တစ်ပတ်အတွင်း ကျန်းမာရေးသတင်းများ

ဇွန် ၂၅၊ ၂၀၂၀

M-Media

လူမျိုးရေးခွဲခြားမှုကို ပြည်သူ့ကျန်းမာရေးပြဿနာအဖြစ် ကနေဒါ​မြို့တစ်ခု သတ်မှတ်

ကနေဒါနိုင်ငံ အွန်တာရီယိုပြည်နယ် Chatham-Kent မြို့ရဲ့ ကျန်းမာရေးဘုတ်အဖွဲ့ဟာ လူမျိုးရေးခွဲခြားမှုကို ပြည်သူ့ကျန်းမာရေးပြဿနာအဖြစ် တစ်ညီတစ်ညွတ်တည်း သတ်မှတ်လိုက်ပါတယ်။

လူမည်းတွေ၊ ဌာနေတိုင်းရင်းသားတွေနဲ့ လူနည်းစုတွေကို ခွဲခြားတာမျိုးကြောင့် ပြည်သူ့ကျန်းမာရေးဆောင်ရွက်မှုမှာ ဆိုးကျိုးတွေရှိတယ်လို့ ဆိုပါတယ်။

လူမည်းတွေဟာ လူဖြူတွေထက် ဝေဒနာကို ပိုမိုခံနိုင်ရည်ရှိတယ်ဆိုတဲ့ အတွေးမျိုးတွေ ဆေးဘက်နယ်ပယ်မှာ ရှိနေတာကို ဘုတ်အဖွဲ့က ထောက်ပြခဲ့ပြီး မြို့ရဲ့ ကျန်းမာရေးပေါ်လစီတွေ၊ စီမံကိန်းတွေမှာ အားလုံး ပါဝင်နိုင်အောင် ဆောင်ရွက်ရမယ်လို့လည်း ကတိပြုခဲ့ပါတယ်။

ယူအေအီး-တရုတ် ကိုဗစ်ကာကွယ်ဆေးစမ်းသပ်မှု တတိယအဆင့်သို့ရောက်ရှိ

အာရပ်စော်ဘွားများပြည်ထောင်စု (ယူအေအီး) နဲ့ တရုတ်တို့ ပူးပေါင်းပြီး ကိုဗစ်လူနာတွေမှာ ကာကွယ်ဆေးတစ်မျိုး စမ်းသပ်မှုဟာ တတိယအဆင့်ကို ရောက်ရှိလာပြီ ဖြစ်ပါတယ်။

ကာကွယ်ဆေးစမ်းသပ်ရာမှာ ပထမအဆင့်နဲ့ ဒုတိယအဆင့်ပြီးတဲ့နောက် တတိယအဆင့်မှာ လူသောင်းချီ ပါဝင်လေ့ရှိပြီး ပထမ နှစ်ကြိမ်က စမ်းသပ်မှုကို ထပ်မံအတည်ပြုရတာဖြစ်ပါတယ်။ တတိယအကြိမ်မှာ ရလဒ်ကောင်းထွက်တယ်ဆိုရင်တော့ ကာကွယ်ဆေး အောင်မြင်ပြီလို့ သတ်မှတ်ပါတယ်။

ကမ္ဘာတစ်ဝှမ်း ကိုဗစ်လူနာတွေမှာ စမ်းသပ်နေတဲ့ ကာကွယ်ဆေး စုစုပေါင်း ၁၆ မျိုး ရှိနေပြီး နောက်ထပ် ၁၂၅ မျိုးကိုလည်း ဓာတ်ခွဲခန်းတွေမှာ စမ်းသပ်နေတယ်လို့ WHO က ထုတ်ပြန်ထားပါတယ်။

အင်္ဂလန်နိုင်ငံ အောက်စဖို့ဒ်တက္ကသိုလ်က ကိုဗစ်ကာကွယ်ဆေးတစ်မျိုး စမ်းသပ်မှုကလည်း တတိယအဆင့်ကို ရောက်ရှိနေပြီ ဖြစ်ပါတယ်။

ဆေးမနိုင်ကင်ဆာဝေဒနာရှင်များအတွက် ကုသနည်းတစ်ခုကို စမ်းသပ်နေ

ကင်ဆာဆဲလ်ကြီးထွားမှုကို ရပ်တန့်စေပြီး ဆဲလ်တွေကို အလိုအလျောက် ဖာထေးစေတဲ့ ကုသနည်းကို ယူကေ ကင်ဆာသုတေသနဌာနက စတင်စမ်းသပ်ရာမှာ အောင်မြင်မှုရနေပါတယ်။

Berzosertib လို့ အမည်ရတဲ့ဆေးနဲ့ ဓာတ်ကင်နည်းကို ပေါင်းစပ်ကုသတာဖြစ်ပြီး လက်ရှိ ပထမအဆင့် စမ်းသပ်မှုမှာ ဘယ်လိုနည်းလမ်းမျိုးနဲ့မှ ကုလို့မရတော့တဲ့ ကင်ဆာဝေဒနာရှင်အနည်းငယ်ကို ကုသပေးတာပါ။

ဒီနည်းလမ်းကြောင့် ကင်ဆာအကြိတ်တွေ ကြီးထွားမှု ရပ်တန့်တာကို တွေ့ခဲ့ရပါတယ်။

ပထမအဆင့်စမ်းသပ်မှုဟာ အန္တရာယ်ကင်း၊ မကင်း စစ်ဆေးတာမျိုးဖြစ်ပြီး ဒီကုသနည်း အမှန်တကယ် ထိရောက်မှု ရှိ၊ မရှိအတွက် နောက်ထပ် စမ်းသပ်စစ်ဆေးမှုတွေ လုပ်ဆောင်ရအုံးမယ်လို့ ဒီလုပ်ငန်းမှာ ပါဝင်နေတဲ့ သုတေသနပညာရှင်တွေက ပြောကြားခဲ့ပါတယ်။