ဝူဟန်မြို့တွင် Covid-19 အန္တရာယ် ကင်းသွားပြီဟု တရုတ်ကြေငြာ

ဇွန် ၄၊ ၂၀၂၀
M-Media

-ဝူဟန်မြို့မှာရှိနေတဲ့ လူ ၁၀ သန်းနီးပါးကို ကိုဗစ် ရှိ၊ မရှိ စစ်ဆေးပြီးပြီဖြစ်ပြီး ကိုဗစ်အန္တရာယ် ကင်းသွားပြီလို တရုတ်အာဏာပိုင်တွေက မနေ့မှာ ကြေငြာလိုက်ပါတယ်။

တရုတ်နိုင်ငံအလယ်ပိုင်းက ဝူဟန်မြို့ဟာ Covid-19 စတင်ရာဒေသဖြစ်ပြီး အဲဒီကနေတစ်ဆင့် ကမ္ဘာတစ်ဝှမ်းကို ပြန့်နှံ့သွားခဲ့တာပါ။ တရုတ်နိုင်ငံက ကိုဗစ်ကူးစက်သူ၊ သေဆုံးသူအရေအတွက်ရဲ့ ၈၀ ရာခိုင်နှုန်းက ဝူဟန်ကဖြစ်ပြီး ရောဂါထိန်းချုပ်နိုင်ရေးအတွက် မြို့ကို လနဲ့ချီ တံခါးပိတ်ခဲ့ပါတယ်။

အာဏာပိုင်တွေဟာ မေလ ၁၄ ရက်နေ့ကနေ ဇွန်လ ၁ ရက်နေ့အထိ မြို့မှာနေထိုင်တဲ့ လူပေါင်း ၉.၉ သန်းကို ကိုရိုနာဗိုင်းရပ် ရှိ၊ မရှိ စစ်ဆေးခဲ့တာပါ။ လူပေါင်း ၃၀၀ မှာ ကိုရိုနာဗိုင်းရပ်စ်ရှိပေမယ့် ရောဂါလက္ခဏာမပြဘဲ သူတို့နဲ့ ဆက်နွယ်နေသူ ၁၁၇၄ ဦးမှာတော့ ဗိုင်းရပ်စ် လုံး၀မရှိတာကို တွေ့ခဲ့ရပါတယ်။

ဝူဟန်မြို့မှာ လူဦးရေ ၁၁ သန်းလောက် ရှိနေပြီး အသက် ၅ နှစ်အထက်ရှိသူ အားလုံးကိုစစ်ဆေးခဲ့တာ ဖြစ်ပါတယ်။

“ဒီလိုစစ်ဆေးမှုကြောင့် ဝူဟန်ပြည်သူတွေ စိတ်အေးသွားစေရုံတင်မကဘဲ နိုင်ငံတစ်ဝှမ်းက ပြည်သူတွေရဲ့ ယုံကြည်မှုကိုလည်း မြင့်တက်လာစေပါတယ်။ ဝူဟန်မြို့ဟာ အန္တရာယ်ကင်းသွားပါပြီ” လို့ ရောဂါထိန်းချုပ်ရေးနဲ့ ကာကွယ်ရေးစင်တာက ဒုတိယညွှန်ကြားရေးမှူး ဖန်ဂျီကျန်းက ပြောကြားခဲ့ပါတယ်။

ရောဂါလက္ခဏာမပြသူတွေကြောင့် နောက်ပိုင်းမှာ အန္တရာယ်ဘယ်လောက် ရှိနိုင်လဲဆိုတာကိုတော့ သူမက ထည့်သွင်းပြောကြားခဲ့ခြင်း မရှိပါဘူး။

Ref: Aljazeera