ထရမ့်မပြုတ်ခင် အီရန်အား တိုက်ခိုက်မှုပိုလုပ်ရန် အစ္စရေး စီစဉ်နေ

ဇူလိုင် ၁၈၊ ၂၀၂၀
M-Media

-လာမယ့်နိုဝင်ဘာလ အမေရိကန်ရွေးကောက်ပွဲမတိုင်ခင် အီရန်အပေါ် အစ္စရေးက တိုက်ခိုက်မှုတွေ ပိုလုပ်လာနိုင်ပြီး စစ်ပွဲဖြစ်တဲ့အထိ ဦးတည်သွားနိုင်တယ်လို့ ဥရောပသမဂ္ဂ ထောက်လှမ်းရေးတာဝန်ရှိသူတစ်ဦးက Business Insider သတင်းဌာနကို ပြောကြားခဲ့ပါတယ်။

ပြီးခဲ့တဲ့ သီတင်းပတ်အနည်းငယ်အတွင်း ဒုံးကျည်စက်ရုံနဲ့ နျူစက်ရုံစက်တွေအပါအဝင် အီရန်က စက်ဖက်ဆိုင်ရာ နေရာတစ်ချို့မှာ မီးလောင်တာ၊ ပေါက်ကွဲတာတွေ ဖြစ်ခဲ့ပါတယ်။ အီရန်အာဏာပိုင်တွေကတော့ ဒီအဖြစ်အပျက်အများစုဟာ ပုံမှန် မတော်တဆမှုမျိုး ဖြစ်ပေမယ့်၊ တစ်ချို့တွေက ရန်သူတွေရဲ့ ဖျက်လိုဖျက်ဆီးလုပ်ရပ်မျိုး ဖြစ်နိုင်တယ်လို့ ထုတ်ပြန်ခဲ့ပါတယ်။

အစ္စရေးစစ်ဖက်တာဝန်ရှိသူဟောင်းတစ်ဦးက တစ်ချို့ကိစ္စတွေကို အစ္စရေးထောက်လှမ်းရေးအဖွဲ့က လုပ်ဆောင်တာ ဖြစ်တယ်လို့ ပြောကြားခဲ့ပါတယ်။

အစ္စရေးနိုင်ငံခြားရေးဝန်ကြီး ဂါဘီ အက်ရှ်ကနာဇီရဲ့ ဇူလိုင် ၅ ရက် သတင်းစာရှင်းလင်းပွဲမှာ မိမိတို့ဟာ အီရန်နဲ့ပတ်သက်လာရင် အရေးယူတာမျိုးရှိပြီး ဒါဟာ ဘာမှမပြောတာထက် ပိုကောင်းတယ်လို့ ပြောကြားခဲ့ပါတယ်။

ဥရောသမဂ္ဂက အမည်မဖော်လိုတဲ့ ထောက်လှမ်းရေးတာဝန်ရှိသူ တစ်ဦးကတော့ နိုဝင်ဘာလမှာပြုလုပ်မယ့် အမေရိကန်သမ္မတရွေးကောက်ပွဲမှာ လက်ရှိသမ္မတထရမ့် ပြန်လည်အနိုင်ရနို​င်ချေ မရှိတာကြောင့် ထရမ့် သက်တမ်းမကုန်ခင် အီရန်အပေါ် အစ္စရေးက တိုက်ခိုက်တွေ ပိုလုပ်လာဖို့ ရှိတယ်လို့ ဆိုပါတယ်။

တော်လှန်ရေးအစောင့်တပ်ဖွဲ့ရဲ့ ထိပ်တန်းဗိုလ်ချုပ် ကာစင်ဆိုလိုင်မာနီကို အခုနှစ်အစောပိုင်းမှာ အမေရိကန်က လုပ်ကြံသတ်ဖြတ်ခဲ့ပြီးတဲ့နောက် အီရန်ရဲ့ သည်းခံနိုင်မှု အတိုင်းအတာက ဂိတ်ဆုံးရောက်နေပြီး အစ္စရေးရဲ့ ထပ်မံတိုက်ခိုက်မှုအပေါ် ပြင်းပြင်းထန်ထန်တုန့်ပြန်ကာ စစ်ပွဲတစ်ခုအသွင်အထိ ဦးတည်သွားနိုင်တယ်လို့လည်း သူက ထည့်သွင်း ပြောဆိုခဲ့ပါတယ်။

Ref: Business Insider