ဝီဂါဒေသဖြစ်သည့် ရှင်ကျန်းပြည်နယ်ကို လာကြည့်ရန် ကန်ကို တရုတ် ဖိတ်ခေါ်

ဇူလိုင် ၁၆၊ ၂၀၂၀
M-Media

-ရှန်ကျန်းပြည်နယ်မှာ လူ့အခွင့်အရေးချိုးဖောက်မှုတွေ ရှိ၊ မရှိ လာရောက်ကြည့်ရှုဖို့အတွက် အမေရိကန်နိုင်ငံခြားရေးဝန်ကြီး မိုက်ပွမ်ပီယိုကို ဖိတ်ခေါ်တယ်လို့ တရုတ်နိုင်ငံက ပြောကြားလိုက်ပါတယ်။

တရုတ်နိုင်ငံအနောက်ပိုင်း ရှန်ကျန်းပြည်နယ်မှာ ဝီဂါနဲ့ အခြားလူမျိုးငယ် အနည်းဆုံး ၁ သန်းလောက်ကို တရုတ်အစိုးရက အကျဉ်းစခန်းတွေထဲ ထည့်ထားပြီး ဖိနှိပ်ညှင်းပမ်းမှုတွေ ရှိတယ်လို့ သတင်းတွေ ကျယ်ကျယ်ပြန့်ပြန့် ထွက်ပေါ်နေတာပါ။ တရုတ်ဖက်ကတော့ ဒါကို ငြင်းဆိုထားပါတယ်။

တရုတ်နိုင်ငံခြားရေးဝန်ကြီးဌာနရဲ့ ဒီကနေ့ အကျဉ်းချုပ် သတင်းစာရှင်းလင်းပွဲမှာ ဝန်ကြီးဌာန ပြောရေးဆိုခွင့်ရှိသူ ဟွာချွမ်ယင်းက ရှင်ကျန်းပြည်နယ်မှာ ဝီဂါမွတ်စလင်တွေအပေါ် လူ့အခွင့်အရေး ချိုးဖောက်မှုတွေ မရှိဘဲ၊ ဒါတွေကို လာကြည့်ဖို့အတွက် ကန်နိုင်ငံခြားရေးဝန်ကြီး မိုက်ပွမ်ပီယိုကို ဖိတ်ခေါ်တယ်လို့ ပြောကြားခဲ့ပါတယ်။

ဒါ့အပြင် တရုတ်အနေနဲ့ အမေရိကန်ရဲ့နေရာကို ယူဖို့ မကြိုးစားသလို၊ စိန်ခေါ်မှာလည်းမဟုတ်ကြောင်း အမေရိကန်အနေနဲ့ တရုတ်နဲ့ပတ်သက်တဲ့ ပေါ်လစီကို ဓမ္မဓိဌာန်ကျကျ ပြန်လည်သုံးသပ်ဖို့ တိုက်တွန်းကြောင်း ဟွာချွမ်ယင်းက ထည့်သွင်းပြောဆိုခဲ့ပါတယ်။

ရှင်ကျန်းပြည်နယ်က လူ့အခွင့်အရေးချိုးဖောက်မှုတွေအတွက် တရုတ်ကွန်မြူနစ်ပါတီ ခေါင်းဆောင်တစ်ချို့ကို အမေရိကန်က ပိတ်ဆို့အရေးယူမှုတွေ လုပ်ဆောင်ထားသလို၊ ထိုင်ဝမ်ကိစ္စ၊ တောင်တရုတ်ပင်လယ်ကိစ္စတွေနဲ့ပတ်သက်ပြီးတော့လည်း တရုတ်နဲ့ အမေရိကန်တို့အကြား အခုသီတင်းပတ်တွေအတွင်း တင်းမာမှုတွေ မြင့်တက်နေတာ ဖြစ်ပါတယ်။

Ref: Reuters