မွတ်စလင်ပညာရေးစင်တာများကို အစိုးရက ထောက်ပံ့ပေးရန် ထိုင်းတရားရုံးချုပ် ဆုံးဖြတ်

ဇွန် ၅၊ ၂၀၂၀
M-Media

-ဘန်ကောက်မြို့အတွင်းက မွတ်စလင်တွေတည်ထောင်ထားတဲ့ ပညာရေးစင်တာတွေကို အစိုးရက ငွေကြေးထောက်ပံ့ပေးဖို့ ထိုင်း အုပ်ချုပ်ရေးဆိုင်ရာတရားရုံးချုပ်က ဆုံးဖြတ်လိုက်ပါတယ်။

မွတ်စလင်ပညာရေးစင်တာတွေဟာ ၂၀၁၃ ခုနှစ်ကစလို့ အစိုးရရဲ့ထောက်ပံ့မှုတွေ မရတော့ပါဘူး။ မြို့တော်ဘန်ကောက်မှာ စာသင်ကျောင်းတွေ တော်တော်များများ ဖွင့်လှစ်ထားတဲ့ မွတ်စလင်ဖောင်ဒေးရှင်း Tarbiyatul Foundation က အစိုးရထံကနေ ထောက်ပံ့ကြေး ရရှိဖို့အတွက် ၂၀၁၃ ခုနှစ်မှာ အုပ်ချုပ်ရေးဆိုင်ရာ တရားရုံးချုပ်ကို အသနားခံစာ တင်သွင်းခဲ့ပါတယ်။

တရားရုံးချုပ်က ဒီကိစ္စနဲ့ပတ်သက်ပြီး မေလ ၂၉ ရက်နေ့မှာ ဆုံးဖြတ်ချက်တစ်ခု ချမှတ်ခဲ့ပါတယ်။ အခြေခံပညာကျောင်းတွေဟာ အစိုးရရဲ့ ထောက်ပံ့မှုကို ရရှိခံစားပိုင်ခွင့်ရှိပြီး ဒီအတွက် ဘန်ကောက်မြို့က မွတ်စလင်ပညာရေးစင်တာအားလုံးကို တစ်လအတွင်း ငွေကြေးထောက်ပံ့ပေးရမယ်လို့ ဒီဆုံးဖြတ်ချက်မှာ ပါဝင်ပါတယ်။

ထိုင်းနိုင်ငံမှာ အစ္စလာမ်ဘာသာဝင်အများစုဟာ မလေးလူမျိုးတွေဖြစ်ပြီး နိုင်ငံတောင်ပိုင်းက ပြည်နယ် ၄ ခုမှာ အခြေစိုက်နေထိုင်ကြပါတယ်။

ဒီကနေ့ ထိုင်းပြည်နယ်တွေဖြစ်နေတဲ့ ပတ္တာနီ၊ ယာလာ၊ နာရာသီဝပ်နဲ့ မလေးရှားမြောက်ပိုင်းတွေဟာ ၁၃ ရာစုကတည်းကစလို့ မလေးဘုရင့်နိုင်ငံ (Pattani Kingdom) အဖြစ် တည်ရှိခဲ့တာပါ။ ဒီဒေသတွေကို ထိုင်းဘုရင်တွေက အကြိမ်ကြိမ် ကျူးကျော်တိုက်ခိုက်ခဲ့ကြပြီး ၁၇၈၅ ခုနှစ်မှာတော့ လုံး၀ သိမ်းပိုက်နိုင်ခဲ့ကာ ထိုင်းနိုင်ငံရဲ့ အစိတ်အပိုင်းတစ်ခု ဖြစ်လာခဲ့တာ ဖြစ်ပါတယ်။

Ref : Bangkokpost