ရုရှားထံမှ တိုက်လေယာဉ် အစင်း ၃၀ ကျော် အိန္ဒိယ ဝယ်ယူမည်

ဇူလိုင် ၃၊ ၂၀၂၀
M-Media

-တရုတ်နိုင်ငံနဲ့ တင်းမာမှုတွေ မြင့်တက်လာတဲ့ အိန္ဒိယ ရုရှားဆီကနေ တိုက်လေယာဉ် ၃၀ လောက် ဝယ်ယူဖို့အတွက် လက်မှတ်ရေးထိုးလိုက်ပါတယ်။

MiG-29 တိုက်လေယာဉ် ၂၂ စီး၊ Su-30 MKI တိုက်လေယာဉ် ၁၂ စီး ဝယ်ယူမှာဖြစ်ပြီး ရှိပြီးသား MiG-29 လေယာဉ် ၅၉ စီးကို အဆင့်မြှင့်တင်ဖို့လည်း ဒီသဘောတူညီချက်မှာ ပါဝင်တယ်။

အိန္ဒိယ ကာကွယ်ရေးဝန်ကြီးဌာနက လေတပ်အင်အားတောင့်တင်းဖို့ ဒီလိုဝယ်ယူတာဖြစ်ပြီး စစ်တပ်အတွက် ဒုံးကျည်တွေ၊ လက်နက်ခဲယမ်းတွေ ပြည်တွင်းမှာ ထုတ်လုပ်ဖို့၊ စစ်ဖက်ယာဉ်တွေကို အဆင့်မြှင့်တင်ဖို့ ခွင့်ပြုမိန့်လည်း ပေးခဲ့တယ်လို့ ထုတ်ပြန်ပြောကြားခဲ့ပါတယ်။

“တိုင်းပြည်ရဲ့နယ်နမိတ်ကို ကာကွယ်ရေး စစ်တပ်ကိုအားကောင်းအောင် ဆောင်ရွက်ဖို့ လိုအပ်လာတာ၊ ကိုယ့်အားကိုယ်ကိုးတဲ့ အိန္ဒိယဖြစ်လာရေး ဝန်ကြီးချုပ်မိုဒီတဲ့ ဆော်ဩမှု စတာတွေကြောင့် ဒီလိုဆောင်ရွက်တာဖြစ်ပါတယ်”

ဖွဲ့စည်းပုံအခြေခံဥပဒေကို အောင်မြင်စွာပြင်ဆင်နိုင်မှုအတွက် ရုရှားသမ္မတ ပူတင်ကို အိန္ဒိယဝန်ကြီးချုပ် မိုဒီက ဖုန်းနဲ့ ကျေးဇူးတင်စကား ပြောဆိုပြီးနောက်ပိုင်း ကာကွယ်ရေးဝန်ကြီးဌာနရဲ့ ဒီထုတ်ပြန်ချက် ပေါ်ထွက်လာတာ ဖြစ်ပါတယ်။

ရုရှားဟာ စစ်အေးခေတ်မှာ အိန္ဒိယရဲ့ မဟာမိတ်နိုင်ငံတစ်ခုဖြစ်သလို၊ အိန္ဒိယကို လက်နက်အများဆုံး ထောက်ပံ့တဲ့ နိုင်ငံလည်း ဖြစ်ပါတယ်။

ရုရှားရဲ့ နောက်ဆုံးပေါ် S-400 ဒုံးခွင်းစနစ် ဝယ်ယူရေးအတွက် အိန္ဒိယဟာ ၂၀၁၈ ခုနှစ်မှာ လက်မှတ်ရေးထိုးခဲ့ပြီး ဒီစာချုပ်အတွက် အမေရိကန်နဲ့ တင်းမာမှုလည်း ဖြစ်ခဲ့ပါတယ်။

၂၀၁၆ ခုနှစ်မှာ ပြင်သစ်နိုင်ငံက 36 Rafale တိုက်လေယာဉ် ကန်ဒေါ်လာ ၈.၇၈ ဘီလီယံဖိုး အိန္ဒိယက ဝယ်ယူထားပြီး အခုလအကုန်ပိုင်းမှာ ပထမအသုတ် ရောက်ရှိလာမှာ ဖြစ်ပါတယ်။

Ref: Aljazeera