတ်ကိုအရေးယူရန် အမေရိကန်က ရေရှည်စီမံကိန်း ဆွဲနေ

မေ ၃၊ ၂၀၂၀
M-Media

-ကိုရိုနာဗိုင်းရပ်စ် ကပ်ရောဂါနဲ့ပတ်သက်ပြီး တရုတ်နိုင်ငံကို ဘက်ပေါင်းစုံကနေ အရေးယူအပြစ်ပေးရေး ထရမ့်အစိုးရက ရေရှည်စီမံကိန်း ဆွဲနေတယ်လို့ သတင်းတွေ ထွက်လာပါတယ်။

နိုင်ငံအတွင်း Covid-19 ပြန့်နှံ့မှုကို ကောင်းမွန်စွာ မကိုင်တွယ်နိုင်တဲ့ ကိစ္စနဲ့ပတ်သက်ပြီး ပြည်သူကို အာရုံလွှဲဖို့အတွက် တရုတ်ကို အပြစ်တင်တဲ့နည်းကို ထရမ့်က သုံးနေတယ်လို့ လေ့လာသူတွေက သုံးသပ်ကြပါတယ်။

ဒါပေမယ့် အမေရိကန်အစိုးရ ရင်းမြစ်တွေကတော့ ပိတ်ဆို့မှုတွေ၊ အကြွေးကိစ္စတွေ၊ ကုန်သွယ်ရေး ပေါ်လစီအပါအဝင် နည်းလမ်းပေါင်းစုံနဲ့ တရုတ်ကို အရေးယူဖို့ ပြင်ဆင်နေတယ်လို့ ပြောကြားခဲ့ပါတယ်။

Covid-19 ဟာ ဝူဟန်မြို့ရဲ့ ဓာတ်ခွဲခန်းတစ်ခုကနေ ပေါက်လာတယ်ဆိုတဲ့ ကိစ္စကို စုံစမ်းဖော်ထုတ်ဖို့ထရမ့်အစိုးရက ဖိအားပေးတာကြောင့် ကန်ထောက်လှမ်းရေးအဖွဲ့က သူတို့အနေနဲ့ ဒီကိစ္စအတွက် အချက်အလက်တွေ စုဆောင်းနေတယ်လို့ ကြေငြာချက် ထုတ်ပြန်တဲ့အထိ ဖြစ်ခဲ့ပါတယ်။

ကြာသာပတေးနေ့က သတင်းစာရှင်းလင်းပွဲမှာ ထရမ့်က သူဟာ ကုန်သွယ်ရေးကိစ္စမှာဒေါ်လာ ဘီလီယံချီ ရယူလိုက်နိုင်တာကြောင့် တရုတ်အစိုးရက သူ ဆက်လက်ရွေးကောက်ခံရမှာကို မမြင်လိုဘူးလို့ ပြောကြားခဲ့ပါတယ်။ ဒါ့အပြင် တရုတ်ဟာ အမေရိကန်ကို ဘယ်တုန်းကမှ မကြုံဖူးတဲ့နည်းလမ်းနဲ့ အုပ်စီးဖို့ ကြိုးစားနေတယ်လို့လည်း ထရမ့်က ဆိုပါတယ်။

နိုင်ငံခြားရေးဝန်ကြီး မိုက်ပွမ်ပီယိုက တရုတ်ဟာ သူလုပ်ခဲ့တာတွေအတွက် ပြန်လည်ပေးဆပ်ရလိမ့်မယ်လို့ ပြီးခဲ့တဲ့တစ်ပတ်မှာ ပြောကြားခဲ့ပါတယ်။

တရုတ်ကို ပြင်းပြင်းထန်ထန် အရေးယူနိုင်မယ့် နည်းလမ်းတွေကို အစိုးရ၊ အိမ်ဖြူတော်နဲ့ ကာကွယ်ရေးဝန်ကြီးဌာနတို့အပါအဝင် အစိုးရအဖွဲ့တွေက ဆွေးနွေးနေပေမယ့် အိမ်ဖြူတော်က နိုင်ငံတော်လုံခြုံရေးကောင်စီထံကို မတင်သွင်းရသေးဘူးလို့ သတင်းရင်းမြစ် ၂ ခုက ပြောပါတယ်။ ဒါပေမယ့် ဒီအရေးယူမှုတွေဟာ လတ်တလော ဖြစ်လာဖွယ် မရှိသေးပါဘူး။

Ref: CNN