ပြင်သစ်တွင် ကက်သလစ်ဘုန်းကြီးများ၏ လိင်စော်ကားမှုကိုခံရသူ ကလေးငယ် ၃၀၀၀ ခန့်ရှိ

ဇွန် ၁၈၊ ၂၀၂၀
M-Media

-ပြင်သစ် ခရစ်ယာန် ကက်သလစ်အသင်းတော်က ဘုန်းကြီတွေ၊ တာဝန်ရှိသူတွေရဲ့ လိင်ပိုင်းဆိုင်ရာ စော်ကားမှုကို ခံရသူ ကလေးငယ် အနည်းဆုံး ၃ ထောင်လောက်ရှိတယ်လို့ စုံစမ်းစစ်ဆေးရေးကော်မရှင်က ထုတ်ပြန်လိုက်ပါတယ်။

ခရစ်ယာန်ဘုရားကျောင်းတွေမှာ ဘုန်းကြီးတွေရဲ့ လိင်အရှုပ်တော်ပုံဇာတ်လမ်းတွေ ပေါ်ထွက်လာပြီးတဲ့နောက် ၂၀၁၈ ခုနှစ်မှာ ပြင်သစ် ကက်သလစ်အသင်းတော် အာဏာပိုင်တွေက လွတ်လပ်တဲ့ စုံစမ်းစစ်ဆေးရေးကော်မရှင်ဖွဲ့ပြီး စုံစမ်းခဲ့တာပါ။

ကော်မရှင်ဥက္ကဌ Jean-Marc Sauve က ကနဦး စုံစမ်းစစ်ဆေးမှုတွေအရ ပြီးခဲ့တဲ့ ဆယ်စုနှစ်တွေအတွင်း ကက်လသစ်အသင်းတော်က ဘုန်းကြီးတွေနဲ့ အခြား တာဝန်ရှိသူ ၁၅၀၀ လောက်ဟာ လိင်ပိုင်းဆိုင်ရာ ကျူးလွန်မှုတွေ ရှိခဲ့တယ်ဆိုတာ တွေ့ရတယ်လို့ မနေ့မှာ ပြောကြားခဲ့ပါတယ်။

ကော်မရှင်ကို ရှေ့နေတွေ၊ ဆရာဝန်တွေ၊ သမိုင်းပညာရှင်၊ ဘာသာရေးပညာရှင် စုစုပေါင်း ၂၂ ဦးနဲ့ ဖွဲ့စည်းထားတာဖြစ်ပြီး စုံစမ်းစစ်ဆေးမှု တွေ့ရှိချက် အပြည့်အစုံကို အခုနှစ်ကုန်ပိုင်းကျရင် ထုတ်ပြန်မှာ ဖြစ်ပါတယ်။

မတ်လတုန်းကလည်း ပြင်သစ် ခရစ်ယာန်ကက်သလစ်ဘုန်းကြီးတစ်ပါးဟာ ကလေးငယ်တွေအပေါ် လိင်ပိုင်းဆိုင်ရာ စော်ကားမှုနဲ့ ထောင်ဒဏ်ချမှတ်ခံခဲ့ရပါတယ်။ ဒီဘုန်းကြီးဟာ ၁၉၇၀၊ ၁၉၈၀ နဲ့ ၁၉၉၀ ပြည့်နှစ်တွေမှာ ဒါဇင်နဲ့ချီတဲ့ ကလေးငယ်တွေကို လိင်စော်ကားခဲ့တာ ဖြစ်ပါတယ်။

Ref: RT