ကာကွယ်ဆေးမရမချင်း ကျောင်းမဖွင့်ဟု ဒူတာတေးပြော

မေ ၂၆၊ ၂၀၂၀
M-Media

-ကိုရိုနာဗိုင်းရပ်စ် ကာကွယ်ဆေး မရမချင်း ကျောင်းတွေကို ပြန်ဖွင့်ပေးမှာမဟုတ်ဘူးလို့ ဖိလစ်ပိုင်သမ္မတ ရော်ဒရီဂို ဒူတာတေးက ပြောကြားလိုက်ပါတယ်။

ကမ္ဘာတစ်ဝှမ်း တစ်ချို့နိုင်ငံမှာ ရွေ့လျားသွားလာမှု ကန့်သတ်မိန့်ကို လျော့ချပြီ ကျောင်းတွေကို ပြန်ဖွင့်ဖို့ စီစဉ်နေတာပါ။

မနေ့​က ရုပ်သံမိန့်ခွန်းမှာ ဒူတာတေးက ကာကွယ်ဆေးမရဘဲ ကလေးငယ်တွေကို ကျောင်းတက်ခိုင်းတာဟာ အန္တရာယ်ကို ဖိတ်ခေါ်သလိုပဲလို့ ပြောကြားခဲ့ပါတယ်။

“ကျောင်းသားတွေ နီးနီးကပ်ကပ်ရှိနေကြမယ့် စာသင်ခန်းတွေ ပြန်ဖွင့်ဖို့ ကျွန်တော် ခွင့်ပြုမှာမဟုတ်ပါဘူး။ သူတို့အန္တရာယ်မကင်းနိုင်မချင်း ကျောင်းပြန်ဖွင့်ဖို့ ပြောတာဟာ အရူးစကားသာ ဖြစ်ပါလိမ့်မယ်”

ဖိလစ်ပိုင်နိုင်ငံမှာ ပြီးခဲ့တဲ့မတ်လကတည်းက မူလတန်းနဲ့ အလယ်တန်းကျောင်းတွေကို ပိတ်ထားပြီး လာမယ့် ဩဂုတ်လမှာ ပြန်လည်ဖွင့်လှစ်မယ်လို့ သတင်းတွေ ထွက်နေတာပါ။ ဒူတာတေးတော့ ဒါဟာ အန္တရာယ် သိပ်များတယ်လို့ ဆိုပါတယ်။

“ကျွန့်တော့်အတွက်တော့ ကာကွယ်ဆေးက ပထမပါ။ ကာကွယ်ဆေးရပြီဆိုရင်တော့ အဆင်ပြေပါပြီ။ ဘယ်သူမှ ဘွဲ့မရရင်လည်းနေပါစေ”

လက်ရှိမှာ ကမ္ဘာတစ်ဝှမ်း အလားအလာရှိတဲ့ ကိုရိုနာဗိုင်းရပ်စ် ကာကွယ်ဆေး စုစုပေါင်း ၁၀၀ ကျော်လောက်ကို စမ်းသပ်ဖော်ထုတ်နေပြီး ၈ ခုလောက်ကို လူသားတွေမှာ စမ်းသပ်နေပြီ ဖြစ်ပါတယ်။

Ref: Aljazeera