မလေးရှားတွင် တရားမ၀င်နိုင်ငံခြားသားများ ဖမ်းဆီးမှု တိုးမြှင့်လုပ်ဆောင်လာ

မေ ၁၃၊ ၂၀၂၀
M-Media

-Covid-19 ထိန်းချုပ်ရေးကာလအတွင်း မလေးရှားအစိုးရဟာ တရားမဝင် နိုင်ငံခြားသား ဖမ်းဆီးမှုကို နိုင်ငံတစ်ဝှမ်း တိုးမြှင့်လုပ်ဆောင်လာခဲ့ပြီး၊ ဖမ်းဆီးထားသူတွေကို ပြစ်ဒဏ်ချမှတ်ကာ မူရင်းနိုင်ငံတွေ ပြန်ပို့သွားဖို့ စီစဉ်နေပါတယ်။

​တနင်္လာနေ့က မြို့တော်ကွာလာလမ်ပူဆင်ခြေဖုံး လက်ကားစျေးရှိတဲ့ ရပ်ကွက်မှာ မလေးရှား​ လူဝင်မှုကြီးကြပ်ရေး ဝန်ကြီးဌာနနဲ့ ရဲတပ်ဖွဲ့တို့ပေါင်းကာ ဝင်ရောက်စီးနင်းခဲ့ပြီး လူပေါင်း ၇၅၅၁ ဦးကို စစ်ဆေးခဲ့ပါတယ်။

စစ်ဆေးမှုအတွင်း ၁၃၆၈ ဦးကို ဖမ်းဆီးခဲ့ပြီး အဲဒီအထဲမှာ အမျိုးသမီးတွေနဲ့ ကလေးငယ်တွေ အပါအဝင် မြန်မာနိုင်ငံသား ၇၉၀ ဦး၊ အင်ဒိုနီးရှားနိုင်ငံသား ၄၈၀ ဦး ပါဝင်တယ်လို့ မလေးရှား လူဝင်မှုကြီးကြပ်ရေး ဝန်ကြီးဌာန ညွှန်ကြားရေးမှူးချုပ် ဒါတွတ် ခိုင်ရူလ် ဒီဇိုင်မီက အင်္ဂါနေ့မှာ ပြောကြားခဲ့ပါတယ်။

“စစ်ဆေးခဲ့တဲ့ နိုင်ငံခြားသားတွေ၊ ဖမ်းဆီးခဲ့တဲ့ တရားမဝင်ရွှေ့ပြောင်းလုပ်သားတွေမှာ Covid-19 မရှိဘူးဆိုတာ စစ်ဆေး အတည်ပြုပြီးပါပြီ။ သက်သေခံအထောက်အထားမရှိတာ၊ ဗီဇာရက်လွန်နေထိုင်တာ၊ ပါမစ်နဲ့ နေထိုင်ခွင့် အတုလုပ်ထားတာ၊ အခြား လူဝင်မှုအက်ဥပဒေ ချိုးဖောက်ထားတာတွေကို တွေ့ရပါတယ်”

ကျူးလွန်သူတွေကို ထိုင်သင့်တဲ့ပြစ်ဒဏ် ချမှတ်ကာ ပြစ်ဒဏ်စေ့ရင် မူရင်းနိုင်ငံဆီ ပြန်လည်ပို့ဆောင်သွားမှာဖြစ်ပြီး၊ မလေးရှားနိုင်ငံကို ပြန်လာလို့မရတဲ့ အမည်ပျက်စာရင်းထဲ ထည့်သွားမယ်လို့လည်း ဒီဇိုင်မီက ထည့်သွင်းပြောဆိုခဲ့ပါတယ်။

မလေးရှား လူဝင်မှုကြီးကြပ်ရေးနဲ့ ရဲတပ်ဖွဲ့ဟာ မေလ အစောပိုင်းကလည်း နိုင်ငံတစ်ဝှမ်း တရားမဝင်နေထိုင်နေတဲ့ နိုင်ငံခြားသားတွေ ဖမ်းဆီးမှု အများအပြား ပြုလုပ်ခဲ့ပါတယ်။

Ref: The Star