ထိုင်းနိုင်ငံထုတ် ကိုဗစ်ကာကွယ်ဆေးကို မျောက်များတွင် စတင်စမ်းသပ်

မေ ၂၅၊ ၂၀၂၀
M-Media

-Covid-19 ကာကွယ်ဆေး ထုတ်လုပ်နိုင်ရေး ကမ္ဘာ့နိုင်ငံတွေရဲ့ ကြိုးပမ်းမှုမှာ ထိုင်းနိုင်ငံလည်း ပါဝင်လာခဲ့ပြီး မျောက်တွေကို စတင် စမ်းသပ်နေပြီ ဖြစ်ပါတယ်။

ကမ္ဘာတစ်ဝှမ်း ကာကွယ်ဆေးတွေ ဖန်တီးဖော်ထုတ်နေရာမှာ အလားအလာရှိတဲ့ ကာကွယ်ဆေးပေါင်း ၁၀၀ ကျော်လောက်ရှိနေတယ်လို့ ကမ္ဘာ့ကျန်းမာရေးအဖွဲ့ WHO က ပြောကြားထားပါတယ်။ အဲဒီအထဲက ၈ ခုလောက်ကို လူသားတွေမှာ စမ်းသပ်နေပြီ ဖြစ်ပါတယ်။

ယူကေက အောက်စဖို့ဒ်တက္ကသိုလ်ဟာ ကာကွယ်ဆေးထုတ်လုပ်မှုမှာ ရှေ့တန်းရောက်နေပြီး ချင်ပန်ဇီမျောက်တွေမှာ ကူးစက်တတ်တဲ့ ဗိုင်းရပ်စ်တွေကို အခြေခံကာ ပြီးခဲ့တဲ့လမှာ ဆေးဘက်ဆိုင်ရာ စမ်းသပ်မှုတွေ ပြုလုပ်ခဲ့ပါတယ်။

ထိုင်းနိုင်ငံမှာတော့ အမျိုးသား ပရိုင်းမိတ်သုတေသနဌာနက အမေရိကန် ပင်ဆာလ်ဗားနီးယား တက္ကသိုလ်နဲ့ ပူးပေါင်းကာ ကာကွယ်ဆေးဖော်ထုတ်နိုင်ရေး ကြိုးပမ်းနေပြီး စနေနေ့က Macaque မျောက် ၁၃ ကောင်မှာ စတင် စမ်းသပ်ခဲ့ပါတယ်။

စင်တာရဲ့ ညွှန်ကြားရေးမှူး ဒေါက်တာ Suchinda Malaivitjitnond က ထိုင်းနိုင်ငံထုတ် ကာကွယ်ဆေးတွေဟာ အမေရိကန်နဲ့ ဥရောပက ထုတ်လုပ်တဲ့ ကာကွယ်ဆေးတွေထက် ပိုပြီး စျေးပေါလိမ့်မယ်လို့ ပြောကြားခဲ့ပါတယ်။

ထိုင်းနိုင်ငံဟာ တရုတ်နိုင်ငံပြင်ပမှာ Covid-19 ကူးစက်မှု တွေ့ရတဲ့ ပထမဆုံးတိုင်းပြည်ဖြစ်ပြီး လက်ရှိမှာ စုစုပေါင်း ကူးစက်မှု ၃၀၀၀ ကျော်၊ သေဆုံးသူ ၅၇ ဦး ရှိပါတယ်။

ကာကွယ်ဆေး မျောက်တွေမှာ စမ်းသပ်မှု အောင်မြင်တယ်ဆိုရင်တော့ အစောဆုံး အောက်တိုဘာလကျရင် လူသားတွေမှာ စမ်းသပ်မှာ ဖြစ်ပါတယ်။

Ref: CNA