ကိုရိုနာကာကွယ်ဆေး ကန်၏ သုတေသနဒေတာကို တရုတ်က ခိုးယူရန် ကြိုးစား

မေ ၁၂၊ ၂၀၂၀
M-Media

-ကိုရိုနာဗိုင်းရပ်စ် ကာကွယ်ဆေးဖော်ထုတ်ရေး သုတေသန အချက်အလက်တွေကို တရုတ်ဟက်ကာတွေက ခိုးယူဖို့ ကြိုးစားခဲ့တယ်လို့ အမေရိကန်အစိုးရ ထောက်လှမ်းရေးအဖွဲ့ FBI က ယုံကြည်နေပါတယ်။

သုတေသန အချက်အလက်တွေကို တရုတ်ဟက်ကာတွေက ဖောက်ထွင်းရယူဖို့ ကြိုးစားနေတဲ့အကြောင်း ကာကွယ်ဆေးရဖို့ အပြင်းအထန် ကြိုးစားနေတဲ့ အစိုးရအေဂျင်စီတွေ၊ ပုဂ္ဂလိက လုပ်ငန်းတွေထံ တရားဝင် သတိပေးသွားဖို့ FBI က စီစဉ်နေတယ်လို့ Wall Street ဂျာနယ်နဲ့ New York Times ဂျာနယ်တွေက မနေ့မှာ ဖော်ပြခဲ့ပါတယ်။

ဗိုင်းရပ်စ်စစ်ဆေးမှုနဲ့ ကုသမှုဆိုင်ရာ အချက်အလက်တွေကို ရယူဖို့လည်း ဟက်ကာတွေက ကြိုးစားနေပါတယ်။ အမေရိကန်အစိုးရ တာဝန်ရှိသူတွေက ဒီဟက်ကာတွေဟာ တရုတ်အစိုးရနဲ့ ဆက်စပ်နေတယ်လို့ စွပ်စွဲခဲ့ပါတယ်။

တရုတ် နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ ကျောက်လီကျင်းက ဒီစွပ်စွဲချက်တွေကို ငြင်းဆိုခဲ့ပြီး တရုတ်ဟာ Covid-19 ကုသရေးနဲ့ ကာကွယ်ဆေးသုတေသနမှာ ရှေ့တန်းရောက်နေကြောင်း၊ အထောက်အထားမရှိဘဲ အခုလို စွပ်စွဲပြောဆိုတာတွေဟာ စော်ကားရာရောက်ကြောင်း တုန့်ပြန်ပြောကြားခဲ့ပါတယ်။

ဒီသတင်းနဲ့ ပတ်သက်ပြီး သမ္မထရမ့်ကို သတင်းထောက်တွေက မေးမြန်းရာမှာ အတည်မပြုခဲ့ပေမယ့် တရုတ်က ဒါမျိုးလုပ်တယ်ဆိုတာ အထူးအဆန်းမဟုတ်ကြောင်း၊ တရုတ်နဲ့ပတ်သက်ပြီး မိမိတို့ သဘောမကျဘဲ အနီးကပ် စောင့်ကြည့်နေကြောင်း ဖြေကြားခဲ့ပါတယ်။

Covid-19 တိုက်ဖျက်နေတဲ့ ကျန်းမာရေးဝန်ထမ်းတွေအပေါ် ပစ်မှတ်ထားတဲ့ ဆိုက်ဘာတိုက်ခိုက်မှုတွေ မြင့်တက်လာတာကို ဗြိတိန်နဲ့ အမေရိကန်ထောက်လှမ်းရေးတွေက ပြီးခဲ့တဲ့တစ်ပတ်မှာ လူသိရှင်ကြား သတိပေးခဲ့ပါတယ်။ ဒီလိုတိုက်ခိုက်မှုတွေကို နိုင်ငံခြားတိုင်းပြည်တွေက ရာဇဝတ်အဖွဲ့တွေ စုပေါင်းလုပ်ဆောင်တာလို့ ဆိုပါတယ်။

Ref: AFP