ကိုရိုနာနှင့်ဆက်နွယ်သည့် ရောဂါကြောင့် ဥရောပတွင် ကလေးများ သေဆုံးမှုရှိလာ

မေ ၁၆၊ ၂၀၂၀
M-Media

-ဥရောပနိုင်ငံတွေမှာ Covid-19 နဲ့ ဆက်နွယ်တဲ့ နောက်ဆက်တွဲရောဂါတွေကို ခံစားနေရသူ ကလေးငယ် ၂၃၀ လောက်ရှိနေပြီး သေဆုံးသူ ၂ ဦး ရှိခဲ့တယ်လို့ ဥရောပရောဂါတားဆီးရေးနဲ့ ထိန်းချုပ်ရေးအဖွဲ့ (ECDC) က မနေ့မှာ အတည်ပြု ပြောကြားလိုက်ပါတယ်။

Covid-19 ကြောင့် သေဆုံးသူအများစုဟာ သက်ကြီးရွယ်အိုတွေ၊ နာတာရှည်ရောဂါသည်တွေ ဖြစ်ပေမယ့် ဗိုင်းရပ်စ်နောက်ဆက်တွဲရောဂါ ကလေးငယ်တွေမှာ ဖြစ်ပွားမှု မြင့်တက်လာပြီး ကျန်းမာရေးအဖွဲ့အစည်းတွေက စိုးရိမ်ကြောင်း ထုတ်ပြောလာကြပါတယ်။

Paediatric inflammatory multisystem syndrome (PIMS) လို့ခေါ်တဲ့ အဲဒီနောက်ဆက်တွဲရောဂါတွေ ကလေးငယ်တွေမှာဖြစ်ပွားနေပြီး ဒီကိစ္စကို သတိထား စောင့်ကြည့်နေတယ်လို့ အမေရိကန်က ပြီးခဲ့တဲ့ရက်ပိုင်းမှာ ထုတ်ပြန်ခဲ့ပါတယ်။

ရောဂါလက္ခဏာတွေက ရက်ဆက်ဖျားတာ၊ ကျောက်ကပ် ဒါမှမဟုတ် နှလုံးလို ခန္ဓာကိုယ်တွင်းအင်္ဂါတွေ ရောင်ယမ်းပြီး ပုံမှန် အလုပ်မလုပ်တော့တာ၊ သွေးဆိပ်တက်တာတွေ ဖြစ်ပြီး Kawasaki လို့ခေါ်တဲ့ ရောဂါနဲ့ ဆင်တူတဲ့ လက္ခဏာတွေပါ။ ရောဂါလက္ခဏာပြတဲ့ က​လေးငယ်တွေဟာ တစ်ခြားကူးစက်ရောဂါတွေနဲ့ ထိတွေ့တာမရှိဘဲ ကိုရိုနာဗိုင်းရပ်စ် တစ်မျိုးတည်းနဲ့သာ ထိတွေ့ကြတာ ဖြစ်ပါတယ်။

ကမ္ဘာကျန်းမာရေးအဖွဲ့ WHO ကတော့ PIMS ရောဂါနဲ့ပတ်သက်ပြီး သတိထားကြဖို့ ကျန်းမာရေးဝန်ထမ်းတွေကို တိုက်တွန်း​ခဲ့ပေမယ့် Covid-19 နဲ့ ဆက်စပ်မှုရှိလားဆိုတာ ရှင်းရှင်းလင်းလင်း မသိရသေးဘူးလို့ ​ထုတ်ပြန်ထားပါတယ်။

ဥရောပမှာ သေဆုံးသွားတဲ့ ကလေးငယ် ၂ ဦးဟာ ဗြိတိန်နဲ့ ပြင်သစ်တို့က ဖြစ်ပါတယ်။

ECDC က တော့ PIMS ရောဂါမှာ Covid-19 က ဘယ်လို ပါဝင်ပတ်သက်မှုရှိလဲဆိုတာကို လေ့လာဆန်းစစ်ဖို့အတွက် ဥရောပတစ်ဝှမ်း အသိပေးထားပြီး၊ ကလေးငယ်တွေဟာ ကိုဗစ်နဲ့ ထိတွေ့မှုအလားအလာ နည်းတဲ့အတွက် အန္တရာယ်ရှိနိုင်ခြေအနိမ့်ဆုံးအဖြစ် လက်ရှိ ယူဆထားတယ်လို့ ထုတ်ပြန်ချက်မှာ ဖော်ပြခဲ့ပါတယ်။

Ref: Reuters