ဆီးဗီးလ်မြို့၏ ပထမဆုံး ဗလီအတွက် ကနူတေးဦးဆောင်ကာ ရန်ပုံငွေရှာဖွေ

မေ ၇၊ ၂၀၂၀
M-Media

-စပိန်နိုင်ငံတောင်ပိုင်းက ဆီဗီးလ်မြို့မှာ ပထမဆုံး ဗလီဝတ်ကျောင်းတော်နဲ့ အစ္စလာမ့်စင်တာ တည်ဆောက်နိုင်ရေးအတွက် လာလီဂါကလပ် ဆီးဗီးလားအသင်း တိုက်စစ်မှူးဟောင်း ဖရက်ဒီ ကနူတေးက ဦးဆောင်ကာ ရန်ပုံငွေ ရှာဖွေနေပါတယ်။

Kanoute 4 Seville Mosque ဆိုတဲ့အမည်နဲ့ အဲဒီ ရန်ပုံငွေ ရှာဖွေမှုကို ပြီးခဲ့တဲ့နှစ်မှာ စတင်ခဲ့တာဖြစ်ပြီး ကန်ဒေါ်လာ ၁ သန်း ရရှိဖို့ ရည်ရွယ်ထားပါတယ်။ လက်ရှိမှာ ဒေါ်လာ ၇၅၀၀၀၀ နီးပါး ရရှိထားပြီး ဖြစ်ပါတယ်။

“ဘောလုံးကစားတာဟာ ကျွန်တော့်ရဲ့ ဝါသနာပါ။ ဘောလုံးကစားနေရတာကို ကျွန်တော်ကြိုက်တယ်။ ကျွန်တော့်ရဲ့ အလုပ်လည်း ဖြစ်ပါတယ်။ ဘုရားသခင်နဲ့တွေ့တဲ့ တစ်နေ့ကျရင် ဘယ်နှစ်ဂိုးသွင်းခဲ့လဲလို့ ဘုရားက မေးမှာ မဟုတ်ပါဘူး” လို့ အသက် ၄၂ နှစ်အရွယ်ရှိပြီဖြစ်တဲ့ ကနူတေးက ပြောကြားခဲ့ပါတယ်။

ကနူတေးတို့အဖွဲ့ တည်ဆောက်မယ့် ဗလီဝတ်ကျောင်းတော်ဟာ စပိန်နိုင်ငံတောင်ပိုင်းကို အာရပ်တွေ အုပ်စိုးမှု အဆုံးသတ်ပြီးတဲ့နောက် နှစ်ပါင်း ၇၀၀ အတွင်း ပထမဆုံး ဗလီဝတ်ကျောင်းတော် ဖြစ်လာမှာပါ။ ဗလီဝတ်ကျောင်းတော် ဆောက်လုပ်ဖို့အတွက် မြေနေရာကို သတ်မှတ်ထားပြီး ၃ ထပ်အဆောက်အဦး ဆောက်လုပ်မှာ ဖြစ်ပါတယ်။

၂၀၀၇ ခုနှစ်မှာ အာဖရိက အကောင်းဆုံးဘောလုံးသမားဆု ရရှိခဲ့တဲ့ မာလီကစားသမား ကနူတေးဟာ ပြင်သစ်ကလပ် လိုင်ယွန်၊ ပရီးမီးယားလိဂ်ကလပ် ဝက်စ်ဟမ်းနဲ့ စပါးတို့မှာ ကစားခဲ့ဖူးပြီး လာလီဂါကလပ် ဆီးဗီးလားအသင်းမှာ ကစားခဲ့တဲ့ ၂၀၀၅ ခုနှစ်ကနေ ၂၀၁၂ ခုနှစ်တာကာလဟာ ကစားသမားဘ၀ အအောင်မြင်ဆုံးအချိန်တွေ ဖြစ်ပါတယ်။ ၂၀၁၃ ခုနှစ်မှာတော့ ကနူတေးဟာ ဘောလုံးလောကကနေ အနားယူခဲ့ပါတယ်။

ဆီးဗီးလ်မြို့က မွတ်စလင်လူ့အဖွဲ့အစည်း ငှားရမ်းပြီး ဝတ်ပြုဆောင်အဖြစ် အသုံးပြုနေတဲ့ နေရာတစ်ခုကို ပိုင်ရှင်က ရောင်းချဖို့ စီစဉ်တဲ့အချိန် ၂၀၀၇ ခုနှစ်က ကနူတေးဟာ အဲဒီနေရာကို ဝယ်ယူနိုင်ဖို့အတွက် Seville Mosque ဖောင်ဒေးရှင်းအဖွဲ့ကို ဒေါ်လာ ၇ သိန်း လှူဒါန်းခဲ့ပါတယ်။

ဆီးဗီလ်းမြို့မှာ အစ္စလာမ်ဘာသာဝင် ၃ သောင်းဝန်းကျင်လောက် ရှိပေမယ့် ဝတ်ပြုရာနေရာတစ်ခု တည်ဆောက်ဖို့အတွက် လုံလောက်တဲ့ ငွေကြေး မရှိကြပါဘူး။

“ကျွန်တော် ဒီမြို့မှာ နေခဲ့တုန်းက ဝတ်ပြုရာနေရာတစ်ခု ဆုံးရှုံးမယ့် အခြေအနေကို မြင်ခဲ့ရပြီး ကူလည်း ကူညီနိုင်ခဲ့ပါတယ်။ အစ္စလာမ်ဘာသာဝင်တွေ မြင့်တက်လာတဲ့ ဒီမြို့မှာ ပိုပြီး ကြီးမားတဲ့ ဝတ်ပြုရာနေရာတစ်ခု လိုအပ်လာတယ်လို့ ကျွန်တော် ထင်ပါတယ်” လို့ ဗလီရန်ပုံငွေရှာဖွေမှုအတွက် ရည်ရွယ်တဲ့ ဗီဒီယိုမှာ ကနူတေးက ပြောကြားခဲ့ပါတယ်။

အခု ဆောက်လုပ်မယ့် ဗလီဝတ်ကျောင်းတော်ဟာ မျိုးဆက်သစ်တွေ ဘာသာတရားကို ကောင်းမွန်စွာ လေ့လာနိုင်မယ့် နေရာတစ်ခု ဖြစ်ရုံသာမက၊ လူ့အဖွဲ့အစည်းတွေအကြား အပြန်အလှန် ပေါင်းကူးပေးမယ့် နေရာတစ်ခု ဖြစ်လာဖို့ ရည်ရွယ်တယ်လို့လည်း သူက ဆိုပါတယ်။

Ref: The National