တရုတ်ဒေသတစ်ခုတွင် ကြောက်စရာ ပလိပ်ရောဂါ ဖြစ်ပွားနေ

ဇူလိုင် ၆၊ ၂၀၂၀
M-Media

-တရုတ်နိုင်ငံမြောက်ပိုင်းက အင်းနားမွန်ဂိုလီးယားဒေသမှာ ကြောက်စရာကောင်းတဲ့ အကြိတ်ထွက် ပလိပ်ရောဂါ (Bubonic plague) ဖြစ်ပွားမှုကို တွေ့လာရတာကြောင့် အာဏာပိုင်တွေက သတိပေးချက် ထုတ်ပြန်ထားပါတယ်။

ပြီးခဲ့တဲ့နှစ် နိုဝင်ဘာလကတည်းက ဒီရောဂါ ကူးစက်မှုကို စတွေ့လာရတာဖြစ်ပြီး ဒီထက်ပိုကြောက်စရာကောင်းတဲ့ Pneumonic ပလိပ်ရောဂါ ဖြစ်ပွားမှု အနည်းငယ် ရှိနေပါတယ်။ မြို့တော်ဘေဂျင်းမှာလည်း ဒီပုလိပ်ရောဂါကူးစက်မှု အနည်းဆုံး ၂ ခုကို တွေ့ရပါတယ်။

အင်းနားမွန်ဂိုလီးယား​ဒေသ မြို့တော်ဘာယန်နူရ်ရဲ့ ကျန်းမာရေးကော်မတီက ဒီကူးစက်မှုကြောင့် မနေ့က တတိယအဆင့် သတိပေးချက် ထုတ်ပြန်ထားပါတယ်။ ပလိပ်ရောဂါကူးစက်နိုင်တဲ့ သားရိုင်းတိရစ္ဆာန်တွေကို ဖမ်းဆီးစားသောက်တာကို တားမြစ်ခဲ့ပြီး၊ ရောဂါ တိတိကျကျမရှိဘဲ ဖျားတဲ့သူတွေ၊ သေဆုံးတဲ့သူတွေကို သိရှိရင် သတင်းပေးတိုင်ကြားဖို့လည်း ညွှန်ကြားထားပါတယ်။

Bubonic ပလိပ်ရောဂါဟာ ကမ္ဘာ့သမိုင်းတစ်လျှောက်မှာ အသေအပျောက်အများဆုံး ကူးစက်ရောဂါတွေထဲက တစ်ခုဖြစ်ပြီး အလယ်ခေတ်မှာ ‘အနက်ရောင်သေမင်း’ ရောဂါ လို့ အမည်တွင်ပါတယ်။ ဒီရောဂါကြောင့် ၁၄ ရာစုမှာ လူ ၇၅ သန်းကနေ သန်း ၂၀၀ လောက် သေဆုံးခဲ့သလို၊ သက္ကရာဇ် ၅၄၁ ခုနှစ်ကနေ ၅၄၉ ခုနှစဝ်အတွင်း အနည်းဆုံး လူ သန်း ၃၀ ကနေ ၅၀ အတွင်း သေဆုံးခဲ့တယ်လို့ မှတ်တမ်းမှတ်ရာတွေက ဆိုပါတယ်။

အဆုတ်မှာ အဓိကဖြစ်လေ့ရှိတဲ့ Pneumonic ပုလိပ်ရောဂါဟာ လေထဲကနေ အလျင်အမြန် ကူးစက်နိုင်ပြီး ကပ်ရောဂါအသွင် ဖြစ်လာနိုင်တယ်လို့ WHO က ထုတ်ပြန်ထားပါတယ်။

တရုတ်နိုင်ငံမှာ ပုလိပ်ရောဂါလို ရောဂါမျိုး အကြီးအကျယ် ဖြစ်လေ့ဖြစ်ထ မရှိပါဘူ။ ၂၀၀၉ ခုနှစ်ကနေ ၂၀၁၈ ခုနှစ်အတွင်း ပုလိပ်ရောဂါဖြစ်ပွားသူ ၂၆ ဦး သေဆုံးသူ၊ ၁၁ ဦး ရှိခဲ့ပါတယ်။

Ref: Aljazeera