ကျိုင်းကောင်အုပ်က ကောက်ပဲသီးနှံများကို ဖျက်ဆီးမှု အိန္ဒိယကြုံတွေ့နေရ

မေ ၂၇၊ ၂၀၂၀
M-Media

-အိန္ဒိယနိုင်ငံက ဒေသတစ်ချို့မှာ ကျိုင်းကောင်အုပ်တွေက ကောက်ပဲသီးနှံတွေကို အကြီးအကျယ် စားသောက်ဖျက်ဆီးတာကို ကြုံတွေ့နေရပြီး ၁၉၉၃ ခုနှစ်နောက်ပိုင်း ဒီပြဿနာကို ပထမဆုံး ပြန်လည်ကြုံတွေ့ရတာ ဖြစ်ပါတယ်။

နိုင်ငံမြောက်ပိုင်း ရာဂျက်စသန်​နဲ့ အလယ်ပိုင်း မဒ်ယာပရာဒက်ရှ်ပြည်နယ်တို့မှာ ၁ စကွဲယားကီလိုမီတာပတ်လည်ရှိတဲ့ ကျိုင်းကောင်အုပ် ၈ ခုကနေ ၁၀ ခုလောက်ဟာ ကောက်ပဲသီးနှံတွေကို ကိုက်ဖျက်စားသောက်နေကြပြီး၊ ကောက်ပဲသီးနှံ ဧကပေါင်း ၁၂၅၀၀၀ လောက် ပျက်ဆီးခဲ့ပြီ ဖြစ်ပါတယ်။

ကျိုင်းကောင်အုပ်ဟာ ဧပြီလက ပါကစ္စတန်ကို ဝင်ရောက်ပြီးနောက်ပိုင်း အိန္ဒိယကို ရောက်လာတာဖြစ်ပါတယ်။

အကောင် သန်း ၄၀ လောက်ရှိတဲ့ ကျိုင်းကောင်အုပ်ဟာ လူပေါင်း ၃၅၀၀၀ လောက်အတွက် ဖူလှုံတဲ့ အစားအသောက်တွေကို စားသောက်ဖျက်ဆီးနိုင်စွမ်းရှိတယ်လို့ ကုလရဲ့ စားနပ်ရိက္ခာနှင့် စိုက်ပျိုရေးအဖွဲ့ UNFAO က ပြောကြားထားပါတယ်။

အာဏာပိုင်တွေကတော့ ဒရုန်းတွေ၊ လယ်ထွန်စက်တွေနဲ့ အခြားယာဉ်တွေကို အသုံးပြုကာ ကျိုင်းကောင်းတွေကို ပိုးသတ်ဆေးဖြန်း နှိမ်နှင်းနေပါတယ်။ အခြားပြည်နယ်တစ်ချို့မှာလည်း ကျိုင်းကောင်အုပ် အသေးစားတွေ ပျံ့နှံ့တာမျိုး ရှိနေပါတယ်။

မိုးသည်းထန်စွာရွာသွန်းတာလို စိုစွတ်တဲ့ ရာသီဥတုကြောင့် ကျိုင်းကောင်တွေ ပိုမိုပွားများလာပြီး ရှေ့ဆက် ဆိုးရွားမယ့်အနေအထား ရှိနေတယ်လို့ ပညာရှင်တွေက သတိပေးထားပါတယ်။

Ref: AFP