တရုတ် အက်ပလီကေးရှင်း ၅၀ ကျော်ကို အိန္ဒိယက အသုံးပြုခွင့်ပိတ်

– နာမည်ကျော် TikTok နဲ့ WeChat တို့အပါအဝင် တရုတ်ထုတ် ဖုန်းအက်ပလီကေးရှင်း စုစုပေါင်း ၅၀ ကျော်လောက်ကို အိန္ဒိယက အသုံးပြုခွင့် ပိတ်လိုက်ပါတယ်။

ဟိန္ဒိမ၀န္တာတောင်တန်း လာဒက်ခ်ဒေသမှာ အခုလအစောပိုင်းက နှစ်ဖက်စစ်တပ် ခိုက်ရန်ဖြစ်ပွားပြီးတဲ့နောက် အိန္ဒိယနိုင်ငံမှာ တရုတ်ထုတ်ကုန် ဆန့်ကျင်ရေးလှုပ်ရှားမှု မြင့်တက်လာခဲ့တာပါ။

တထရုတ်ထုတ် အက်ပလီကေးရှင်းတွေဟာ တိုင်းပြည်ရဲ့ အချုပ်အခြာ၊ လုံခြုံရေးနဲ့ ကာကွယ်ရေး၊ လူထုညီညွတ်ရေး၊ ဥပဒေစိုးမိုးရေးကို ပျက်ဆီးစေနိုင်တယ်လို့ အိန္ဒိယအစိုးရက ထုတ်ပြန်ထားပါတယ်။

တရုတ်ကအစိုးရကတော့ မိမိတို့နိုင်ငံက ကုမ္ပဏီတွေကို နိုင်ငံတကာ ဥပ​​ဒေ၊ ပြည်တွင်းဥပဒေနဲ့ညီအောင် ဆောင်ရွက်ဖို့ တိုက်တွန်းထားပြီး အိန္ဒိယအနေနဲ့ တရုတ်ကုမ္ပဏီတွေရဲ့ ဥပဒေနဲ့ အညီစီးပွားရေးလုပ်ကိုင်ခွင့် ပြန်ပေးဖို့ တောင်းဆိုထားခဲ့ပါတယ်။

အိန္ဒိယက ပိတ်ပင်လိုက်တဲ့ အက်ပလီကေးရှင်းတွေမှာ Weibo၊ Clash of Kings၊ UC Browser၊ Club Factory နဲ့ Shein တို့ ပါဝင်ပါတယ်။

Ref : BBC

အာကာသစူးစမ်းရှာဖွေရေးကို ဂျပန်က တိုးမြှင့်လုပ်ဆောင်မည်

အာကာသ ရှာဖွေစူးစမ်းရေးလုပ်ငန်းမှာ အမေရိကန်နဲ့ ပူးပေါင်းဆောင်ရွက်မှု တိုးမြှင့်သွားမယ်လို့ ဂျပန်က ဇွန်လ ၂၉ ရက်နေ့မှာ ထုတ်ပြန်ပါတယ်။

အသေးစား ထောက်လှမ်းရေး ဂြိုဟ်တုတွေ လွှတ်တင်သွားဖို့၊ အမေရိကန်ရဲ့ လသွားခရီးစဉ်မှာ ဂျပန်အာကာသာယာဉ်မှူးတွေ လိုက်ပါနိုင်ဖို့ စတာတွေကို ဆောက်ရွက်မှာဖြစ်ပြီး အာကာသကဏ္ဍအတွက် လက်ရှိ ယန်း ၁.၂ ထရီလီယံ အသုံးပြုမှုကို ၂၀၃၀ ပြည့်နှစ်ရောက်ရင် ၂ ဆတိုးဖို့လည်း စီစဉ်ထားပါတယ်။

နည်းပညာ၊ ကာကွယ်ရေးနဲ့ အာကာသကဏ္ဍတွေမှာ ရင်းနှီးမြှုပ်နှံမှု ပိုမိုလုပ်ဆောင်နိုင်ရေး အားပေးဆောင်ရွက်သွားမယ်လို့ ဂျပန်၀န်ကြီးချုပ် ရှင်ဇိုအာဘေးက ထည့်သွင်းပြောဆိုခဲ့ပါတယ်။

Ref : Stripes