မေ ၈၊ ၂၀၂၀
M-Media

ဂျာမန်ဘွန်ဒစ်လီဂါပြိုင်ပွဲ မေလ ၁၆ ရက်နေ့ ပြန်စမည်

ဘွန်ဒစ်လီဂါ ဘောလုံးပြိုင်ပွဲတွေကို မေလ ၁၆ ရက်နေ့မှာ ပြန်လည် စတင်မယ်လို့ ဂျာမနီ ဘောလုံးအဖွဲ့ချုပ်က ကြေငြာလိုက်ပါတယ်။ ဥရောပမှာ Covid-19 ရောဂါ ပြန့်နှံ့မှုကြောင့် ဘွန်ဒစ်လီဂါ ဘောလုံးပြိုင်ပွဲကို ဖေဖော်ဝါရီ အလယ်ပိုင်းလောက်ကတည်းက ရပ်ဆိုင်းထားတာပါ။ လက်ရှိမှာ ရာသီပြီးဆုံးဖို့ ၉ ပွဲ လိုသေးပြီး လက်ရှိချန်ပီယံ ဘိုင်ယန်မြူးနစ်အသင်းက ၅၅ မှတ်နဲ့ ဇယားကို ဦးဆောင်နေပါတယ်။ မေလ ၁၆ ရက်နေ့မှာ ပြန်လည်စတင်ပြီးတဲ့နောက် ဇွန်လ ၂၇-၂၈ မှာ ရာသီကို အဆုံးသတ်မှာ ဖြစ်ပါတယ်။

စပါးတိုက်စစ်မှူး စစ်သင်တန်းကို ထူးချွန်စွာ အောင်မြင်

စပါးအသင်း တိုက်စစ်မှူး ဆွန်ဟွေမင်ဟာ ၃ ပတ်ကြာ တက်ရောက်ရတဲ့ စစ်သင်တန်းမှာ ထူးချွန်စွာ အောင်မြင်ခဲ့တယ်လို့ တောင်ကိုရီးယား မရိန်းတပ်ဖွဲ့က ထုတ်ပြန်ခဲ့ပါတယ်။ ၂၀၁၈ အင်ဒိုနီးရှားမှာ ပြုလုပ်ခဲ့တဲ့ အာရှအားကစားပြိုင်ပွဲမှာ ဂျပန်အသင်းကိုနိုင်ရကာ ဗိုလ်စွဲအောင် စွမ်းဆောင်နိုင်ခဲ့တာကြောင့် ဆွန်ဟွေမင်ဟာ ၂ နှစ် စစ်မှုမထမ်း မနေရ တာဝန်ကနေ ကင်းလွတ်ခွင့်ရခဲ့ပြီး ၃ ပတ် စစ်သင်တန်းနဲ့ နာရီ ၅၀၀ ပြည်သူ့ဝန်ထမ်း လုပ်ဆောင်ဖို့သာ တာဝန်ပေးခံခဲ့ရပါတယ်။ ၁၅၇ ဦးပါဝင်တဲ့ စစ်သင်တန်းရဲ့ အထူးချွန်ဆုံ ၅ ဦးစာရင်းမှာ ဆွန်ဟွေမင်းတစ်ယောက် ပါဝင်ခဲ့ပါတယ်။

ဆန်စီရိုကွင်းသစ် ဒီဇိုင်း ၂ ခုကို မီလန်အသင်းများ ထုတ်ပြ

အသစ်ဆောက်လုပ်မယ့် ကွင်းသစ်ဒီဇိုင်း နမူနာ ၂ ခုကို စီးရီးအေထိပ်သီး အင်တာမီလန်နဲ့ အေစီမီလန်တို့က ထုတ်ပြလိုက်ပါတယ်။ သူတို့ ၂ သင်း အိမ်ကွင်းအဖြစ် လက်ရှိ အသုံးပြုနေတဲ့ ဆန်စီရိုကွင်းဟာ ပရိတ်သတ် ၇၅၀၀၀ ဆန့်ပြီး ၁၉၂၅ ခုနှစ်က တည်ဆောက်ထားတာပါ။ ကွင်းသစ်အတွက် ယူရို ၁ ဘီလီယံ သုံးစွဲသွားမှာဖြစ်ပြီး ကွင်းဟောင်းဆန်စီရိုရဲ့ အစိတ်အပိုင်း အားလုံးနီးပါးကို ​ဖြိုချမှာ ဖြစ်ပါတယ်။ ကွင်းသစ်မှာ အားကစားစင်တာ၊ ယဉ်ကျေးမှုစင်တာ၊ အပန်းဖြေနေရာ၊ စားသောက်ဆိုင်၊ အားကစားပစ္စည်းအရောင်းဆိုင် စတာတွေ ပါဝင်မှာ ဖြစ်ပြီး၊ စိမ်းလန်းနေရာက လက်ရှိကွင်းထက် ၂ ဆ ကျယ်မှာဖြစ်ပါတယ်။

ပြင်သစ်လိဂ်ဝမ်းတွင် အလကား ကစားပေးမည်ဟု ဆစ်စီ ကမ်းလှမ်း

ပြင်သစ်လိဂ်ဝမ်းက မိမိကို ခေါ်ယူမယ့်အသင်းအတွက် အခမဲ့ ကစားပေးမယ်လို့ လီဗာပူးလ်တိုက်စစ်မှူးဟောင်း ဂျီဘရီလ် ဆစ်စီက ပြောကြားလိုက်ပါတယ်။ အသက် ၃၈ နှစ်အရွယ် ရှိပြီဖြစ်တဲ့ ဆစ်စီဟာ လိဂ်ဝမ်းက အသင်း ၃ သင်းမှာကစားကာ ၉၆ ဂိုး သွင်းယူပေးနိုင်ခဲ့ပြီး ဂိုး ၁၀၀ ပြည့်စံချိန်ရဖို့အတွက် အခုလို ကမ်းလှမ်းခဲ့တာပါ။ ၂၀၁၅ ခုနှစ်မှာ ဒဏ်ရာကြောင့် အနားယူခဲ့ပေမယ့် နောက်ပိုင်းမှာ ဆွီဒင်နဲ့ အီတလီတို့က အသင်းငယ်လေးတွေမှာ ပြန်ကစားခဲ့ပါတယ်။ ဆစ်စီဟာ ဆန်းဒါးလန်း၊ ပါနာသီနိုင်ကော့စ်၊ လာဇီယို၊ ကျူပီအာရ် စတဲ့ အသင်းတွေမှာလည်း ကစားခဲ့ဖူးပါတယ်။

Ref: Goal

mmFootballNews