လက်တင်အမေရိကဒေသ Covid-19 ဗဟိုချက်ဖြစ်လာ

မေ ၂၇၊ ၂၀၂၀
M-Media

-လက်တင်အမေရိကဒေသဟာ Covid-19 ကူးစက်ရာ အချက်အခြာနေရာတစ်ခု ဖြစ်လာပြီလို့ ပန်အမေရိက ကျန်းမာရေးအဖွဲ့ (PAHO) က သတိပေးလိုက်ပါတယ်။

တစ်နေ့တာ ကူးစက်မှုအရေအတွက်မှာ လက်တင်အမေရိကဟာ ဥရောပနဲ့ အမေရိကန်တို့ကို ကျော်ဖြတ်သွားပြီဖြစ်ပါတယ်။ အမေရိတစ်တိုက်လုံးမှာ ကူးစက်သူ ၂.၄ သန်းရှိပြီး၊ သေဆုံးသူက ၁၄၃၀၀၀ ဦး ရှိနေတာပါ။

လက်ရှိ ဘရာဇီးလ်၊ ပီရူးနဲ့ ချီလီနိုင်ငံတိုမှာ ကူးစက်မှု သိသိသာသာ မြင့်တက်လာပြီး PAHO အဖွဲ့ ပြောရေးဆိုခွင့်ရှိသူ ဒေါက်တာ Carissa Etienne က ကန့်သတ်မှုလျော့ချတာ၊ ကာကွယ်ရေးဗျူဟာတွေ ရုပ်သိမ်းတာမျိုး မလုပ်ဖို့ မနေ့က သတင်းစာရှင်းလင်းပွဲမှာ တိုက်တွန်းခဲ့ပါတယ်။

ပီရူးနှင့် ချီလီတို့မှာ ပြီးခဲ့တဲ့ ၇ ရက်အတွင်း ကူးစက်မှုနှုန်းဟာ ကမ္ဘာ့အမြင့်ဆုံး ပမာဏဖြစ်ခဲ့ပြီး ချီလီမှာဆိုရင် အနည်းဆုံး အစိုးရဝန်ကြီး ၂ ဦးအထိ ကူးစက်ခဲ့ပါတယ်။

“အခုအချိန်ဟာ အားတင်းထားပြီး သတိရှိရမယ့်အချိန်၊ ထိရောက်တဲ့ ပြည်သူ့ကျန်းမာရေး လုပ်ငန်းစဉ်တွေကို အကောင်အထည်ဖော်ရမယ့်အချိန်ပါ။ အခြားဒေသတွေကနေပြီး ကျွန်မတို့ သင်ခန်းစာရထားတယ်။ ဘယ်ဟာက အလုပ်ဖြစ်လဲ၊ ဘယ်ဟာက အလုပ်မဖြစ်ဘူးလဲဆိုတာကိုလည်း ကျွန်မတို့ သိရှိထားတယ်။ ကျွန်မတို့ရဲ့ အခြေအနေမှာ ဒီအသိတွေကို ဆက်လက်ပြီး ထည့်သွင်းအသုံးချရပါလိမ့်မယ်” လို့ Carissa Etienne က ထည့်သွင်း ပြောဆိုခဲ့ပါတယ်။

Ref: CNN