တိုင်းရင်းသားများ လူဦးရေနည်းလာအောင် တရုတ်က စီမံကိန်းဖြင့် ဆောင်ရွက်နေ

ဇွန် ၃၀၊ ၂၀၂၀
M-Media

-နိုင်ငံအတွင်း ဝီဂါနဲ့ အခြား တိုင်းရင်းသားလူနည်းစုတွေ လူဦးရေ နည်းသမျှနည်းအောင် တရုတ်အစိုးရက စီမံကိန်းချ ဆောင်ရွက်နေတာကို AP သတင်းဌာနက စုံစမ်းဖော်ထုတ်လိုက်ပါတယ်။

ဒီစုံစမ်းဖော်ထုတ်မှုအတွက် AP သတင်းဌာနဟာ တရုတ်အစိုးရက ထုတ်ပြန်တဲ့ စာရွက်စာတမ်းတွေ၊ ကိန်းဂဏန်းတွေကို အရယူခဲ့သလို၊ တရုတ်အစိုးရက စီမံတဲ့ အကျဉ်းစခန်းတွေမှာ ကြီးကြပ်ရေးတာဝန် ယူခဲ့ရသူ၊ ထိန်းသိမ်းခံခဲ့ရသူ စုစုပေါင်း ၃၀ လောက်ကိုလည်း တွေ့ဆုံမေးမြန်းခဲ့ပါတယ်။

တိုင်းရင်းသားတွေ လူနည်းအောင် ဆောင်ရွက်တာအပြင် လူများစုဖြစ်တဲ့ ဟန်တရုတ်တွေ လူဦးရေတိုးပွားလာအောင်လည်း တရုတ်ကအစိုးရက စီစဉ်ထားပြီး ဒါဟာ လူမျိုးတုန်းအောင်လုပ်မှုတစ်ခု ဖြစ်တယ်လို့ ကျွမ်းကျင်သူတွေက ပြောကြားခဲ့ကြပါတယ်။

ဝီဂါမွတ်စလင်တွေအပါအဝင် လူနည်းစုတိုင်းရင်းသားတွေရဲ့ လူဦးရေ လျော့ပါးအောင်၊ တိုင်းရင်းသားဒေသတွေမှာ ဟန်တရုတ်တွေ များလာအောင် ကွန်မြူနစ်အစိုးရက စီမံကိန်းချ ​ဆောင်ရွက်နေတာကို ကမ္ဘာက အရင်ကတည်းက သိထားခဲ့ပေမယ့် AP သတင်းဌာနရဲ့ ဒီဖော်ထုတ်မှုအရ အရင်ကထင်ထားတာထက်ကို ပိုပြီး တင်းကြပ် ပြင်းထန်တယ်ဆိုတာ တွေ့ခဲ့ရပါတယ်။

တရုတ်အစိုးရဟာ လူနည်းစုတိုင်းရင်းသား အမျိုးသမီးတွေရဲ့ ကိုယ်ဝန်ဆောင်မှုကို ပုံမှန် စစ်ဆေးလေ့ရှိပြီး သန္ဓေတားပစ္စည်းထည့်တာ၊ သားကြောဖြတ်တာ၊ ကိုယ်ဝန်အဓမ္မဖျက်ချခိုင်းတာတွေကို လုပ်ဆောင်တာပါ။ ဒီလိုအလုပ်ခံရတဲ့ အမျိုးသမီးအရေအတွက်ဟာ အနည်းဆုံး သိန်းချီရှိတယ်လို့ AP သတင်းဌာနက ဆိုပါတယ်။

နိုင်ငံတစ်ဝှမ်းမှာ ကိုယ်ဝန်တားမှု၊ သားကြောဖြတ်မှုနှုန်း ကျဆင်းသွားပေမယ့် ဝီဂါလူမျိုးတွေရဲ့ဒေသသဖြစ်တဲ့ တရုတ်နိုင်ငံအနောက်ပိုင်း ရှင်ကျန်းပြည်နယ်မှာ ဒီနှုန်းက သိသိသာသာ မြင့်တက်လာခဲ့ပါတယ်။ ဒီလုပ်ဆောင်မှုကို မလိုက်နာရင် တရုတ်ကအစိုးရက ပြင်းပြင်းထန်ထန် အရေးယူပါတယ်။

ကလေး ၃ ဦးနဲ့အထက်ရှိနဲ့ မိသားစုတွေကို ဒဏ်ကြေးဆောင်ခိုင်းတာမျိုးလည်း လုပ်လေ့ရှိပါတယ်။ မဆောင်နိုင်ရင် အိမ်ကို ရဲတွေကဝင်စီးပြီး ကလေးတွေကိုဖမ်းကာ အကျဉ်းစခန်းတွေဆီ ပို့ဆောင်လေ့ရှိတာကို AP သတင်းဌာနရဲ့ စုံစမ်းဖော်ထုတ်မှုမှာ တွေ့ခဲ့ရပါတယ်။

ဒီစီမံကိန်းကြောင့် ဝီဂါအများစုရှိရာဒေသမှာ ကလေးမွေးဖွားမှုနှုန်းဟာ ၂၀၁၅ ခုနှစ်ကနေ ၂၀၁၈ ခုနှစ်တွင်း ၆၀ ရာခိုင်နှုန်းလောက် ကျဆင်းသွားခဲ့ပါတယ်။ ပြီးခဲ့တဲ့နှစ်က တရုတ်နိုင်ငံတစ်ဝှမ်းမှာ ကလေးမွေးမှုနှုန်း ၄.၂ ရာခိုင်နှုန်း ကျဆင်းခဲ့ပေမယ့် ရှင်ကျန်းပြည်နယ်မှာတော့ ၂၄ ရာခိုင်နှုန်းအထိ လျော့ကျသွားခဲ့ပါတယ်။

“ဒီလိုလျော့ကျမှုက မကြုံစဖူးပါ။ ရက်စက်မှုအပေါင်း သရဖူဆောင်းတယ်လို့ ပြောလို့ရပါတယ်။ ဝီဂါတွေကိုနှိမ်နှင်းရေး ကြီးမားတဲ့ စီမံကိန်းကြီးရဲ့ တစ်စိတ်တစ်ပိုင်းပဲ ရှိပါသေးတယ်” လို့ တရုတ်ပညာရှင်တစ်ဦးဖြစ်တဲ့ ​အေဒရီယန် ဇန့်က ပြောကြားခဲ့ပါတယ်။

အမေရိကန်ပြည်ထောင်စု ကိုလိုရာဒို တက္ကသိုလ်က ဝီဂါအရေးကျွမ်းကျင်သူ ဒါရန် ဘိုင်လာက ဝီဂါတွေကို လုံး၀ အစဖျောက်လိုက်တာထက် တစ်ဖြည်းဖြည်း အားနည်းအောင်လုပ်ပြီး တရုတ်ဇာတ်သွင်းတာမျိုး တရုတ်အစိုးရက ရည်ရွယ်ထားတယ်လို့ ပြောကြားခဲ့ပါတယ်။

ဒီတွေ့ရှိချက်တွေနဲ့ပတ်သက်ပြီး တရုတ်နိုင်ငံခြားရေးဝန်ကြီးဌာနကို အကြိမ်ကြိမ် ဆက်သွယ်မေးမြန်းခဲ့ပေမယ့်လည်း ပြန်လည်ဖြေကြားခြင်းမရှိဘူးလို့ AP သတင်းဌာနက ဆိုပါတယ်။

Ref: AP