ကိုရိုနာကို ကျော်လွှားနိုင်ရေး ဥပုသ်စောင့် ဆုတောင်းရန် ပုပ်ရဟန်းမင်းကြီး တိုက်တွန်း

မေ ၇၊ ၂၀၂၀
M-Media

-ကိုရိုနာကပ်ရောဂါကနေ ကျော်လွှားနိုင်ရေး ဘာသာပေါင်းစုံကလူတွေ တစ်ရက်တာ အစာရှောင်ကာ ဥပုသ်စောင့် ဆုတောင်းကြဖို့အတွက် ပုပ်ရဟန်းမင်းကြီး ဖရန်စစ်က တိုက်တွန်းလိုက်ပါတယ်။

ကမ္ဘာပေါ်က ထိပ်တန်းဘာသာရေးခေါင်းဆောင်တွေ စုပေါင်းဖွဲ့စည်းထားတဲ့ Higher Committee of Human Fraternity အဖွဲ့က လာမယ့် မေလ ၁၄ ရက်နေ့မှာ တစ်ကမ္ဘာလုံးကလူသားတွေ စုပေါင်း ဆုတောင်းကြဖို့ သတ်မှတ်ထားပါတယ်။

ဒီအစီအစဉ်ကို အီဂျစ်နိုင်ငံရဲ့ ဓမ္မသတ်မှူးချုပ် မွဖ်သီ အဟ်မဒ် အလ်-တိုင်ယစ်ဘ်က ကြိုဆိုခဲ့ပြီး ကမ္ဘာ့လူထုအနေနဲ့ ဘုရားသင်ထံတော်ပါးမှာ ဆုတောင်းကြဖို့၊ အလှူဒါနပြုကြဖို့လည်း ဆိုရှယ်မီဒီယာကနေ တိုက်တွန်းခဲ့ပါတယ်။

မေလ ၃ ရက်နေ့က ရုပ်သံကနေတစ်ဆင့် ဟောကြားတဲ့ ဒေသနာမှာ ပုပ်ရဟန်းမင်းကြီး ဖရန်စစ်က Higher Committee of Human Fraternity ရဲ့ လှုပ်ရှားမှုကို ထောက်ခံကြောင်း ပြောကြားခဲ့ပြီး အဲဒီနေ့မှာ အစာရှောင် ဥပုသ်စောင့်ကြဖို့လည်း တိုက်တွန်းခဲ့ပါတယ်။

“မေလ ၁၄ ရက်နေ့ကို ဘာသာဝင်တွေအားလုံး သတိရကြပါ။ ဆုတောင်းပါ၊ ဥပုသ်စောင့်ကြပါ၊ အလှူအတန်းပြုကြပါ”

ကမ္ဘာတစ်ဝှမ်း ပြန့်နှံ့နေတဲ့ Covid-19 တိုက်ဖျက်ရေးမှာ နိုင်ငံအားလုံး ပူးပေါင်းပြီး လက်တွဲလုပ်ဆောင်ကြဖို့လည်း ပုပ်ရဟန်းမင်းကြီးက သူရဲ့ ဒေသနာမှာ ထည့်သွင်းပြောကြားခဲ့ပါတယ်။

Higher Committee of Human Fraternity အဖွဲ့ကို ၂၀၁၉ ခုနှစ် ဖေဖော်ဝါရီလ ပုပ်ရဟန်းမင်းကြီး ယူအေအီးနိုင်ငံကို သွားရောက်လည်ပတ်စဉ်မှာ အီဂျစ်နိုင်ငံက ဓမ္မသတ်မှူးချုပ် ရှိခ် အဟ်မဒ် အလ်-တိုင်ယစ်ဘ်နဲ့အတူ ကမကထပြု ဖွဲ့စည်းခဲ့တာ ဖြစ်ပါတယ်။

Ref: Al-Arabiya