တရုတ်ပစ္စည်းများကို သပိတ်မှောက်ရန် အိန္ဒိယအစ္စလာမ်အဖွဲ့က မွတ်စလင်များကို တိုက်တွန်း

ဇွန် ၂၁၊ ၂၀၂၀
M-Media

-မကြာသေးခင်က ဖြစ်ပွားခဲ့တဲ့ တရုတ်နိုင်ငံနဲ့ နယ်စပ်တင်းမာမှုမှာ အစိုးရနဲ့ စစ်တပ်ဖက်က ရပ်တည်ပြီး တရုတ်ထုတ်ကုပစ္စည်းတွေကို သပိတ်မှောက်ကြဖို့အတွက် အိန္ဒိယအစ္စလာမ်ဘာသာ​ရေးအဖွဲ့ Tanzeem Ulama-e-Islam က ဘာသာဝင်တွေကို တိုက်တွန်းလိုက်ပါတယ်။

အိန္ဒိယနိုင်ငံမြောက်ပိုင်း ဟိမ၀န္တာတောင်တန်းက လာဒက်ခ်ဒေသမှာ အိန္ဒိယနဲ့ တရုတ်တို့အကြား ပိုင်နက်အငြင်းပွားမှုဟာ လွန်ခဲ့တဲ့ ၁၀ စုနှစ်ချီကတည်း ရှိခဲ့ပြီး ပြီးခဲ့တဲ့မေလကစလို့ တင်းမာမှုတွေ ပြန်လည်မြင့်တက်လာတာပါ။ ပြီးခဲ့တဲ့တစ်ပတ်မှာတော့ နှစ်ဖက်စစ်သားတွေ ရန်ဖြစ် သတ်ပုတ်ခဲ့တာကြောင့် အိန္ဒိစစ်သား အနည်းဆုံး ၂၀ သေဆုံးခဲ့ပါတယ်။

နောက်ဆက်တွဲအဖြစ် အိန္ဒိယနိုင်ငံမှာ တရုတ်နိုင်ငံကို သပိတ်မှောက်ရေးလှုပ်ရှားမှု မြင့်တက်လာခဲ့ပြီး အစ္စလာမ်ဘာသာရေးအဖွဲ့တစ်ခုဖြစ်တဲ့ Tanzeem Ulama-e-Islam က ပြည်သူလူထုအနေနဲ့ အစိုးရ၊ စစ်တပ်တို့နဲ့ ရပ်တည်ရမယ်လို့ ဒီကနေ့ထုတ်ပြန်တဲ့ ​ကြေငြာချက်မှာ ဖော်ပြထားပါတယ်။

“တရုတ်ထုတ်ပစ္စည်းတွေကို သပိတ်မှောက်ကြဖို့ ကြေငြာချက်မှာ ကျွန်တော်တို့ တိုက်တွန်းထားပါတယ်။ အိန္ဒိယနိုင်ငံကို ကျူးကျော်ဝင်ရောက်ပြီး ကျွန်တော်တို့ရဲ့ ရဲရင့်တဲ့စစ်သားတွေကို သတ်ဖြတ်တဲ့လုပ်ရပ်ကို အစ္စလာမ်ဘာသာရေးခေါင်းဆောင်တွေက ရှုတ်ချပါတယ်” လို့ အဖွဲ့ရဲ့ အထွေထွေအတွင်းရေးမှူး မောင်လာနာ ရှာဘူဒင် ရစ်ဇ်ဗီက ပြောကြားခဲ့ပါတယ်။

Ref: New India Express